Read Angguruk Yali HOSEA 8 Bible Online

HOSEA 8 - Angguruk Yali bible

HOSEA 8

¹NINIKNI Allahn ele uruk lit, ”Pinggong ele hum toho wariyek! Suwe kuren pak namin ulug hug wamburuk hag toho ap seliyon An HINIKNI Allah nangginangma waharuk. Anden numalikisi men nininggik ahandip toho welamuhuk ulug sali imbiyahon ino iren apmayap turuk lit Anden tuk teg ane fahet komo eneptik iyahon sobir isaruk latusa.

²An nubam enele hi roho uruk lit, ’Hat nit Ninikni welahen, nit Israel ninap humalikisi wereg lit Hat nonoluk,’ uruk angge famen

³Israel inaben fanowon fahet ninirim peruken ap seliyonen muko unusik wamag!

⁴Anden hiyag isa fugmen iren ap suwon lahap eneptuk latusa. An napeleg toho weregma onowesi in eneptuk latusa. Umbagpag turuk angge emas perak fam tu Allah hag toho wereg ulug wirim turuk angge lale feruk latusa angge famen windat neneptukon tu wereg peruk angge arimano mondabi siyag amuhup.[13]

⁵Hit Samaria hinaben wam sapi umalik tu nunumba wereg ulug wel turuk lahep angge ino fahet An nirim. Hit fahet An nundama ahe indok hubu muhul laharuk hag toho laharuk. Noenam welaruhukmu siyag angge hunubam tag tehon ino ho roho umbusuhup?

⁶Hir oho An numalikisi Israel hinap welahep angge famen nungge fahet alem ari hit sehelimuwen teko laruk? Nunumba ulug wel turuk lahep angge ino ap kinangmonen laltisi angge re Allah hag toho wereg puk fug. Wam ino aben lilibug toho siyaha fusuhup.

⁷Ap san homhomo yatuk halug siyelu tahan tahu. Wiye ahanuk laharuk elehon anggen uruk eleg. Iren yatuk angge anggen elep halug oho o winamonen nelep.

⁸We tem toho Israel inap arimano ap winonen mag-mag pil isarusa. Kubag lilibug toho lin-lan uruk hag toho An numalikisi o pumbuk winon seheli ke tin-tan ik larusa.

⁹Wam inikni elehonen turuk hag toho numalikisi An numbahalug o Asyur kinangma laruk lit hinindi nenesug lamuhup ulug fano-fano angge og isa laruk.

¹⁰O kema-kema fano-fano angge og isil laruk angge famen Anden alem angginon unubam umbuhuk ulug palu enebuhukmu we tot welamuhupteg Asyur inap onowe suwon inowen siyahap enebik waruhumu ouken inel-hanel uruk lamuhup.

¹¹Israel inaben siyag ane turuk latukukon Allahn elehap tukag ulug hubu lahaptuk ambeg anggolo wiri feruk latusa angge famen hubu lahaptuk ambeg arimanowen siyag ane til-wil noruk.

¹²Anden tu men ari men turuk lamuhup ulug il misig-misig kong heheg komo eneptik iyag ane teng-teng angge werehon arimano it onoluk amag ulug haharoho imbiyag angge famen iren ket-ker ane haharoho imbibag peruk.

¹³Iren enehiyeg toho wam waroho hubu lahaplug unu ininggarehen naruk. Narukon fahet An HINIKNI Allahn nirim peruk lahi. Siyag ane iren turuk latuson fahet Anden napeleg am fug angge alem angginon unubam umbuhukon tu: Nin hebeloho Mesir inap enemingmingangge amuhuben enembeg hondog eneplug lahuk.

¹⁴Israel inaben it wal enepfag ahun fahet enepeleg atuk lit o fanowon eke hag eke hag wit tarusa. Yehuda inaben o pumbuk elehet ineyon walinggoho ohowon anggolo wiri ferusa angge famen Anden o pumbuk arimano fam indok pilabik waruhukmu o fanowon arimano oho nahu,” uruk.