Read Angguruk Yali HOSEA 2 Bible Online

HOSEA 2 - Angguruk Yali bible

HOSEA 2

¹Hiren honori unubam Allah umalikisi welahep ulug ununuk Ami[5] suwal enebuhup, henerekisi fahet oho Allahn indi henesug ulug ununuk Ruhama[6] suwal enebuhup.

²NINIKNI Allahn ele indit toho urukon tu, ”Numalikisi, hit hinisinga men suwahal uruk latihip! At an nuhe fug, An at ahun fug! An numbaharuk lit yaying turuk ane eleg amag ulug olohotma men amigmu men enehangge ilit toho werehon arimano puhun toho eleha fusuhu.

³Yaying turuk ane umbusuhu fug halug Anden asum nonggoloho hik isahukmu at indag atfag sambil welatfag hag toho abiye welaruhu rohon. Hiyap ino lekma lilog teg ambeg hag toho tubusuhukmu ik oboken war aruhu rohon.

⁴Hit at umalikisiyen oho yaying turuk lahebon fahet nindi henesug laruhuk fug.

⁵Hit hinisingan inggali eleg toho yaying eneg turuk lit malik ahummu atuk latisi. At ele uruk lit, ’Ap an nindimuwen mumalehon onombolim laminmu suburu roti men ik narukon men wam domba oruk men sum men e ahaluwe amben fanowon men ik anggur arimano obog toho og nutuk lamuhup,’ uruk latisi.

⁶Ari fahet we tem toho Anden alog angge fam at laruk abunggalem siye ruhukteg elehet oko kilabe fusuhukmu kebunggalem hiyahuk fug teg laruhu.

⁷Ap nindimuwen mumalehon mug eneplug lamin ulug laruk laruhu angge famen isahu fug. Ap arimano yami eneptuk laruhu angge famen hiyag eneptuk laruhu fug. Ari roho eneg turuk lit fobik at ele uruk lit, ’An nahun tamon ambeg suhuloho lamin. At men wereg lit fano roho welatikik angge famen ketiya siyag toho welahi,’ uhu.

⁸Roti anggen, ik anggur, e ahaluwe amben fanowon, fano-fano angge perak men ili ruruk angge emas ino men anggolo roho Anden og utuk latikikon at indi sohuwen apeleg toho wereg lit perak men emas men arimano fam ap hag angge Baal laltisireg numba ulug wel turuk.

⁹Ari fahet anggen wirik aruhumu paltuk li roti anggen men anggur anggen men og itikikon arimano Anden uwag oko hilahuk. Wam domba oruk men sum men ahap mapmu roho wan tehon arimano oho ninggiken lisoho wahuk.

¹⁰At asum hog tubusuhukmu ap indimuwen mumalehon onolohotma abiye welaruhumu ap misihen oho An ninggikmuwen taluk nabuhu fug.

¹¹Mo eke fam eke fam Allah olohotma seni esetukon men, pikalem keron ebenam atukmu tei watukon men, hundig-hundig o Sabat Allah wel turukon oho, nenehiyeg toho Allah olohotma welamul peruk sambil arimano obog toho Anden elehap tuhuk.

¹²Hiyap ariyen te, ’Ap nindimuwen mumalehon arimanowen hele anggur men, e ara men onggo hag toho og nutuk latusa,’ urukon ari fahet hele anggur yatuk ambeg men e ara yatuk ambeg men ohiyap fusuhukmu wam eli men olomene menen obog toho naruk lamuhup.

¹³Aren Baal arimano wel eneptuk sambil amben fano angge yaltuk lit isanggomangge men aliliyangge men wan tulug ap indimuwen mumalehon onombolim laruk lit An fahet apeleg atuk. Ari fahet alem angginon at ubam umbuhuk,” ulug NINIKNI Allahn ele uruk.

¹⁴NINIKNI Allahn nin eke ele uruk lit, ”Hiyap ariyen An fahet apeleg atisimu Anden we tem toho at indi oko anggenma hondoholug lahukteg nele fano roho ubam uruk lit indi ahiyehap tuhuk.

¹⁵Anggenman suhuloho waharuk lit anggur yabuk nin hebeloho hiyag uruhuk. Tonggo unuk Akhor Israel inap siyahap enepfag ambeg ino keyen kik wamuhukmu Akhor ino fobik fano amuhup ane fahet enehangge hag toho aruhu. At ebe tuhummu o Mesiren indi ahiyeg toho wilip atfag hag toho ari sambil oho ahiyeg toho An men ambiyeg lahuk.

¹⁶An men laruk lit aren An fahet numbasi men wirim teg eleg peruk lit An nunuk Baal ulug wol nabuk fug angge nahun ulug wol nabuhu,” ulug NINIKNI Allahn ele il laruk lit,

¹⁷”Baal ununuk hat hambilikmuwen uruk laruhun fug ulug Anden eleha fusuhukmu fobik oho ununuk uruk lamuhup fug.

¹⁸O ari tuhuk sambil ino wam eli, olomene onolokon men suwe pohol ke larukon men pisanggo kinang ke ahum fam hag til larukon menen hat siyahap habuk nowen Anden it unubam sali umbuhuk. Sehen men karog men tog aptuk angge arimano kinang tu famen Anden elehap tuhukmu hat hindi yuwag toho welaruhun.

¹⁹Anden hat og hasugmen eneg mondabi nuhe welaruhun. Anden hat hubam fano ane eneg turuk lit nindi roho fet hasug laruhuk.

²⁰Anden hat humbahuk fug angge fet hasugmen eneg An fahet we tik-tem toho NINIKNI Allah wereg ulug holuk aruhu.

²¹O ari sambil Israel inaben An nubam sembahyang uruk lamuhupmu Anden holuhukteg poholman osit pilabik waruhukmu kinangman roti anggen men anggur men e ahaluwe amben fanowon men wilip aruhu,” ulug NINIKNI Allahn ele il laruk lit,

²³”Hit An numalikisi An napma yuwag toho welamuhuben eiyangge yatuk hag toho kinang hiren tohon fam yag henebuhuk. Ketiya nindi henesug lahi fug ulug Lo-Ruhama suwal heneptuk lahi angge famen nin hebeloho nindi hisaruk laruhuk. Ketiya An numalikisi welahep fug ulug Lo-Ami suwal heneptuk lahi angge famen hit fahet An numalikisi uruk laruhukmu hiren oho An fahet Ninikni uruk lamuhup,” ulug Allahn ele uruk.