Read Angguruk Yali HOSEA 12 Bible Online

HOSEA 12 - Angguruk Yali bible

HOSEA 12

¹NINIKNI Allahn ele uruk lit, ”Israel inaben An nele ying nabul ulug enele si ane il laruk lit waling nasug. Yehuda inaben An Inikni Allah nebe usa fulu reg lit nindi wirik toho welahiyon numbahalug mulilik la mulilik wam turuk.

²Israel inaben homhomo senebuk fug teg angge famen siyelu ineyon senebul ulug muko laruk. Likiya hupmu un ane uruk lit onolok ane til noruk. Asyur inap men nininggik ahandip toho welamuhuk ulug sali emberuk lit Mesir inaben ninibil amag ulug e zaitun ahaluwe og isa laruk,” uruk.

³ NINIKNI Allahn Yehuda inap unubam suwahal imin peruk. Israel inaben siyag ane turuk lit un ke larukon fahet alem angginon unubam umbuhuk ulug wenggel haruk.

⁴Unumba Yakub ino isinga ahummu wereg lit owe miyaltuk latfareg kabinimu Allah men yik apfag.

⁵Allah amingmingangge malaikat eke men yik aptuk lit palimu atfag. Palimu atmin peruk lit uba nim-nim hindi niyimin ulug heng tibareg o Betel libagma Allah at ambeg watfareg ele hiyag itfag.

⁶NINIKNI Allah unuk pohol ha kinang ha seneg ahun suwalehon inowen Yakub ubam ele uruk lit,

⁷”An Hikni Allahn hat let haptukmu fobik o Betel tuma suhuloho waruhun. We haren An numbahuk fug angge Anden tuk teg ane fahet iyahon seneg lit nubam hindi wirik toho wenggel haruk laruhun,” ibag.

⁸NINIKNI Allahn ele uruk lit, ”Hit Israel hinap aruma ayeg waroho hilaruk inap unubabut siyahon hag toho welahep. Suburu sum toron fam fani rurukmu anggin eleg angge famen anggin teg ulug henele si uruk lit ap enele ying eneptuk lahep angge famen

⁹hiren henele uruk lit, ’Niren Allah olohotman siyag ane tuk fugmen nininggikmu anggolo atisimu tung ninap welahe,’ uruk lahep.

¹⁰Ari uruk lahep angge famen An HINIKNI Allah hit o Mesir kinangman hondog heneplug wilip atik iyahonen hit hinibamen yanggal henebik waruhukmu indam hunumbasi lekma larukmu enembeg waharik iyag li o sabo wiroho welatfag hag toho hir oho o sabo wiroho welamuhup.

¹¹Anden subangge roho namingmingangge nabi unubam nele uruk lit anggoloenam fulu ane fam hiyag isarik iyag. Ketiya oho Anden tuhuk peruk lahiyon numalikisi hiyag esemek ulug mon enebik waharuk lahi angge famen

¹²An numalikisiyen An nele holuk fug angge o Gilead inowen amben siyahon turusama alem angginon unubam atisi. Ari hag toho o Gilgal inowen nunumba wel tul ulug wam sapi waroho hubu lahaptuk ane fahet ap seliyonen hubu lahaptuk ambeg arimano halog tubusuhupmu aben yabuk wituk lit helep kilabe feseruk ambeg hag amuhup,” uruk.

¹³Israel inap unumba Yakub ino o Mesopotamia kinangma hirag arik libareg hiyap fahet ap eke amingmingangge atfareg yabuk wit utuk lit ambohom foroho latfag angge famen

¹⁴NINIKNI Allahn amingmingangge nabi eke feneyen Israel inap arimano o Mesir kinangman hondog eneplug wilip atfareg nabi ino feneyen umalikisi fet enesug latfag.

¹⁵Ari roho turuk latfag angge famen Israel inap arimanowen Inikni Allah enembol yig utuk lit indi mondabi siyahap turuk latusa. Siyahap turuk latusa ane ari fahet Aren oho ambol yig isaruk lit ayeg waroho unusuhu.