Read Angguruk Yali DANIEL 12 Bible Online

DANIEL 12 - Angguruk Yali bible

DANIEL 12

¹Allahn ot malaikat misig monde fibagma Daniel ambeg watfareg ubam ele uruk lit, ”Obog aruhu sambil horog atukmu Allah ot malaikat suwon hat hori Israel inap let eneptukon hun Mikhael ino inam aruhu. Inam aruhu li alem angginon indam oho yet haruk latfag fuhon itano li eneg ap unubam aruhu angge famen hori Israel inap sehelimuwon ununuk Allahn suwesingga fam haharoho forohowon eneg Aren windat enebuhu.

²Ap windat enebuhu sambil ino ap warehon anggolo nohoruk ambehen in amuhup. In amuhubon winon mondabi onoluk welamuhup, winon mondabi siyag atuk ambeg kuhupteg enekol toho eneg welamuhup.

³Ap inindi anggat teg inap arimano pohol umbagpag turuk hag toho enebe umbagpag turuk lit ap anggolo kalem fanowon lahuben hondog eneplug laruk inap arimano suhal ili rurukon hag toho mondabi welamuhup,” ulug ap inowen Daniel hiyag itfag.

⁴Nin eke hiyag utuk lit, ”Hat Danielen Allah wene haharoho emberikinon aru hiraho femihinteg obog aruhu sambil horog am fugmu aben kim hahup fug ulug enehangge embemihin. Ap anggolowen teko lahu ane fahet yat toho wenggel haruk lamuhup angge famen inindi anggar aruhu fug,” ulug ap inowen Daniel ubam hiyag itfag.

⁵Danielen nin ele uruk lit, ”Anden fulu roho yet harukmen ap piren ik fuma-fuma unduhukmu yet isarikik.

⁶Yet isarukmu it piren itano misihen malaikat sum sulumon wan teg lit iliko fil unduhuk latisiyon fam ele uruk lit, ’Noenam welamuhukmu alem aben misihim oho yet harusa fuhon arimano teko lahu?’ ulug kapal harisi.

⁷Kapal harisimu ap sum sulumon wan tehon inowen inggik pirenet pohol fil leho lit irisiyon tu, ’Allah mondabi welaruhuwon inowen holegma tem toho iminon tu holeg lamin: Alem arimano obog toho teko larukmen eneg mo hinahanman misig minggiroho lahu. Allah umalikisi asengseng haruk lamuhubon obog aruhumu alem arimano oho eleg aruhu,’ irisi.

⁸Ari irisiyon anden hol harikik angge famen nindi anggar atisi fugmu at ubam nele uruk lit, ’Nikni, obog aruhu sambil ari ke roho teko lahu?’ ulug kapal harikik.

⁹Kapal harikikmu aren hebeloho hiyag nutuk lit, ’Daniel namloho, ketiya lamihinteg anden ihi ane ari ap winon hiyag isa fug angge hundama hirako forohoman eneg obog aruhu sambil horog aruhu.

¹⁰Allahn ap anggolo unubabut wal isaruk laruhumu inindi puhun toho welamuhup angge famen ap unubabut siyahon arimano anden ihi ane fahet inindi anggar am fug angge Allahn nirim peruk ane eneg turuk lamuhup. Ap fuki roho wenggel harukon arimanowen eneg anden ihi ane ari fahet inindi anggar aruhu.

¹¹Likiya hupmu Allah olohotma hubu lahaptuk ane elehap turuk lit amben mondabi siyag perukon Allah ibam unduhuk fuhup sambilen tulug hup teng-teng angge 1.290 aruhu.

¹²Inindi wirik toho wereg lit nangno rurukmen eneg hup teng-teng angge 1.335 welamuhubon arimano enehiyeg toho welamuhup!

¹³Har oho hindi wirik toho weregman eneg war aruhun. War aruhunmu mun ane man ane obog aruhu sambil Allahn puhu ane hikit toho welaruhunen in aruhun,’ ulug hiyag nitisi,” ibag.