Read Angguruk Yali HOSEA 7 Bible Online

HOSEA 7 - Angguruk Yali bible

HOSEA 7

¹ouk unubam werehon hihit enepmin perukmen hun Efraim umalikisi alem humon unubam weregma o Samaria inaben onolok ane turukmu kim isaruk lahi. Enele si uruk lit ap inibam kuruk lir oho kalemma kahal enesug lir oho enenggengge yoholiyangge hilil laruk.

²Iren te siyag ane niren turuk latukukon obog toho Allah oluk teg peruk eleg angge famen iren siyag ane turukonen hililip enesuhon arimano An nilmu wereg,” uruk.

³NINIKNI Allahn ele uruk lit, ”Ap arimanowen siyag ane turuk lit onowe suwon indi ahiyehap turuk. Enele si uruk ane fahet it milal eneptukon enehiyeg haruk.

⁴It obog tohowen An numbahalug yaying til noruk. Ap ekeyen suburu roti wiratmin ulug e ilon yaltukmu fil-fal haruk hag toho inindi ahe laharuk ane indok ambulpul ulog turuk.

⁵Ap suwon in atisiyon fahet wenggel haruk sambil nonowesi nenek tukag ulug ik olokon hinang isarukmu ik ino nalug sohu-sohu ane eneg turuk.[11]

⁶Nonolok ane tul ulug hubanggo wenggeltuk ane indok yanggo hag toho wereg. Likiya in atug indok mililang turuk hag toho ap siyahap enebil laruk.

⁷Indoken han naruk hag toho onowesi alem kong toho emberukon arimano elehap eneptuk lit ap suwon obog toho unusuruk angge famen it misihen oho ele hi roho, ”NIKNI Allah, let nabik ma!” uruk eleg.

⁸Roti anggen men e ahaluwe men mangno roho tag turuk hag toho Israel inap arimano men ap o pumbuk winamon men mangno atusa. Mangno atusa ane ariyen Israel inap arimano suburu indokma wiratuk lit hebeltuk elegma han narukon hag atusa.

⁹O winamonen Israel inap inine elehap eneptuk angge famen iren wenggel haruk eleg. Hubulu wilip atusa angge famen war amuhukon horogma welahe peruk eleg.

¹⁰Israel inap ininggareg enehinohap taruk ane ari famen unubabut siyahon inam atuk. Unubabut siyahon ino fahet alem eke hag eke hag unubam atuk angge famen An INIKNI Allah yami naptuk lit nambeg hebeloho waharuk eleg.

¹¹Israel inap arimano suwe yalma hag toho wereg. Inindi sohu rehen aben inindi kahal eneptuk ane hol halug let nenebik maniyek ulug Mesir inap wol eneptuk lit Asyur inap ninibil amag ulug enembeg laruk.

¹²Kalemma larukmen Anden suwe hag toho sen enebuhukteg An nawene it luhaloho weregma hiyag isarusa ane hikit toho unusuhuk.[12]

¹³An enembol yig nutuk lit numbahalug longgo urusa ane ariyen siyag amuhup! Anden it windat enebuhuk perikikmen iren An nubahet enele si ane eneg urukmu yet isarikik.

¹⁴Nohoruk ambeg yinggig lit enehap kiriring heheg wat taruk lit roti anggen men hele anggur ahaluwe men og nisa ma ulug enele hi roho ya nga uruk. Inindimu An nubam wenggel ha fug anggeyen enembilik fam eneg An nubam sembahyang uruk lit nele yong naptuk.

¹⁵Anden enebe totman kul eneptuk lit ininggik inineyap eneptuk latikik angge famen iren ke roho Allah siyahap tul ulug enele sahaltuk.

¹⁶An numbahalug usangge alem elehon fam sembahyang uruk lit sehen inggila saleg elehon hag atusa. Onowesiyen enele siyag toho uruken karohen unusuhupmu Mesir inaben hol halug inda yako ininggaliyap eneptuk lamuhup,” uruk.