Read Angguruk Yali DANIEL 8 Bible Online

DANIEL 8 - Angguruk Yali bible

DANIEL 8

¹Danielen ele uruk lit, ”Hun Belsyazar o Babilonia inap inikni laharisi sambilen mo ilig am wirig am turukmen hinahan atisimu ninggik pireneg angge fulu roho yet harikikon tu:

²Anden yet harukmen o Elam kinangma o pumbuk suwon elehet yaron walinggoho ohowon Susan ik Ulai ayegma an weregma

³wam domba yuhambukon eke ik ino horogma unduhuk latisi. Wam ino andimbuk piren famen pirenehon ket eneg wilip atisireg we tot yat toho laharisiyon ino men tam wilip atisiyon men ambi reg latisi fug.

⁴Ari regma anden yet harukmen wam inowen andimbuk fam ap unusimin ulug unggul hubula fil tubuk, ik eleruk fil tubuk, ik ambut fil tubuk turuk latisi. Ari roho turukmu wam eliyen oho apmayap tuk fug teg latisi, mene olokonen oho windat ta fug teg latisi. Wam ino indimuwen wenggel haruk ane hikit toho turukmen eneg ine anggolo atisi.

⁵Ari roho turukmu yet harikikon fahet wenggel harukmen wam kambing yuhambukon eke hubula filen waharuk lit uyug kinangma sobuk fug angge ototongge waharisi. Wam ino il piren honggolegman andimbuk suwon misig wilibig latisi.

⁶Wam ino wam domba tam yet harikikon ik ayegma unduhukmu larisireg undama ahe laharukmu ware fesemin ulug olok toho turuk lit andimbuk piren itano sokup toho siyaha feserisi. Siyaha feserisimu wam domba ino ine eleg atuken wam kambing inowen kinangma hik isa wambirisireg uyuhen sobir isarukmu ap misihen oho windarik waharisi fug.

⁸Wam kambing ino ine anggolo atisireg weregman andimbuk suwon ino pip heneko larisimu ubalma andimbuk uhan nik ane roho wilip atuk lit misig yali fil, eke hubula fil, eke ik eleruk fil, eke ik ambut fil unug haruk latisi.

⁹Andimbuk misig famen asimit eke wilip atisireg fobik ine anggolo atuk lit ik ambut fil, yali fil, kinang fanowon Allahn umalikisi og isibahon fil oho unug harisi.

¹⁰Ine atisireg suhal wereg ambeg poholma lahalug suhal winon kinangma hik isa wambirisireg uyuhen sobir isarisi.

¹¹Suhal milal eneptuk ahun suwon iraham laharisireg At fahet likiya hupmu hubu lahaptuk ane elehap turuk lit ibam mondabi fanowon ino siyahap tirisi.

¹²Likiya hupmu hubu lahaptuk ane elehap tirisireg Allahn fano perukon apmayap turuk lit windal-wandal isarisi. Sembahyang uruk ane ninap turuk lit wene unon hiyag isarukon ineyap tirisi. Indimuwen tuhuk perukon obog toho teko laruk latisi.

¹³Ari turukmu yet harikikteg anden hol harukmen Allah amingmingangge ekeyen eke fam ele uruk lit, ’Ari roho turukmu fulu roho yet hehekon ari noenam welamuhukmu obog aruhu? Likiya hupmu hubu lahaptuk ane elehap tirisireg ubalma amben mondabi siyahon turuk ane ari nosambil eleg aruhu? Allah ibam men it poholma inine roho werehon men uyuhen sobir-sabar isarukon ino nosambil umbusuhu?’ ulug kapal harisi.

¹⁴Kapal harisimu Allah amingmingangge pirenehon inowen hiyag utuk lit, ’Likiya hupmu hubu lahabuk fug angge weregman eneg hup teng-teng angge 2.300 aruhumu Allah ibamen turuk ane nin hebeloho hale fuhup,’ irisi.

¹⁵Ari urukmu hol haruk lit fulu roho yet harikikon fahet wenggel harukmen ap hag angge eke an nolohotma unduhukmu yet harikik.

¹⁶Yet harikikteg hol harukmen ap ekeyen ik Ulai palimuwen ele hi roho uruk lit, ’Gabriel nare, hun aruwen fulu roho yet hehek ane ari fahet indimu selehap tin,’ irisi.

¹⁷Irisimu Gabriel ino an weregma waharukmu nakolen fuk toho kinangma ying atikik. Ying atikikmu Gabriel inowen an nubam ele uruk lit, ’Hat ap kinangmon, haren fulu roho yet hehenon ino obog aruhu li fahet yet hehen,’ ulug hiyag nitisi.

¹⁸Hiyag nutukmu itano an nil fulug teg lit kinangma yinggigmen Gabriel inowen an ninggik lisoho unduhuk nubaharisi.

¹⁹Unduhuk nubaharisireg hiyag nutuk lit, ’Allahn mun ane man ane obog aruhuwon fahet imbibahon yet hehen. Ari fahet Allahn olok toho tuhuwon obog aruhu li fahet hiyag hitmin.

²⁰Wam domba yuhambukon andimbuk piren itano o Media inap men Persia inap men onowesi wereg.

²¹Wam kambing oruk yaron ino o Yunani kinang fahet enehangge weregma andimbuk suwon il piren honggolegman wilibihon ino Yunani inap onowe suwon atamtam lahakuwon wereg.

²²Andimbuk suwon ino pin heneko larisimu ubalma andimbuk uhan nik ane roho wilip atuson itano ap suwon atamtam lahakuwon ubalma ap uhan in amuhubon fahet yet esehen. Ap uhan itano we tot inine elehen ap suwon atamtam lahakuwon men wirim teg lamuhup fug.

²³It uhan itanowen kinang seneg ane obog aruhu li horog tegma aben Allahn siyag perukon turukmen warukmen eneg mondabi hum aruhu halug ap suwon orohole hik teg lit ap enele ying eneptukon eke in aruhu.

²⁴At amuwen ine eleg lalep angge famen ap ekeyen ineyap turukmu ine anggolo reg laruhu. Ine reg lit indimuwen tuhuk peruk ane obog toho teberuk laruhu. Aben yet harusa fug ane teberuk lit mun angge man angge halog turuk lit ap inine roho werehonet Allah umalikisiyet siyahap enebuhu.

²⁵Indi anggat teg lit ap enele ying enepmin peruk ane obog toho teko laruk laruhu. An palimu welahi ulug indimu winik-wonog turuk lit ap anggolo enepeleg toho weregman unusuruk laruhu. Ari roho turuk lit ap suwon obog toho Inikni apmayap tuhuk ulug turukmen ap kinangmonen wabuk fugmen siyag aruhu.

²⁶Haren likiya hupmu hubu lahaptuk ane fahet yet hehenon ari tem toho yet hehen angge famen amusun toho welamuhupmu fulu roho yet hehen ane ari hikir aruhu angge re ap misig oho hiyag uruhun fug,’ ulug hiyag nitisi.

²⁷Ari ulug hiyag nitisimu an Daniel ino nine eleg atisimu hup-hup angge ouk waruk latikik. Ouk ino eleg atisimu nin hebeloho in atikikteg ap suwon iyabuk turuk latikik angge famen anden fulu roho yet harikikon fahet nindi anggin toho welatikik.