Read Angguruk Yali DANIEL 6 Bible Online

DANIEL 6 - Angguruk Yali bible

DANIEL 6

¹O Media ahun unuk te Darius ino indag tibag sali mo ilig am wirig am turukmen teng pirenman nubam hilag 62 atfagma ap suwon lahibag.

²Ap suwon lahibareg Darius inowen o pumbuk wal-wal seneg lamuhup ulug onowesi teng-teng angge 120 in enepfag.

³Onowesi in enepfahon arimano milal eneptukon ap hinahan lahap enepfag. It hinahan itano misig hun Daniel welatfag. Ap suwon yabuk anggolo ubam aruhu rohon ulug onowesi arimanowen alem weregma it hinahan itano unubam hiyag isaruk latfag.

⁴Ari roho weregma hime fanowonen let tirikim Daniel ino indi anggat teg lit yabuk fano roho turukmu onowesi arimano men milal eneptukon piren itano menen at nim ambi roho turuk latfag fug. Danielen yabuk fano roho warukmu ap suwonen yet hibareg kinang obog toho aren seneg laruhu peruk latfag.

⁵Ari peruk latfagma onowesi suwon arimano men milal eneptukon menen Daniel fahet yabuk fano roho turuk eleg ulug un ane ubam lombog tul peruk latfag angge famen Danielen likiya hupmu yabuk fano roho waruk lit siyag ane tibahon eleg latfagma alem misig oho hiyahibag fureg un ane lombohap tuk fug teg latfag.

⁶Lombohap tuk fug teg latfagma ap arimanowen enele sahaltuk lit, ”Alem misig oho hiyahake ha fug tehen we at Ikni Allah fam sembahyang uruk ane fam un ane lombohap tehe ha reg,” uruk latfag.

⁷Enele sahalfareg ap suwon-suwon arimanowen Daniel siyahap tuhuk peruk lit ap suwon Darius ambeg libareg at ubam enele uruk lit, ”Darius, hat ap suwon mondabi holuk welaruhun ulug hi haptuk lahe!

⁸Ap san pikalem misig fam hat ap suwon hubam nungge-nungge heng habuk fug angge iren tu Allah hag toho wereg perukon men ap amuwon men unubam eneg heng eneptuk halug ap ino mene singa onolokon wereg ambeg kiling elma hik isahup ulug kong toho umbuhun peruk lahe. Alem ari fahet nit hat hamingmingangge welaheyon obog toho, kinang ngi ninap, ap milal eneptuk ninap, hat let haptuk ninap, nit ap suwon-suwon hat hapma welaheyon arimanowen nenele sahaltukukteg hiyag hirik wahe.

⁹Ari fahet ninikni hat ap suwonen we an nubam eneg heng naptuk lamuhup ulug suwesingga eke wilibuhun. Suwesingga ino Media inap men Persia inap menen imbibahon hikit toho nin am fug angge weregma ap misihen oho peneloho hik isahup fug,” ulug hiyag itfag.

¹⁰Hiyag itfagma ap suwon Darius inowen suwesingga iren ibag ane hikit toho haharoho wilipfag.

¹¹Suwesingga ino haharoho imbibag ane Danielen hol hibareg at ibam libag. Hinawimu lahibareg o Yerusalem fil keyenteg fo regma hup misihim inggik hinahanam fam elenggen fam hur atuk lit wina sambil turuk latfag hag toho sembahyang uruk lit at Ikni Allah wel turuk latfag.

¹²Wel turukmu ap suwon-suwon arimanowen Daniel aluwat hul ulug ambeg libareg yet harukmen Daniel inowen Ikni Allah fam sembahyang uruk lit heng turukmu yet hibag.

¹³Yet hibareg ap suwon-suwon arimanowen Daniel fahet huruwe lul ulug ap suwon Darius ambeg libareg at ubam enele uruk lit, ”Ninikni, ap san pikalem misig fam an ap suwon nubam nungge-nungge heng nabuk fug angge iren tu Allah hag toho wereg perukon men ap amuwon men unubam heng eneptuk halug ap ino mene singa wereg ambeg kiling elma hik isahup ulug ninikni haren suwesingga haharoho wiliptikin fug?” ulug kapal hibag. Kapal hibagma ap suwon inowen it unubam hebeloho hiyag isaruk lit, ”Alem ari Media inap men Persia inap menen imbibahon hikit toho anden haharoho emberikikon ari ap misihen oho peneloho hik isahup fug,” ibag.

¹⁴Ibagma iren te, ”Hun Daniel Yehuda inap famen ininggik lisoho imbisik watfahon arimano sehelimuwon inowen nikni hat suwon ambolmayap haptuk lit suwesingga haren emberikinon ino sobir isalug hup misihim inggik hinahanam fam Allah aren tohon fam sembahyang uruk,” ulug hiyag itfag.

