Read Angguruk Yali HOSEA 4 Bible Online

HOSEA 4 - Angguruk Yali bible

HOSEA 4

¹Hit Israel hinaben NINIKNI Allah ele holiyek! At inowen ap kinang tu fam werehon unubam alem weregma haloho embemin peruk. Aren te, ”Ap kinang tu fam werehonen An Allahn peruk lahi ane onoluk teg eleg lit enembilik fam tul uruk anggeyen turuk eleg, ap inindi enesug eleg.

²We ap huluwap enebil, enele si ane ap unubam il, ap unusil, yoholiyangge hilil, hiyap yarog enebil, ap enengge siyahap til laruk lit ap enemep hinang eneptuk.

³Ari roho eneg turuken kinang aru fobik lilog aruhumu ap enebe oho ouken siyag amuhup. Wam pak mene kinangma werehon oho suwe pohol ke larukon oho ikan tamahu ikma werehon oho mondabi war amuhup,” ulug Allahn ele uruk.

⁴NINIKNI Allah ele uruk lit, ”Hit An namingmingangge imam welahebonen ap winon fam alem umbuhup fug, ap winon komo enebuhup fug! Hit hininggareg hunubam alem werehen Anden komo yig hisaminon tu:

⁵Hit o unukoho famen pi roho mako wambuhupmu hubanggo wene hiyag isaruk inap nabi arimano oho hit men ambiyeg pi roho mako wambuhup. Hit hinisingasi oho Anden siyahap enebuhuk.

⁶Hiren An Allahn peruk lahi ane honoluk angge famen henembolmayap naptikipmu An numalikisi oho An Allah enepelehen siyag atuk. Ari fahet Anden oho hit An namingmingangge welamuhup fug ulug nambolmayap heneptuk lahi. An Allahn hiyag hisaruk ane hiren henepeleg atikipmu Anden oho hit hunumalikisi napeleg aruhu.

⁷Hit henebe anggolo atuk lit siyag ane oho anggolo roho hiren An nubam turuk lahep. Ari fahet tam aben hit hi heneptuk latusa ane ino Anden hebeluhukmu fobik hit apmayap heneptuk lamuhup.

⁸Israel inaben siyag ane tulug Allah fahet emberukon hit naruk lit iren hare ane eneg turuk lamag peruk lahep.

⁹An numalikisi siyag amuhup hag toho hit imam oho siyag amuhup. Un ke laruk lahep ane ari fahet Anden alem angginon hunubam umbuhuk. Hiren siyag ane turuk lahep ane ari Anden hit hunubam wirim tuhuk.

¹⁰Allah fahet emberukon naruk lamuhup angge famen henehummu atuk laruhu fug. An numbahalug nunumbasi ulug wel eneptuk lahebon onombolim laruk lit yaying turuk lamuhup angge famen henebe anggolo amuhup fug. An HINIKNI Allah henembolmayap naptikipteg yaying turuk ane eneg senetuk lahep,” ulug Allah ele uruk.

¹¹NINIKNI Allahn Israel inap unubam ele uruk lit, ”Ik anggur ahaluwe ap inindi hareyap turukon miningon men keron men naruk lit fanowon wenggel ha fug angge sohu-sohu ane turuk lahep.

¹²Numalikisi, hiren nangginoho welamuhuk ulug e usa ahen fam kapal haruk lit wanggun tomuk hiren tohon inowen nungge ane hiyag nisahu peruk lahep. Hiren yaying turuk hiyaben turuk hag toho un ke laruk lit An Allah Hinikni numbahalug yaying turuk lahep.

¹³Win men mur men e fei alma sakoma fano welahe ulug Allah hag toho wereg peruk lahebon onolohotma punumu wam esetuk lit konoman hubu lahaptuk lahep. Ari roho turuk lahebon ari famen hit heneholani yaying turukmu hiniyamalhomiyen oho ap inim anggen fil laruk angge famen

¹⁴Anden alem it unubam umbuhuk fug. Hiren An numbahalug henemu atuk lit Allah hag toho wereg ulug wel eneptuk ambeg lalug hiyap yaying turukon Allah hag toho wereg peruk lahebon enemingmingangge arimano men ambiyeg wereg lit wam waroho hubu lahaptuk lahep.[8] Hiren Allah hag toho wereg peruk lahebon fahet hubu lahaptuk lahepma honori Israel inap An Allah fahet enepeleg atuk lit mako wamburuk lamuhup.

¹⁵Hit Israel hinaben yaying turuk lahebon ari hag toho Yehuda inaben oho hit honombolim mug heneplug lahup tohon! O Gilgal men o Bet-Awen men lalug[9] Allah hag toho wereg peruk lahebon wel eneptuk lit, ’NINIKNI Allah oluk werehon unuk fam tem toho uruk lahi,’ ulug henele si ane ik laruk lamuhup fug.

¹⁶Hit Israel hinap wam ulu larukonen holtuk eleg hag toho turuk lahepma ketiya nangginoho An HINIKNI Allahn hit wam domba hag toho kinang fanoma fet henesug laruhuk?

¹⁷Israel hinap usangge apma welahe peruk lahebon hunumbahakuk!

¹⁸Hiren ik olokon nalug nenek turuk lit yaying eneg til noruk lahep. Siyag atuk ane fahet henehiyeg toho wereg lit hit hununuk fano atuk ane fahet ninirim peruk lahep.

¹⁹Ari roho perukmu siyeluwen e inggila walug laruk hag toho Israel hinap linggik-longgo uruk lit hiren Allah hag toho wereg ulug wel eneptuk lahebon fahet hininggali hahup,” ulug Allah ele uruk.