Read Angguruk Yali YEHEZKIEL 8 Bible Online

YEHEZKIEL 8 - Angguruk Yali bible

YEHEZKIEL 8

¹Nit o Babilonia kinang fam weregman eneg mo ilig am wirig am turukmu falfalikenam larisimu pikalem falfalikon fam hup fuwabenam noholug Yehuda inap onowesi nibam waharusareg an nalukema heriyeg lit weregman NINIKNI suwon Allah inggiken sen naptisi.

²Sen naptisimu anden fulu roho yet harukmen ap hahon eke weregma yet harikik. Ap hahon ino alunggu apma fil indok ambulpul hag toho inam atukmu pali fil ine angge mondabi umbagpag turukon hahon umbagpag turuk latisi.

³Ari regma ap hahon inowen inggik hag anggeyen an noruk seneg latisi. Seneg latisimu anden fulu roho yet harukmen Allah ahime inowen an kinangman ha naplug pohol keyen o Yerusalem larisireg sok ik eleruk filen kurukon horogma pilabe nubaharisi. Sok ino iraham nunumba ulug wel turuk angge Allah indi olokap turukon ino unduhuk latisi.

⁴An sok horogma wereg lit yet harukmen indam tonggoman yet harikik hag toho Israel ninap Ninikni Allah ebe umbagpag toho weregma yet harikik.

⁵Yet harukmen Allahn an nubam ele uruk lit, ”Hat ap kinangmon welahenonen ik eleruk fil yet himin!” ulug hiyag nitisimu anden ik eleruk fil yet harukmen sok ino iraham nunumba ulug wel turuk angge unduhuk lit weregma sok ino sel fil hubu lahaptuk ambeg eke welatisi.

⁶Weregma Allahn nin ele uruk lit, ”Hat ap kinangmon welahenon, Israel inaben alem nungge turukmu yet isaruk lahen? Iren amben siyag anggolowon turuk lit An nibamen yanggaloho wilip naptuk. Ari turukon we tot apma regma nin sebe roho amben siyahon su roho turukmu fobik yet isamihin,” ulug hiyag nitisi.

⁷Hiyag nitisireg Allah ibam elehet walinggoho owohon sok kurukon iraham hondog naptug larisimu elehet ino fo regma yet harikik.

⁸Yet harikikmu Allahn ele uruk lit, ”Hat ap kinangmon welahenonen fo reg ambeg aru ele suwap tin,” irisimu suwap tirikikteg yet harukmen sok eke wirig latisi.

⁹Wirig latisimu Allahn, ”Sok aru ele keyen kimihinteg ap ariman amben mondabi siyahon turukmu yet isa lamihin,” irisi.

¹⁰Irisimu an kirikikteg yet harukmen Israel inaben nunumbasi ulug wel eneptukon lebe ruruk angge ahum sap fam larukon men Allahn saliyog nahup fug ibahon winon men wirim toho elehet fam ilit teg latisi.

¹¹Ilit teg angge arimano onolohotma Israel inap onowesi teng hinahan 70 unduhukmu it sehelimu hun Safan amloho Yaazanya welatisi. It wal tanehen kou hubu lahaptuk angge ininggikmu seneg lit amben fano angge yaloho hubu lahaptuk latusa.

¹²Lahaptukmu Allahn ele uruk lit, ”Hat ap kinangmon welahenon, Israel inap onowesi aruman o hik tegman nanggintukmu yet isaruk lahen? Tuma turuk hag toho inibam wal-wal sang famen unumbasi wel eneptuk. It inindimuwen wenggel haruk lit, ’NINIKNI Allah nit nenengginang embeselug larisireg nit yet nisaruk eleg,’ peruk,” irisi.

¹³Irisireg nin ele uruk lit, ”Iren ari roho turukon we tot apma regma nin sebe roho amben siyahon su roho turukmu fobik yet isamihin,” irisi.

¹⁴Ari irisireg Allahn elehet pirenehon At ibam horogma walinggoho ohowon sok kurukon ik eleruk filon iraham hondog naptug larisi. Hondog naptug larisimu hiyaben sabalhe Tamus fahet piya sini urukmu yet isarikik.

¹⁵Yet isarikikmu Allahn, ”Hat ap kinangmon welahenon, hiyap aruman nanggintukmu yet isaruk lahen? Iren ari roho turukon we tot apma regma nin sebe roho amben siyahon su roho turukmu fobik yet isamihin,” irisi.

¹⁶Irisireg NINIKNI Allahn an At ibam owahalma elehet huk toho kilabeg ambeg hondog naplug larisimu anden yet harukmen ap hinahaneg fimahen Allah ibam sok kurukon men hubu lahaptuk ambeg alukema wirihon men honggolegma unduhukmu yet isarikik. Ap arimano Allah ibam enembol yig utug onorohole mo lahik waharuk fil leko yet haruk lit enelenggen fam hur atug mo wel turuk latusa.

¹⁷Wel turukmu Allahn an nubam ele uruk lit, ”Hat ap kinangmon welahenon, ap aruman nanggintukmu yet isaruk lahen? Yehuda inaben ap inindi siyahap eneptuk angge wel turuk lit kinang atogman atogma onolok ane til-wil norukon fahet hayen peruk lit Allah indimu inahan tukag ulug An nele ying naptukmen eneg wereg. An nibam owahalman turuk ane aruwen we tem-toho An apmayap naptuk.

¹⁸Ari fahet Anden it nindi isa fug angge nolok ane unubam tuhuk. Ari roho tuhukmu iren An nubam enele hi roho hindi nisimin uhup halug oho Anden hol isahuk fug,” irisi.