Read Angguruk Yali DANIEL 11 Bible Online

DANIEL 11 - Angguruk Yali bible

DANIEL 11

¹Ari hag toho anden oho hun Darius o Media inap onowe suwon lahibahon mo ino fam Mikhael ino ibil atuk lit let turuk latik iyag,’ ulug hiyag nitisi,” ibag.

²Danielen ele uruk lit, ”Ap hag angge inowen nin ele irisiyon tu, ’Anden tem toho hiyag hitminon tu holeg lamin: O Persia inap onowesi suwon hinahan in amuhupmu uhanehon tung ahun aruhu. Tung ahun aruhu ane men it hinahan itano men ambi reg lamuhup fug. Uhanehon ino anggengge anggolowen mondabi ine aruhureg o Yunani inap onowe suwon apmayap tuhuk ulug mun ane man ane wal hahu.

³Welamuhupmu ap ahako roho turukon eke o Yunani inap onowe suwon lahakureg ine anggolo reg lit eke hag eke hag tuhuk peruk ane teberuk laruhu angge famen

⁴ap seliyon obog toho apmayap enebuhureg weregman kinang aren seneg laruhuwon ino uhan minggir aruhu. Kinang uhan itano ap suwon umalikisiyen seneg lamuhup fug, ap winon wal tanehen kinang yali fil, hubula fil, ik eleruk fil, ik ambut fil werehon seneg lamuhup angge famen at tam lahakuwonen ahako roho turuk laruhu ane hikit toho turuk lamuhup fug.

⁵Ap suwon ik ambut fil o Mesir kinang seneg laruhuwon ino ine aruhu angge famen otsi sehen senehon milal eneptuk ahun eke at palimu aruhureg ik eleruk fil kinang suwon unuk Siria senerik lahu.

⁶Senerik lahureg weregma mo ilig am wirig am turukmen we tot lahumu Mesir inap onowe men Siria inap onowe men nininggik ahandip toho welamuhuk ulug sali umbuhup. Sali embeheyon ine amag ulug Mesir inap onoweyen ahaloho Siria inap onowe og uruhu. Og uruhu angge famen ahaloho ino ine eleg lit ikniyen puhu ane hikit toho turuk elehen hiyap inowet ikni men ahun men siyag amuhup.

⁷O itano li hiyap ino erek eke ikni ubalma o Mesir inap onowe in aruhureg o Siria inap onowe pilabuhuk ulug tog aptuk lit Siria inap inibam pumbuk suwon elehet yaron walinggoho ohowon pin halog toho unusuhu.

⁸Unusuhureg Siria inaben tu Allah hag toho wereg ulug wel eneptuk angge men kubag umbagpag turukon perak men emas men fam wirihon arimano yoholiyangge wahureg ibam o Mesir kinangma waruhu. Waruhureg o Siria inap onowe men tog abuk fug angge weregman eneg mo anggolo lahu.

⁹Anggolo lahumu Siria inap onowe inowen o Mesir inap onowe men tog abuhuk ulug angginangma kuhu angge famen Mesir inaben yanggaluhupmu suhuloho ibam waruhu.

¹⁰Waruhumu otsiyen ap sehen senehon anggolo palu enebuhupteg it sehelimuwon misig ik fu waharuk hag toho o Mesir inap arimano apmayap enebik lahu. Lahureg suhuloho ibam waruhu. Waruhureg nin hebeloho otsi hondog eneplug lahureg Mesir inap inibam elehet yaron huk toho oho ambeg pin kuhuk ulug horogma lahu.

¹¹Lahumu o Mesir inap onowe ino ahummu het-pet toho wilip aruhureg Siria inap mondoko wamuhubon arimano mul angge unusuhu.

¹²Unusuhureg ap enebe teng-teng angge winag isa fug toho unusirikik ulug indimu winik-wonog toho turuk laruhu angge famen we tot welaruhureg ine eleg aruhu.

¹³Mo ilig am wirig am turukmen we tot lahumu Siria inap onowe inowen tam notsi tor angge eneg palu eneptikik angge famen ketiya anggolo palu enebuhuk ulug wol enebuhureg sehen yaha karog seneg lit nin hebeloho Mesir inap men tog abul ulug lahup.

¹⁴Lahup li ap anggolowen Mesir inap onowe pilabul ulug wal haruk lamuhup. Wal haruk lit hat hori Israel hinap sehelimuwon onolok toho turuk inaben oho fulu roho yet harukuk ane hikit toho tuhuken Mesir inap onowe ino apmayap tuhuk ulug in amuhup angge famen ininggareg siyag amuhup.

¹⁵Ari turukmu Siria inap onowe ino otsi men o Mesir kinangma wamuhupteg o pumbuk elehet yaron ohowon eke waling enesug lit kinang fam hop til lahakupteg elehet ino suhan toho pin kuhup. Pin kuhupmu Mesir inap tog enembong se roho aptukon arimano oho inine elehen yanggal enebuhup fug.

