Read Angguruk Yali DANIEL 7 Bible Online

DANIEL 7 - Angguruk Yali bible

DANIEL 7

¹Hun Belsyazar o Babilonia inap inikni lahapfahon mo ino fam Daniel ino nohoruk lit nei fam fulu roho yet hibag ane ino at inggarehen haharoho imbibahon te tu,

²”Anden hubanggo nei fam yet harukmen siyelu yali filen, hubula filen, ik eleruk filen, ik ambut filen waharuk lit ik humon fam haglabut watukmu yet harikik.

³Anden yet harukmen wam hag angge humon uhan onoruk amu-amu rohon ik humon famen wilip atusa.

⁴Wilip atuson arimano tamon te mene singa famen suwe kut aherabul hagma yet harikik. Anden yet harukmen ap ekeyen aherabul heneko embeserisireg kinangma unduhuk ferisimu uyug piren fam ap hag toho unduhuk lit ubabut oho ap hag atisi.

⁵Wilip atuson arimano pirenehon beruang wam eli olokon hahon inam atisi. Beruang ino inggik hek toho unduhuk lit ibal uwag hinahan ayehen saluk teg lit weregma ap enele ubam uruk lit, ’Nare, unu anggolo roho namihinmu hahum ouk amag!’ ulug hiyag utusa.

⁶Nin eke anden yet harukmen wilip atuson arimano hinahanehon macan tutul olomene olok anggolowon hahon weregma yet harikik. Macan tutul ino ambolma suwe aherabul uhan wilibigmu unggul uhan weregma ap ekeyen ine roho welamag ulug ine og itisi.

⁷Nin eke anden yet harukmen ik humon famen wilip atuson arimano uhanehon ino mondabi ine roho wereg lit olok anggolowen ap obog toho enekolap eneptukmu yet harikik. Uhanehon ino ayeg humon besi famon wilibig lit mun angge man angge lilibug heheg mag-mag pil isalug winon uyuhen sobit-sabar isaruk latisi. Andimbuk numen teg lit ebe oho it tamon hinahan itano men ambi reg latisi fug.

⁸Andimbuk itano anden kim harukmen sehelimu toron eke wilibigmu andimbuk tam welatuson enesehelimuwon hinahan heneko wamburusa. Andimbuk toron wilip atisiyon ino fam ap inil hag teg lit ambilik fam ele hemet toho urukmu yet harikik.”

⁹”Nin eke anden yet harukmen ap suwon hur atuk angge anggolo unduhuk ferusama Ap amusun toho werehon ino asum yanggowon hina hahon wan teg lit oruk te wam domba oruk hahon fanowon hur arik waharisi. At hur atuk angge la rehon ino indok hag toho weregma uyug laruk angge roda oho indok ambulpul turukon hag toho welatisi.

¹⁰Ap amusun toho werehon ino heriyeg ambehen indok ambulpul ik laruk hag tohon wilip atug larukmu amingmingangge teng-teng angge teng num fiman let turukmu nin winon teng obog sehelet obog aben winag isa fug tohon At olohotma unduhuk latusa. Ari roho weregma alem kong turuk inap arimano hur arik waharusama aben turuk ane fahet haharehon imbik waharusa.

¹¹Nin eke anden yet harukmen andimbuk toron inowen ele hemet toho eneg urukmu kim harikik. Anden kim harukmen wam hag angge olok anggolowon ino ware feserusareg ebe siyaha feselug indok ambulpul turukon fam hik isarusa.

¹²Hik isarusama wam hag angge winonen inine roho turuk latuson oho eleg atisimu onoluk welamuhup ane hili noenam welamuhup ulug winako emberusa.

¹³Anden nin eke hubanggo fulu roho yet harukmen ap kinangmon hahon eke o hinan hililip toho pohol keyen waharukmu yet harikik. Ap hahon ino Ap amusun toho werehon ambeg waharisimu At olohotma hondoholug waharusa.

¹⁴Hondoholug waharusama hat hine roho wereg lit ap fet enesug laruhun ulug ap kinangmon hahon ino palimuwap turusama o pumbuk obog toho, ununggul unuk wal taneg werehon, enele enemu-enemu urukon arimanowen wel turukmu yet isarikik. Ap kinangmon hahon ino ine eleg am fug angge mondabi welaruhu, kinang ngi roho senehon fobik oho eleg aruhu fug.”

