Read Angguruk Yali HOSEA 1 Bible Online

HOSEA 1 - Angguruk Yali bible

HOSEA 1

¹Ap suwon Uzia, Yotam, Ahas, Hizkia men wal tanehen Yehuda inap fet enesugmu Yoas amloho Yerobeam inowen Israel inap fet enesug latfag li NINIKNI Allah ele hun Beeri amloho Hosea fam hiyag utuk latfahon suwesingga aru fam haharoho imbibag.

²NINIKNI Allahn Hosea feneyen Israel inap unubam ele uruk ane ak turuk lit Hosea ubam, ”Namloho, hiyap yaying turukon eke hilahunteg humalikisi indag eneptuk laruhunmu inisingan turuk hag toho iren oho yaying turuk lamuhup. Israel inap obog tohowen hiyap yaying turukon hag toho eneg turuk lit An Inikni Allah enembolmayap naptuk,” ulug hiyag itfag.

³Hiyag itfagma Hosea ino libareg hun Diblaim ahaloho unuk te Gomer hilibareg weregma hiyap ino malik fet talug latfareg malik ap angge indag itfag.

⁴Indag itfagma NINIKNI Allahn Hosea hiyag utuk lit, ”Malik aru unuk te Yizreel suwalmihin. Unuk suwalmihinon hikit toho il misig welamuhupmu hun Yehu o Yizreel tonggoman[1] ap unusibareg ap suwon atfag ane fahet Anden Yehu ondohowonen ondohowon unubam alem angginon umbuhuk. Yehu ondohowonen ondohowon arimanowen Israel inap fet enesug lamuhup fug ulug umbusuhuk.

⁵O ari sambil Anden o Yizreel tonggoman Israel inap enesehen enentog angge fala rebesuhukmu inine eleg amuhup,” ibag.

⁶Ibagma welatfareg hiyap ino malik eke fet talug latfareg malik hiyap angge indag tibag. Indag tibagma NINIKNI Allahn Hosea fam ele uruk lit, ”Malik aru unuk te Lo-Ruhama[2] suwalmihin. Unuk suwalmihinon hikit toho Anden fobik Israel inap nindi enesug laruhuk fug. Iren siyag ane turukon oho we tem toho Anden elehap turuk laruhuk fug.

⁷We Yehuda inap eneg numalikisi ulug nindi enesug lit fanowap eneptuk laruhuk. An it INIKNIYEN fanowap eneptuk lit sehen karog tog aptuk angge men, wam kuda men, ap tog abul ulug wam kuda fam laharukon men arimano fam fanowap eneptuk laruhuk fug,” ibag.

⁸Ibareg weregma Lo-Ruhama ino su atfareg isinga ag imbisibagma hiyap ino malik eke fet talug latfareg ap umalik indag tibag.

⁹Indag tibagma NINIKNI Allahn Hosea ele hiyag utuk lit, ”Malik aru unuk Lo-Ami[3] suwalmihin. Unuk suwalmihinon hikit toho Anden te hit An numaliki fug, An hit Hinikni fug uruk lahi,” ibag.

¹⁰Fobik Israel inap anggolo ik yinggi mondeg hag toho weregma aben wirim toho winag ha fug teg lamuhup. Ketiya Allahn it unubam ele uruk lit, ”Hit An numaliki fug,” uruk angge famen nin fobik ele unubam uruk lit, ”An Allah noluk welahiyon numalikisi welahep,” ulug hiyag isahu.

¹¹Yehuda inap men Israel inap men hebeloho mangno amuhupteg it fet enesug ahun misig unduhuk fuhupteg kinang aru ngi roho seneg lamuhup. Allahn o Yizreel unuk[4] hikit toho su ane tuhu sambil ino fahet aben mondabi wenggel haruk lamuhup.