¹⁶Yanggal enebuhup fugmu Siria inap onowe ino ap misihen oho apmayap tuk fug tehen indimuwen tuhuk peruk ane hikit toho turuk lit Allahn umalikisi kinang fanoma og isibahon fam oho kik waruhureg o pumbuk eke men eke men harep pisako siyaha fisil lahu.

¹⁷Welaruhureg Siria inap onowe inowen otsi sehen senehon obog toho hondog eneplug nin hebeloho o Mesir kinangma kuhureg Mesir kinang obog toho an aruhuk ulug Mesir inap onowe ambeg lalug ubam ele si ane uruk lit nininggik ahandip toho welamuhuk ulug sali umbuhu. Sali umbuhuwon ino ine amag ulug ahaloho o Mesir inap onowe og uruhu angge famen Mesir kinang ino at inggikmu aruhu fug.

¹⁸Inggikmu aruhu fugmu Siria inap onowe ino ik saho ahik ayegma lahureg kinang anggolo ilmig til lahu angge famen indimu winik-wonog toho turuk lit ap siyahap enebil laruk ane ari hebeloho inggareg ubam amag ulug ap seliyon milal eneptuk ahun ekeyen Siria inap onowe ino otsi men apmayap enebuhu.

¹⁹Apmayap enebuhumu Siria inap onowe ino otsi men suhuloho inibam elehet yaron walinggoho ohowon fam hirag arik wamuhup angge famen ap seliyonen mug eneplug wamuhupteg mulangge unusuhupmu ap misihen oho ap suwon ino unuk uruk lamuhup fug.

²⁰At ubalma ap suwon eke in aruhureg numalikisiyen uang og numuhuben heng enebil laruk laruhun ulug ot eke monde fuhumu kinang fanoma Allahn umalikisi og isibag ambeg lahu. In aruhureg amusun toho welam fugmen tog elma ap onolohotman wabuk fug angge aben hirahoman ware fusuhup,’ ulug hiyag nitisi.

²¹Hiyag nitisireg ap hag angge inowen an nubam nin ele uruk lit, ’Ap suwon ware fusuhubon ubalma ap ubabut siyahon eke Siria inap onowe in aruhu. At ino fahet aben ap suwon welam fug teg perukmen ap inindi og eneptuk lit lahaku.

²²Lahakumu ap seliyon mondoko ambeg wamuhup angge famen aren ik fu waharuk lit mun angge man angge hondo ruruk hag toho unusuhureg Allah amingmingangge imam onowe eke oho ware fusuhu.

²³Aren ap o pumbuk winamon men nininggik ahandip toho welamuhuk ulug sali emberuk laruhu angge famen fobik enele ying eneptuk laruhu. Ari roho turuk laruhumu at ibil atukon we tor angge welamuhup angge famen at ine atuk lit palimu lahaku.

²⁴Palimu lahakureg ikni umban turuk latfag fuhon turuk lit ap enepeleg toho weregman enengginang mun angge man angge wereg ambeg kuruk laruhu. Kuruk lit enenggengge huhul hilaruk lit otsi fibir eneptuk laruhu. Ap seliyonen elehet yaron huk toho kilabeg ambeg oho pin halog toho kuhuk ulug wenggel haruk laruhu angge famen siyag aruhu sambil horog aruhuwon fahet apeleg toho welaruhu.

²⁵Apeleg toho wereg lit an nine roho welahireg nambong se roho o Mesir inap onowe men tog abik lahuk ulug otsi anggolo palu enebuhureg hondog eneplug lahu. Larukmu o Mesir inap onowe inowen hol hahureg aren oho otsi anggolo inine roho tog abukon andog enebuhu angge famen otsi sehelimuwonen ninikni pilabul ulug wal haruk lamuhupmu ine eleg aruhu.

²⁶Ine eleg aruhumu otsi at men suburu ambiyeg narukonen inikni pilabuhup. Pilabuhupmu otsi sehen senehon tog elman unusurukmu enebe teng-teng angge ik kililoho larukon hag toho eleg amuhupmu winon obog toho linggik-longgo uhup.

²⁷Linggik-longgo uhupmu Mesir inap onowe ino men Siria inap onowe men ambi amuhupteg misigmu heriyeg lit enele sahaltuk lamuhup. Enele sahaltuk lit it piren inindimuwen wat-war amuhuk ulug wenggel haruk liren enele fam fano roho uruk lamuhup angge famen Allahn nit pirenet siyahap nenebuhuk peruk sambil horog aha ulug enepeleg toho welamuhup.

²⁸Welamuhupteg Siria inap onowe inowen huhulangge anggolo hilahureg nibam lamin ulug o Mesir kinang embeselug laruk lit Allah Wene mondabi eleg amag ulug Wene holtuk inap siyahap enebil ibam o Siria kinangma lahu.

²⁹Allahn fano puhu li o Siria inap onowe inowen nin o Mesir kinang ilmig ta lahuk puhu. Inggik pireneg angge lahu ane men atamtam lahu ane men hikit teg laruhu fug.

³⁰Lahumu ap seliyon hubula fil werehon arimanowen at men tog abuhuk ulug kou fam lahalug saho ahik ahum keyen wamuhup. Wamuhup urukmu hol hahureg Siria inap onowe inowen ahako roho turuk ane eleg aruhumu akolen suhuloho ibam lahu. Lahureg ahummu het-pet toho Allah Wene mondabi siyaha fusuhuk ulug Wene embeselug larusa inaben indi kahaltuk ane hikit toho turuk laruhu.