¹⁵Hiyag itfagma hol hibareg ap suwon ino indi anggin atfagma nangginoho Daniel ahap siye rimin ulug wenggeltukmen mo ubuk ibag.

¹⁶Mo ubuk ibagma ap suwon-suwon arimano nin eke ap suwon olohotma watfareg at ubam, ”Hat ap suwon, Media inap men Persia inap menen imbibahon hikit toho haren suwesingga haharoho emberuk lahenon misig oho aben apmayap tuk fug teg ane holuk toho welamin!” ulug hiyag itfag.

¹⁷Iren ibag ane hol hibareg ap suwonen Daniel wak lalihipteg mene singa wereg ambeg hik isalihip ulug otsi hiyag isibag ane hikit toho Daniel ino hik isa libag. Hik isa libagma itano ap suwon inowen Daniel fam ele uruk lit, ”Nare, Hikni Allah likiya hupmu ubam wel turuk lahenon inowen hat windat hapmisi,” ibag.

¹⁸Ibagma otsiyen helep misig wak libareg kiling ambilikmu lare fisibag. Lare fisibagma ap suwon men ori winon menen helep ino palimu enehangge ininggik tum imbibag. Enehangge imbibahon ino ap misihen oho Daniel ibil atuk lit lisoho wilibuhup fug ulug siyengge imbibag.

¹⁹Siyengge embelug ap suwon ino ibam libareg hup ino sambil suburu na fug angge welatfag. Ap indi seyap turuk inap oho wol enepfag fureg nohibag fug.

²⁰Nohuk fug angge weregman eneg o sakan tirikim itano ap suwon ino in atfareg pupu angge mene singa wereg ambeg kiling ambilikmu ino libag.

²¹Kiling ambilik horogma libareg ele akol nim-nim Daniel ubam uruk lit, ”Daniel nare, Allah oluk werehon amingmingangge wereg lit haren likiya hupmu wel turuk lahenon inowen let habehekma mene singa arimanowen huwarehesa fug ano?” ulug umung hibag.

²²Umung hibagma Daniel inowen ele uruk lit, ”Nikni, hat ap suwon mondabi holuk welaruhun ulug hi haptuk lahi!

²³Nikni Allah inowen ot malaikat eke monde fehekma wahareg mene singa onolokon enembilik lar enebehekma an nuwarehesa fug. Anden Nikni Allah olohotma siyag ane tuk fug angge hat ap suwon hubam oho siyag ane turuk latikik fugmu Allahn an fahet oluk toho wereg lit windat nabehek,” ibag.

²⁴Danielen ari roho hiyag itfagma hol hibareg ap suwon inowen ahiyeg anggolo hibareg Daniel kiling elman lisoho wilibig maniyek ulug otsi hiyag isibag. Hiyag isibagma Daniel ino kiling elman lisoho ilanma imbik lahibareg ebe kim harukmen ubam yowil misig oho welatfag fug. Danielen Allah fam we tem toho wenggel haruk latfagma Allahn let tibag.

²⁵Allahn let tibagma yet hibareg ap suwon inowen hun Daniel wabuhuk ulug huruwe waharusa inap arimano og enebik lalihipteg mene singa wereg ambeg kiling elma hik isahup ulug otsi hiyag isibag. Hiyag isibagma ap arimano unuhesi maliket kiling elma pilap eneptukmu uwan kinangma wambuk fugmu mene singa arimanowen koloman sen enepfareg unuwag lilibug heheg lahap eneptuk latfag.

²⁶Ari roho tibagma ap suwon Darius inowen o pumbuk obog toho, ununggul unuk wal-wal werehon, enele enemu-enemu urukon kinang atogman atogma werehon obog toho unubahet suwesingga emberuk lit, ”Likiya hupmu henehiyeg toho welamuhup ulug hi heneptuk lahi.

²⁷O pumbuk anden sen henesug lahiyon obog tohowen Daniel Ikni Allah fahet hinindi henekol toho wereg lit wel turuk lamuhup ulug hiyag hisaruk lahi. We At eneg war am fug angge mondabi oluk welaruhu. Aren kinang ine roho seneg lit ap fet enesuhon eleg aruhu fug.

²⁸Aren eneg siyahon inggikmuwen ap teloho let eneptuk lit poholma oho kinangma oho enehangge aben wel turuk ane turuk. At inowen hun Daniel ino mene singa eneyegman windatisi,” ulug suwesingga haharoho imbibag.

²⁹Hun Daniel ino palimu weregman eneg ap suwon Darius ino war atfagma ubalmangge o Persia ahun Kores ino ap suwon lahibag li oho Daniel palimu welatfag.