Read Angguruk Yali YEHEZKIEL 9 Bible Online

YEHEZKIEL 9 - Angguruk Yali bible

YEHEZKIEL 9

¹Ari irisimu anden hol harukmen Allahn ele hi roho uruk lit, ”Hit o Yerusalem aru siyahap tuhup ulug wol heneptikik hinap, henesehen seneko maniyek!” irisi.

²Irisimu ap falfaliken sehen seneko elehet Allah ibam walinggoho ohowon sok ik eleruk filon ele keyen waharukmu yet isarikik. Waharuk lit ap eke sum sulumon wan teg lit suwesingga hahatuk angge alunggu ke pug toho it men ambiyeg waharusareg hubu lahaptuk ambeg ine angge tembaga fam wirihon ino iraham in arik larusa.

³Larusama Israel ninap Ninikni Allah umbagpag turukon seleg ino malaikat hag angge emberimu welatisi ambehen lahalug Allah ibam sok kembilikmu in arik larisi. In arik larisireg NINIKNI Allahn ap sum sulumon wan teg lit suwesingga hahatuk angge alunggu ke pug tehon ino fil ele hi roho uruk lit,

⁴”O Yerusalem aruwen aben An numbahalug amben siyahon turukon fahet onori we tor anggeyen eneg ninirim peruk lit inindi anggin toho wereg. It inilahuwagma enehangge embemihinen o Yerusalem walinggoho yami enebik lamihin,” ulug hiyag itisi.

⁵Hiyag itisireg an holegman ap falfaliken itano unubam ele uruk lit, ”At ombolim o pumbuk walinggoho lalihipteg ap obog toho hinindi isa fug angge unusil lalihip!

⁶Ap sabalonet kabiniyonet hiyap tuhumon men hiyap malik men obog toho pinggi unusilihip angge famen ap enehangge inilahuwagma werehon arimano sen enebuk fug. Ap winon arimano unusilihip ane An nibam tuwen ak tilihip,” ulug hiyag isarisi. Hiyag isarisimu ap unusuruk ane ak turuk lit Israel inap onowesi Allah ibam owahalma unduhukon arimano unusurusa.

⁷Unusurukmu itano Allahn hiyag isaruk lit, ”An nibam aru siyahap tuhuk tohon puk fug angge owahalma ap waroho emberukmen eneg keleg atmisiyen unusiyek!” irisimu ap obog toho unusurusareg ap winon o Yerusalem werehon arimano oho unusul ulug Allah ibam owahalman wilip atug larusa.

⁸It arimanowen ap Allah ibam owahalma welatuson obog toho unusuruk lit an namu eneg numbaharusama an nelenggen fam hur atug nele hi roho uruk lit, ”Yihi, NINIKNI suwon Allah welahenon, o Yerusalem aru fahet Hat hindimu inahan turuk lit Israel inap we tor angge onoluk werehon obog toho elehap enepmin peruk lahen ano?” irikik.

⁹Irikikmu Allahn hebeloho hiyag nutuk lit, ”Israel inap men Yehuda inap menen siyag ane til-wil norukmen eneg kinang aru ap unusuruk aneyen keleg atisi hag toho o pumbuk aru oho onolok ane turukonen keleg teg. Ap aruman, ’NINIKNI Allah nit nenengginang embeselug larisireg nit yet nisaruk eleg,’ ulug An nabug uruk.

¹⁰Ari fahet iren siyag ane turukon Anden hebeloho it unubam emberuk lit nindi isa fug angge siyahap enebuhuk,” irisi.

¹¹Irisimu ap sum sulumon wan teg lit suwesingga hahatuk angge alunggu ke pug tehon ino o pumbukmu larisireg suhuloho waharuk lit, ”Haren hiyag nerehenon ino tibihireg wahi,” ulug Allah hiyag itisi.