Read Angguruk Yali DANIEL 9 Bible Online

DANIEL 9 - Angguruk Yali bible

DANIEL 9

¹Danielen ele uruk lit, ”Media inaben ondohowon hun Ahasweros amloho Darius ino Babilonia inap fet enesug laruhun ulug ap suwon lahapfahon mo ino fam

²an, Danielen Allah wene haharehon winag harukmen NINIKNI Allahn hun Yeremia fam hiyag itfahon tu, ’O Yerusalem halog toho weregman eneg mo ilig am wirig am turukmu teng hinahan 70 aruhu,’ ibag ane ari fahet wenggeltuk latikik.

³Wenggeltuk lit NINIKNI Allah olohotma siyag ane turukukon ino nenembiken turukuk ulug suburu na fug angge fesi lahaboho NINIKNI Allah ubam sembahyang fam heng timin ulug At wereg ambeg lahap haruk lit, ’Nikni Allah, Hat suwon fahet nenekol toho wel Haptuk laheyon inowen sali imbinahon hikit toho ap Hat inindi Hasug lit Hele holtuk inap Haren oho Hindi enesug lahenma hi Haptuk lahi.

⁵Niren Allah eleg ulug siyag ane eneg turuk lit Hele ying Haptuk latukuk, Hat hele sobir isaruk lit Haren peruk ane roho turuk latukuk fug.

⁶Hat hamingmingangge nabi arimanowen Hat hunuk fam nunumbasi men niniknisi ap suwon men nonowesi men nit Israel ninap obog toho nunubam enele urukmu holtuk latukuk fug.

⁷NIKNI Allah, we Haren eneg fano ane turuk lahen angge famen niren indam angge ketiya oho siyag ane eneg turuk lit nininggali roho welahe. Nit Yehuda ninap men o pumbuk suwon Yerusalem welaheyon men Israel ninap obog toho horogma welaheyonet yatma welaheyonet arimanowen Hat nenembol yig Hutusama Haren o ekema-ekema hik nisarikinon arimano obog toho siyag ninap welahe.

⁸NIKNI Allah, nunumbasi men niniknisi nonowesi fet nenesuhon men nit obog tohowen Hat hele apmaya feserukukteg nininggali roho welahe.

⁹Haren nit Hindi nisaruk lit niren siyag ane turukon Hambolmayap turuk lahenon nonoluk atisi angge famen niren Hele ying Haptuk latukuk.

¹⁰Hat hamingmingangge nabi arimanowen Allahn Israel inap komo enepfag ane haharoho imbibahon hikit toho welamuhup ulug Hawene hiyag nisaruk latusa angge famen niren Hat hele embeseruk latukuk.

¹¹Nit Israel ninap obog tohowen Hat hele embeseruk lit Hawene haharoho imbibahon hikit toho turuk latukuk fug. Niren Hat hindi siyahap Haptuk latukukmu alem angginon it unubam umbuhuk ulug Haren sali imbinagma Hamingmingangge Musan hahatfahon ino hikit toho nit nunubam atisi.

¹²Haren nit niniknisi fet nenesuhon men nunubahet sali imbinag ane hikit toho alem angginon nunubam emberuk lit o Yerusalem halog toho siyahap tirikin. Ari hag toho o winama kinang atogman atogma werehon unubam atisimu yet harukuk fug.

¹³Musan haharoho imbibahon hikit toho nunubam atisi angge famen niren sali imbinahon we tem ulug wenggel ha fug angge siyag ane turuk latukukon nenembol fil umbusuk fug angge NINIKNI Allah Hindi nisimin ulug Hat hambeg hebeloho waharukuk fug.

¹⁴Hat hambeg wam fug angge wereg lit Hele holtuk latukuk fugmu Allah Haren alem angginon unubam umbuhuk perikin ane roho nunubam atisi. NIKNI Allah, Haren fanowon siyahon turuk lahenon obog toho alem werehon hikit toho turuk lahen.

¹⁵Hat hinggik ineyonen Humalikisi o Mesiren og eneplug wilip atukmu Hat hunuk palimu atfahon ketiya oho welahen angge famen niren Allah eleg ulug Hat holohotma siyag ane eneg turuk latukuk.

¹⁶O Yerusalem Hat wel Haptuk ibam punumu wereg ambeg fahet Hundama siyag atisimu Holok toho nunubam turuk latikin angge famen Allah Haren indam Hindi nenesug latikin hag toho ketiya oho Hindi nisimin. Nit men nunumbasi menen siyag ane turuk latukukmu ap nit walinggoho werehon arimanowen Hat humalikisi o Yerusalem ninap welaheyon sabelepma windal neneptuk.