³¹Ari roho turuk lit Siria inap onowe inowen otsi sehen senehon mon enebuhumu Allah ibam ine roho wirihon ino sangsanga feseruk lit amben mondabi siyag perukon eke imbik kuhupteg likiya hupmu Allah olohotma hubu lahaptuk ane elehap tuhup.

³²Elehap tuhupmu Siria inap onowe inowen Allah umalikisi unubabut piren toho werehon inindi kahal enesug laruhumu Inikni Allah umbusuhup angge famen Allah fam tem toho wenggel harukon arimano inindi wirik toho wereg lit Siria inap onowe ele holtuk lamuhup fug.

³³Ap inindi anggat tehonen ap anggolo milal eneptuk lamuhup angge famen winon tog elman unusuhup, winon indokma yal enebuhup, winon ininggik hele wat enebuhup, winon enenggengge yoholiyangge hilahup. Ari roho unubam turukmu amusun toho wereg lit asengseng haruk lamuhup.

³⁴Asengseng harukmu ap tor anggeyen let eneptuk lamuhup, ap winonen enembilik fam eneg hit hinibil amul uruk lamuhup.

³⁵It inindi anggat tehon winon unusuruk lamuhup. Unusuhup ane ari feneyen Allahn numalikisi unubabut hal amag ulug wal isaruk laruhu. Ari roho turukmen eneg Allahn imbibag ane roho obog aruhu sambil horog aruhu.

³⁶O Siria inap onowe ino indimu winik-wonog uruk lit aben nunumbasi ulug wel eneptuk angge arimano enemberimu an welahi ulug awelwel taruk laruhu. Ket-ker ane uruk lit Allah usangge obog toho enemberimu werehon ino abug uruk laruhu. Abug uruk lit inggarehen fano peruk ane hikit toho eneg turuk laruhu. Mun ane man ane tuhuk peruk ane teko lahu. Ari roho turukmen eneg Allahn olok toho turuk laruhu ane obog tuhu sambil horog aruhu. Allahn tu men ari men tuhuk ulug kong toho imbibahon tem toho turuk laruhu.

³⁷Ap suwon inowen umbasiyen tu Allah hag toho wereg ulug wel eneptuk latfag angge fam wenggel ha fug angge hiyaben nunumba ulug inindi rehon oho, aben ninikni ulug sembahyang urukon obog toho alpal isaruk lit an eneg palimu welahi ulug awelwel taruk laruhu.

³⁸Aben wel eneptuk angge obog toho unubalma umba elehet walinggoho senehon wel turuk laruhu. Ikni umban wel turuk latfag fuhon aren wel turuk lit umbagpag turuk angge emas perak men helep ili faya rurukon men fano-fano angge eke hag eke hag ubam emberuk laruhu.

³⁹O pumbuk elehet yaron huk toho kilabeg ambeg eke ilmig tamin puhu halug umba unuk uruk lit elehet pisan toho ilmig taruk laruhu. Ap san at umba ino hi ruruk lamuhubon arimano ap suwon inowen oho hi enepmin ulug ap anggolo onowesi roho welamuhuben lahap eneptuk lit kinang oho og isaruk laruhu.

⁴⁰Obog aruhu sambil horog aruhu halug o Mesir inap onowe inowen Siria inap onowe men tog abul ulug waruhu. Waruhumu Siria inap onowe ino otsi men ik fulugnu ruruk hag toho wilip atuk lit winon kereta wam kudan lisoho walug laruk angge fam, winon wam kuda fam, winon kou anggolo fam saho ahik ahum keyen lahupteg ik masag fimag-fimag miyaloho laruk hag toho kinang anggolo hondo ruruk lamuhup.

⁴¹Hondo ruruk lit Allahn umalikisi kinang fanoma og isibag ambeg oho kuhupteg ap teng-teng angge unusuhup. Unusuhup angge famen o Edom kinang men Moab kinang men Amon kinang minggiroho fanowon ino men siyaha fusuhup fug.

⁴²Kinang winon oho ilmig ta larukmen eneg Mesir inaben yanggal enebuk fug teg lamuhup.

⁴³Yanggal enebuk fug tehen Siria inap onowe inowen enenggengge emas perak men fano-fano angge winon o Mesir kinangma werehon men huhulangge hilahu. Hilahureg Libia inap men Etiopia inap men oho apmayap enebik lahu.

⁴⁴Apmayap enebuhureg hol harukmen ap seliyon ik eleruk filen, yali filen oho hat hangginangma kik wahasa urukmu hol hahureg yuk lagmag uruk lit indi inahanen it obog toho elehap enepmin ulug angginangma lahu.

⁴⁵Laruk lit saho ahik tulug Allah antom fanowon tulug honggolegma o sabo fanowon wiroho nohomin ulug turukmen war aruhumu ap misihen oho let tuhup fug,’ ulug hiyag nitisi,” ibag.