Read Angguruk Yali DANIEL 10 Bible Online

DANIEL 10 - Angguruk Yali bible

DANIEL 10

¹Hun Kores ino o Persia inap onowe suwon lahibagma mo ilig am wirig am turukmen hinahan atfagma Allahn Daniel unuk keron Beltsazar suwalfahon ino wene eke hiyag itfag. Wene ari ap asengseng toho welamuhup ane fahet tem toho uruk latfag. Wene ari alem nungge fahet uruk ulug Danielen wenggel harukmen fulu roho selehap tibagma yet hibareg indi anggar atfag.

²Aren ele uruk lit, ”O itano li an Danielen fong watuk latikik. Fong watuk li wam unu men hele anggur ahaluwe men unduk fano angge winon hunik wereg lit e zaitun ahaluwe nebene lahabuk fug angge weregman eneg Allahn usayap tibag sambil hinahan atisi.

⁴Hinahan atisimu pikalem tamon fam hup uhaneg fiman atisi sambil ino an ik suwon Tigris ayegma unduhuk lit

⁵yet harukmen ap sum hekel sulumon fam yihikon wan teg lit alunggu ke namil umbagpag turuk angge emas orohole fanowon fam wirihon pug teg lit weregma yet harikik.

⁶At ebe helep ili faya rurukon hag toho ili rurukmu orohole lebeglu lebeg turuk hag tegma ilanggen indok ambulpul turukon hag toho welatisi. Inggik uyug ke yaha aben ket umatukon hag toho umbagpag turukmu ele urukmu ap anggolowen ngik-ngog turuk hag toho turuk latisi.

⁷Ari roho turukmu an Danielen eneg yet harikikmu ap an men welatusonen yet ha fug anggeyen enekolen hirag arik larusama

⁸an namu eneg welatikik. Anden alem suwon ino fulu roho yet harukmen nine eleg atisimu norohole ap warehon orohole hag atisi.

⁹Ari hag atisimu ap inowen ele urukmu hol harikikteg an nil fulug turuk lit norohole han kinangma ying atikik.

¹⁰Ying atikikmu ap eke inggiken an seneko unduhuk nubahamin ulug turukmen an nuwag elek-elek angge ruruken ninggik kinangma timi roho nelenggen fam eneg hur arik laharikik.

¹¹Hur arik laharikikmu ap inowen an nubam ele uruk lit, ’Daniel nare, Allahn hat indi anggolo hasug hahun, Allahn an hambeg mon nabik waha. Ari fahet in atmihinteg anden hiyag hitminon fuki roho holeg lamin!’ ulug hiyag nitisi. Ari ulug hiyag nitisimu an nuwag elek turuk anggeyen in atikik.

¹²In atikikmu ap inowen ele uruk lit, ’Daniel nare, hakol ha fug! Hat hindimuwen wenggel haruk lit Nikni Allahn tuhuk perukon fahet nindi anggar aruhuwen At olohotma nindi apma roho welaruhuk perikin. Perikin sambil ak turuk lit Allahn hat hele urukmu hol hiyaruk latisi. Hol hiyarisireg an hambeg mon naptisi angge famen

¹³hambeg watmin ulug turukmen o Persia inap onowesi fet enesuhon malaikat inowen an sen naptukmen eneg Allahn usayap tibag sambil hinahan atisi. Hinahan atisimu Allah amingmingangge malaikat palimu werehon sehelimuwon misig unuk Mikhael inowen an nibil arik waharisi. Waharisimu an nindimuwen Mikhael eneg o Persia inap onowesi iniraham welaruhu peruk lit at embeselug larikikteg hambeg wahi.

¹⁴Hambeg waharukmu yet niyaruk lahenon ari fobik teko lahu ane fahet holuk atmisiyen wahi. Obog aruhu li hat hori Israel inap unubam teko lahu ane fahet hiyag hitmin,’ ulug hiyag nitisi.

¹⁵Ari ulug hiyag nutukmu an nele uk fug teg lit kunuk toho welatikik.

¹⁶Weregman ap hag angge inowen an nambilikmu tung harikim hebeloho nele uk teg lit at ubam, ’Nikni, anden hat waharukmu yet hiyihireg ouk nubam atuk lit nine eleg aha.

¹⁷An hat hamingmingangge nebe toronen hat nikni hubam ke roho nele imin? An nine oho sar oho mondabi eleg aha,’ irikik.

¹⁸Irikikmu ap hag angge inowen nin hebeloho tung niyarisimu an tot nine atikik.

¹⁹Nine atikikmu aren hiyag nutuk lit, ’Allahn hat indi anggolo hiyaruken hakol ha fug angge hindi yuwag toho welamin! We tem hindi wirik toho welamin!’ irisi. Ari urukmu itano an mondabi nine atisimu hiyag utuk lit, ’Nikni, haren an nineyap nabehen angge re hele in!’ irikik.

²⁰Irikikmu aren, ’Nungge fahet nambeg waha ulug holuk teg? Tem toho teko lahuwon fahet suwesingga fam hahareg ane hiyag hitminen wahi. Obog toho hiyag hitminteg hat humbahalug o Persia inap onowesi fet enesug ahun men ying abuhuk ulug lamin. Fet enesug ahun ino apmayap tuhukmu o Yunani inap fet enesuhon malaikat ino waruhureg an men ying abuhuk. Ying aptukmu ap misihen oho let nabuhu fug, we hit Israel inap fet henesuhon malaikat Mikhael inowen eneg an nibil arik waruhu.