Read Angguruk Yali HOSEA 10 Bible Online

HOSEA 10 - Angguruk Yali bible

HOSEA 10

¹Israel inap arimano hele anggur anggen fano yihik ferukon hag toho welatusa. Anggen anggolo yihik feruk latuson hikit toho nunumba wereg urukon fahet hubu lahaptuk ambeg anggolo wituk latusa. Kinang fanoma wereg lit tung atuk ane hikit toho usa ahalep sebe roho wiri feruk latusa.

²Inindi handuhal teg ane fahet ketiya alem angginon unubam atuk. Hubu lahaptuk ambeg arimanowet usa ahalebet Allahn halog toho siyaha fusuhu.

³Siyaha fusuhumu Israel inaben it-it enele uruk lit, ”NINIKNI Allah ele holtuk latukuk fugmu alem angginon aru nunubam atuk. Nonowe suwon inowen windat neneplep angge famen onowe eleg inap hag toho welahereg ap suwon ekeyen nangginoho let neneplep?” uruk lamuhup.

⁴Iren sibiling-sibiling ane il, ap unubam enele si ane il, sali emberukon apmayap til noruk. Alem ap unubam werehon fano hal eneplep angge famen huwongge suburu fam are ruruk hag toho siyahap eneptuk.

⁵Wam sapi umalik tu Allah hag toho wereg ulug wirim turuk angge o Bet-Awen[14] werehon ino siyag aruhu ulug o Samaria inaben enekol haruk lit uba yatuk lamuhup. Wirim turuk angge umbagpag turukon ino foroho inaben enele hum toho ya nga irikim ap seliyon wamuhupteg yoholiyangge hilalug lahup.

⁶Hilalug lahupteg wam ino o Asyur inap onowe suwon og umuhup. Ari roho tuhupmu Israel inap arimano ininggarehen wenggel haruk ane hikit toho turuk latuson fahet ininggali haruk lamuhup.

⁷O pumbuk suwon Samaria ino halog toho oluna fusuhupteg Samaria inap onowe suwon ino e inggik ikma yale feseruk hag toho inggik lisoho walug lahup.

⁸Israel inaben Allah enembol yig utuk lit punu ke nunumbasi ulug wel eneptukon fahet hubu lahaptuk ambeg arimano siyaha fusuhupmu alog-alog anggeyen hondo reg laruhu. Ari roho turukmu yet hahupteg Israel inaben, ”Punu men tom menen kusoho hondo nenebiyek,” uruk lamuhup.

⁹ NINIKNI Allahn ele uruk lit, ”Israel inaben o Gibean Anden nirim peruk lahi ane tibag sambilen tulug ketiya oho An nele ying naptukmen eneg wereg. Ari fahet o Gibea inowen tog aptuk ane unubam aruhu.

¹⁰Anden alem angginon unubam emberuk lit inindi pikirap enebuhuk ulug kong toho emberikik. Emberikikon hikit toho ap o pumbuk ekeyon-ekeyon palu enebuhukteg Israel inaben siyag ane hum toho turuk latuson fahet ininggik hele wat enebuhuben mon enebuhuk.

¹¹Indam o Israel ino wam sapi tuhumon il sahuhonen ahiyeg toho yabuk warukon hag toho welatfag. Weregma An iraham laruk lit yet harukmen anduhun fano regma yet harik iyareg yabuk ine roho tukag ulug kinang hebeltuk angge lisoho walug larukon eke anduhunmu pug tibiyag. Pug tibiyareg Yehuda inowen kinang hebeltukmu Yakuben kinang tamultuk laruhu ulug wenggel harik iyag.

¹²Wenggel harik iyareg Anden hiyag isaruk lit, ’Yabuk keron wiri fiyok! Anden fano peruk lahiyon eneg yatuk lamuhup! Nindi henesug lit og hisaruk laruhukon yahaltuk lamuhup! An HINIKNI Allah yami naptuk li horog ahama mun angge man angge fanowon hunubam pilabik waruhuken nambeg wamuhup,” ulug hiyag isarik iyag angge famen

¹³hiren kinang tamuloho An Allahn nirim peruk lahiyon yaho felug siyag-siyag ane yahal taruk latikip. Henele si ane uruk latikibon ariyen anggen siyahon wilip atukmu naruk latikip. Nonotsi sehen senehonet kereta wam kudan lisoho walug laruk anggeyet anggolo werehen ap misihen oho apmayap nenebuk fug teg ulug wenggel harukmen

¹⁴ap seliyon hit Israel hinap hunusul ulug ngik-ngog til waharuk lit hinibam pumbuk elehet ineyon walinggoho ohowon obog toho pin halog toho oluna fusuhup. Hun Salman otsi menen o Bet-Arbel siyaha feseruk lit hiyabet maliket ununggul arap toho unusil larusa hag toho hir oho hunusik wamuhup.

¹⁵Hit Israel hinap nori, siyag ane hum toho til-wil noruk lahebon fahet ari hag toho hunubam teko lahu. Teko lahu sambil sakan turukmu honowe suwon ware fusuhup.