¹⁵”An Danielen fulu roho yet harikik ane fahet nindi fituk lit nakol toho welatikik.

¹⁶Nakol toho wereg lit ap lumu unduhuk latuson arimano sehelimuwon misig ambeg larikikteg yet harikik ane fahet alem tu ulug seleg toho hiyag nimin ulug heng tirikik. Heng tirikikmu aren yet harikik ane fahet hiyag nutuk lit,

¹⁷’Wam humon hag angge enebe uhan yet esehenon itano ap suwon uhan kinangman wilip atug in amuhubon fahet yet esehen.

¹⁸In amuhupmu Allah palimu werehon umalikisiyen kinang ngi roho welamuhup ulug lahap enebuhupmu iren kinang ngi regman eneg mondabi welamuhup,’ ulug ap inowen hiyag nitisi.

¹⁹Hiyag nitisimu wam hag angge uhanehon fahet seleg toho hiyag nimin ulug heng tirikik. Wam hag angge uhanehon ino winon itano men ambi reg elehon olok anggolo roho wereg lit ayeg besi famon men inggik ahap tembaga ineyon famon wilibig lit mun angge man angge lilibug heheg mag-mag pil isalug winon uyuhen sobit-sabar isaruk latisi.

²⁰Andimbuk unggulmu numen wilibigmu andimbuk toron il ubam weregma ambiliken ele hemet toho urukon ino wilip atukmu andimbuk tam welatuson enesehelimuwon hinahan heneko wamburusa. Andimbuk ket wilip atisiyon ino ine reg lit winon men ambi reg elegma yet harikik.

²¹Anden yet harukmen andimbuk inowen Allah umalikisi unusuhuk ulug tog aptuk lit apmayap eneptisi.

²²Apmayap eneptisimu Ap amusun toho werehon ino waharisireg Allah palimu werehon umalikisi apmayap eneptisiyon arimano alem unubam werehon haltuk lit fanowap eneptisi. Kinang ngi roho welamuhup ulug palimuwap eneptuk sambil obog atisimu yet harikik.

²³Yet harikikon fahet kapal harikikmu ap inowen hiyag nutuk lit, ’Wam hag angge uhanehon ari re ap suwon uhanehon kinangma in amuhubon arimano fahet yet hehen. Ap suwon arimano kinang ngi reg inap it winon men ambi roho wereg eleg lit ap obog toho kinangma werehon mag-mag naruk lit unuyuhen sobit-sabar isaruk lit lilibug heheg lahap eneptuk lamuhup.

²⁴Andimbuk numen itano ap suwon uhanehon in amuhubon arimano fahet yet hehen. It enebe numen itano onombolim ap misig eke in aruhu. Ap ino ubabut ap suwon atam welatfahon arimano men ambi roho welam fug angge ap suwon arimano sehelimuwon hinahan apmayap enebuhu.

²⁵Ari roho turuk lit aren Allah palimu werehon ino abug uruk lit umalikisi oho unusimin ulug mug eneplug laruk laruhu. Allah wel turuk sambil eleg amag ulug hiyag isaruk lit ap komo eneptuk ane haharoho imbibahon oho peneloho hik isaruk laruhu. Ari roho eneg turukmu Allah umalikisi at inggikmu weregman eneg mo hinahan hunduko misig minggiroho lahu.

²⁶Lahumu alem kong turuk inap luhal arik waharuk lit ap suwon olokon inowen kinang ngi roho senehon elehap tuhupteg ebe ware feselug mondabi siyaha fusuhup.

²⁷Siyaha fusuhupteg ap suwon arimanowen kinang atogman atogma inine roho seneg ane ari hilahupteg Allah palimu werehon umalikisi arimano og isaruk lit hinine roho seneg lamuhup ulug palimuwap enebuhup. Kinang iren inine roho senegman eneg ap suwon obog toho it enemingmingangge amuhupteg iren uruk ane eneg turuk lamuhup,’ ulug ap inowen hiyag nitisi.

²⁸Anden nei fam yet harikik ane fahet ita obog toho imbihi. An Danielen anggolo wenggeltuk lit nindi angginen an norohole amu atisi. Anden yet harikikon fahet ap winon hiyag isa fug angge nindimuwen wenggeltukmen eneg ketiya oho welahi,” ulug haharoho imbibag.