Read Angguruk Yali HOSEA 5 Bible Online

HOSEA 5 - Angguruk Yali bible

HOSEA 5

¹NINIKNI Allah ele uruk lit, ”Hit An namingmingangge imam welahebon holeg lamek! Israel hinap oho hinindi anggat toho welamek! Hit ap suwon hunumalikisi men hinisanggo husoho welamek! Alem haloho emberuk ane hininggareg hininggikmu wereg angge famen Israel inap kuhup ulug o Mizpa inowen hiren sapna kahaltuk lit punu Tabor fam yebangge kilaptuk lit

²o Sitim tonggoma kinang habultug pangno folok turuk angge lahaptuk lahepma Anden hit obog toho hunubam alem angginon umbuhuk.

³Anden Israel hinap hisaruk lahi, An nolohotma hirako welahep fug. Hiren An numbahalug yaying turuk lahebon ariyen An nubam sembahyang uk fug teg lahep.

⁴Hiren siyag-siyag ane eneg turuk lit An Hinikni Allah ambeg hebeloho wahep ha fug teg. Henehiyehen yaying til noruk lit An HINIKNI Allah fahet henepeleg atisi,” ulug Allahn ele uruk.

⁵Israel hinap hininggarehen wel taruk lahebon ari famen hunubabut siyag werehon inam atuk. Siyag ane hiren turuk lahebon ari famen Israel hinabet Yehuda hinabet obog toho pi roho mako wambuhup.

⁶Mako wambuhupteg hiren NINIKNI Allah yami ruruk lit wam domba men wam sapi men imbik laruk lamuhup angge famen Allah ebe haruk lamuhup fug. At ino iren niyahup ulug hirag atisi.

⁷Hit NINIKNI Allah apma welatikip angge famen henembol yig utuk lit malik indag eneptuk latikibon hit hunumalik yuhon fug. Ari fahet ketiya heren anggeyen hiniyabukmu suburu inggila obog toho nahupmu hit henebe oho siyag amuhup.

⁸NINIKNI Allahn ele urukon tu, ”Ap seliyonen hunusul ulug waharukmu o Gibea inowen waruk tung turuk lamiyek! O Rama inowen oho ele hum toho uruk angge fam keng tik aliyek! O Bet-Awen inowen oho henele hi roho iyek![10] Hit Benyamin hinap obog toho henekol toho welamek!

⁹Alem angginon hunubam aruhu sambil ino horog aha! Kinang Israel aru ap seliyonen pin kuruk lit harep pisako elehap henebuhup. Israel hinap hununggul unuk wal-wal welahebon hunubam tem toho teko lahu ane fahet Anden fag toho hiyag hisaruk lahi.

¹⁰Yehuda inap fet enesuhon arimanowen Israel kinang ilmig tahuk ulug hili hikip toho imbik laruken An nundama ahe laharukon ino ik fu waharukon hag toho it unubam hilil isahuk.

¹¹Israel hinap hununggul arik teg lit ap let enebuk fug tohon onombolim laruk latikibon fahet ap seliyonen henenggengge hilaruk lit apmayap heneptusa.

¹²Israel hinap sehelimu An sobonanggen hag toho wereg lit Yehuda inap unubam pot yig eneptuk lahi.

¹³Yehuda inaben pot it unubam yihikon yet harukmu Israel hinap oho hinindimu ouk werehon yet harikipteg o Asyur inap onowe suwon wereg ambeg let nenebik waruhuwen hiyag irik lalihip ulug ap mon eneptikip angge famen aren hit hihit henebuk fug tehen pot hunubam yihikon elehap tuhu fug.

¹⁴Ari fahet An olomene olokon hag toho Israel hinap men Yehuda inap men sehelimu waharuk lit hagmag saluk heneplug lahukmu ap misihen oho taluk nabuhu fug.

¹⁵Hit hunumbahalug lahukteg weregman eneg hiren nenembiken siyag ane turukuk ulug fag tuhupteg An norohole yami nabuhup. Hinindi anggin atuk lit Allah men ambiyeg welala peruk lamuhup ano,” ulug Allah ele uruk.