Read Angguruk Yali HOSEA 13 Bible Online

HOSEA 13 - Angguruk Yali bible

HOSEA 13

¹Indam Efraim inaben enele urukmu Israel inap ununggul unuk winonen hol isaruk lit enekolen unuwag elek-elek angge ruruk latfag angge famen fobik Efraim inaben Allahn siyag perukon turuk lit tu Allah hag toho wereg ulug Baal wel turuk latusa ane fahet warehon hag toho wereg.

²Ketiya oho iren siyag ane til-wil noruk lit inindimuwen wenggel haruk ane hikit toho perak ili rurukon fam tu Allah hag toho wereg ulug wel eneptuk angge laltuk. Ari hag toho turuk inap fahet aben enele uruk lit, ”Efraim inaben ap waroho hubu lahaptuk lit wam sapi nunumbasi wereg ulug laltuk angge mako pug toho hi eneptuk,” uruk.

³Ari fahet it arimano o hina hubet laharukon men hibilil folo-folo eleg atukon men inggila homhomowen walug larukon men hubu unggaman teng urukon ari hag toho welamuhup.

⁴NINIKNI Allahn Israel inap unubam ele uruk lit, ”Indam o Mesiren Anden fet henesugmen eneg ketiya oho An HINIKNI Allah welahi. An Allah hahon winon nit let neneptukon eke wereg eleg ulug honoluk toho welamek!

⁵Hit lekma kinang pilipili eneg wereg ambeg Anden fet henesug latikik angge famen

⁶hiren suburu anggolo roho naruk lit hit henehummu atuk latisimu ninine roho welahe peruk lit An henepeleg atisi.

⁷An henepeleg atisimu hit fahet An olomene olokonen pak namin ulug turuk hag toho henembeg waruhuk.

⁸Aben wam eli umalik senetukmu inisingan unusimin ulug mug eneplug waharuk hag toho An oho hit mug heneplug waharuk lit hit henemigmu wisal henebuhukteg olomeneyen naruk hag toho hit hum heheg hinaruk laruhuk. Wam eliyen senggel eneptuk hag toho senggel henebuhuk.

⁹Israel hinap Anden siyahap henebuhukmu san let henebuk teg?

¹⁰Hiren An nubam heng naptuk lit, ’Ap suwon let neneptukon men nonowesi fet nenesuhon men og nisimin,’ ulug heng naptuk latikipmu og hisaruk latikik angge famen ketiya it arimano kema wereg? Iren hit fanowap heneptuk lam teg? Hit honowesi obog tohowen let heneptuk lam fug teg!

¹¹Nundaman nolok toho wereg lit ap suwon hit fet henesuhon og hisaruk latikik angge famen nin siyag peruk lit ap suwon arimano lisoho embeseruk latikik.

¹²Israel hinaben siyag ane turuk lahebon het toho foroho lahi, hiren hare ane turuk lahebon winako emberuk lahi.

¹³Israel hinap fano honoluk welalep angge famen indag atuk ane fahet apeleg toho wereg umalik hag toho wereg lit fano honoluk welam fug teg lahep. Malik indag atukon horog atuk angge famen malik ino nin pig-pug atlug indag atuk eleg hag toho welahep.

¹⁴Hit ap warehon hag toho welahepma Anden windat henebuhuk fug. Ap war atuk ambehen Anden teloho wilip henebuhuk fug. Hat ap war atuk ambeg kilap eneptuk hahun, ap war atukon ouk alem kema fil wereg? Ouk ino wol turuk lit hayeg fam ap hak eneptuk lit unusuruk laruhun! Unusuruk laruhunmu Anden it nindi enesug laruhuk fug.

¹⁵Yabukmuwen anggen fano roho wilip atukon hag toho hit honori sehelimu welahep angge famen An HINIKNI Allahn siyelu lekman yali filen monde fik waruhukmu ik yenggeleg ambeg lilog atuk lit ik eleruk obog toho firig aruhumu henengge fanowon obog toho eleg laruhu.