Read Angguruk Yali HOSEA 14 Bible Online

HOSEA 14 - Angguruk Yali bible

HOSEA 14

¹Samaria inaben An Allah Inikni nele ying naptukon ari famen alem siyahon unubam atukmu tog elman unusuhup, malik fuwon ununggul arap toho unusuruk lit hiyap malik enehummu forohowon oho enehum pilang heheg lahap enebuhup,” ulug Allah ele Israel inap hiyag isaruk.

²Israel hinap nori, hiren siyag ane turuk lit pi roho mako wamburuk latikip angge re ketiya NINIKNI Allah ambeg hebeloho maniyek!

³Nenembiken turuk latukuk peruk lit NINIKNI Allah ambeg suhuloho waharuk lamuhup! Wamuhupteg At ubam hiyag utuk lit, ”Niren siyag ane turuk latukukon Haren elehap timihin ulug heng haptuk laheyon ari holeg lamin! Holtuk laruhun halug Hat eneg wel haptuk lamuhuk.

⁴Asyur inaben nit fanowap nenebuhup fug. Wam kuda fam lahalug tog abik laruk lahe ambohom aruman let nenebuhup fug. Nininggik fam wituk laheyon arimano fam, ’Tu Allah niren tohon hag toho wereg,’ ulug wirim turuk lamuhuk fug. Malik suwarehon ikni elehon hag toho werehon arimano Allah Haren hindi enesug lahen,” ulug Allah fam hiyag irik waharuk lamuhup.

⁵NINIKNI Allahn ele uruk lit, ”An numalikisiyen An enembol yig nutusa angge famen Anden it fahet inilaheg ulug nahiyeg toho suhuloho hondog eneplug waruhuk. Anden fobik nolok ane unubam tuhuk fug.

⁶An Israel inap unubam hibilil hag toho wambik waruhukmu it e owil fanowon fahaltukon hag toho welamuhup. E win umanggen kinangma wamburukon hag toho yag amuhupteg

⁷e inggik anggolo atug e sawe anggen anggolo urukon hag amuhup. E kimkim inggila amben fano ahen hag amuhup.

⁸It fobik An nambeg suhuloho wamuhupteg An napma sakoma wereg lit it arimano roti anggen kinangman fano roho wilip atukon hag toho welamuhup. Hele anggur anggen anggolo urukon hag toho anggen anggolo yihik feruk lit anggur ahaluwe tom Libanon fam werehon unuk hag toho it ununuk oho su amuhup.

⁹Israel inaben usangge let enebuk fug tehon hik isahup halug Anden iren heng nabuhup ane holtuk lit yet isaruk laruhuk. An aru e fanowon mondabi oluk werehon hag toho welahireg hiren anggen tahan talug naruk lamuhup,” ulug Allahn ele uruk.

¹⁰Ap san indi anggat toho werehon inowen eneg anden hiyag isaruk lahi ane obog toho indimu wenggel haruk laruhu. Ap san fuki roho kim harukon ino eneg oluk toho welaruhu. NINIKNI Allah wereg ambeg laruk ke pikiron weregma ap Allahn peruk ane hikit toho turukon arimano pikit larukmu Allah men seli roho wereg inap arimano pi roho mako wamburuk lamuhup.