¹⁷Ari fahet an Hat hamingminganggeyen sembahyang fam heng Haptuk lahiyon Nikni Allah Haren hol hamihinteg Hat hibam welatisi ambeg siyag atisiyon aru fano aruhuwen Haren mo ahilhil hahon pilabik waruhunmu aben Allah tem toho wereg peruk lamuhup.

¹⁸Nikni Allah, Hisanggo holeg lit Hil ili roho wereg lit pumbuk Allah ngi reg ambeg ulug suwaleg latusa ambeg siyag atisimu nit ninilaheg toho welaheyon yet nisamihin. Nit fano ane turuk ninap ulug Hat hubam sembahyang uruk lahi fug, Haren hindi anggolo nenesug lahen ane an noluk teg lit heng Haptuk lahi.

¹⁹NIKNI Allah, anden uruk lahiyon ari holeg lamin! NIKNI Allah, siyag ane turuk latukukon elehap timihin! NIKNI Allah, nit asengseng toho welaheyon yet nisamihin! O pumbuk Yerusalem men nit nenebe welaheyon men Haren tohon welahe angge re aben Allah we tem toho wereg peruk lamuhuben folo-folo let nenepmihin!” ulug Danielen Allah fam sembahyang uruk latfag.

²⁰Danielen ele uruk lit, ”Anden sembahyang fam an nori Israel inap menen siyag ane turuk latukukon NINIKNI Allah fag toho hiyag utuk lit Allah ibam fahet oho At ubam heng uruk lit weregman

²¹hun Gabriel atam yet harikikon ino pohol keyen fililoho folo-folo nambeg waharisi. O hupmu aben Allah fahet hubu lahaptukmu nambeg waharisi.

²²Waharisireg an nubam hiyag nutuk lit, ’Daniel, an wahiyon Allahn Yeremia fam hiyag itfahon fahet hindi holukap hapmin ulug wahi.

²³Haren Allah fam heng turuk lit ak tehen ambehen obog toho uwan uk fugmu Allahn holehekteg indi anggolo hiyaruk lit ele ehek ane hiyag hitminen wahi. Allahn ele urukmu yet hihi ane ari hiyag hitminen fuki roho holeg lamin!

²⁴Mo ilig am wirig am turukmen teng-teng angge 490 lahumu Allah eleg ulug enembol yig utuk lit siyag ane eneg turukon Allahn elehap tuhu. Elehap tuhu sambil ino hat hori Israel inap men o Yerusalem Allahn mumaltisi ambeg werehon men fano amuhup. Fano amuhup li itano alem wereg halug fano roho haltukon ak tuhu sambil inowen tulug fobik oho mondabi fano welaruhu. Weregma Allah amingmingangge nabi arimanowen sali emberuk latfahonet fulu roho yet haruk latfahonet hikit toho teko lahumu Allah ibam siyag atisiyon ino oho nin suhuloho Allah wel turuk ambeg aruhu.

²⁵Holuk toho welatmihinen iminon tu holeg lamin: Allahn o Yerusalem nin wiri fuhup ulug Yeremia hiyag itfag sambil ak turuk lit mo ilig am wirig am turukmen teng piren 49 lahumu ap suwon Allahn mumaluhuwon eke waruhu. Waruhureg o Yerusalem ap laruk ke funggalem yaho feruk lit o wiri feruk lit walinggoho elehet oho fuhu angge famen o witukmu alem siyahon anggolo unubam atukmen eneg mo teng-teng angge 434 lahu.

²⁶Mo teng-teng angge lahumu itano ap Allahn monde fuhuwon ino alem ubam elegman ware fusuhup. Ware fusuhupmu ap suwon ine werehon eke amingmingangge sehen seneg inap arimano Yerusalem inap unusul ulug wamuhupteg o Yerusalem men Allah ibam men halog toho siyaha fusuhup. Obog aruhu sambil ino horog aruhumu ik humon waharuk lit mun angge man angge siyahap turuk hag toho Allahn pibag ane roho aben tog aptukmen mun ane man ane mondabi siyag aruhu.

²⁷Ap suwon waruhuwon inowen ap o pumbuk anggolo werehon unubam, ’An men mangno roho welamuhup,’ ulug hiyag isaruk laruhumu mo sabirenam mangno roho welamuhup. Mo hinahan lahumu pikalem falfalikon fam ap suwon inowen suburu wam men Allah fahet emberuk ane elehap tuhu. Elehap tuhureg ap suwon inowen Allah ibam unggama siyag angge mun angge man angge siyahap turukon eke imbik lahakureg weregman eneg Allahn pibag ane roho ap suwon ino siyag aruhu,’ ulug Gabrielen hiyag nitisi,” ibag.