Read Angguruk Yali HOSEA 9 Bible Online

HOSEA 9 - Angguruk Yali bible

HOSEA 9

¹Hit Israel hinaben ap o pumbuk winamonen turuk hag toho henehiyehen henele hi roho uruk lit sini yungguluk fug! Hit Hinikni Allah embeselug nunumbasi ulug wel eneptuk lahebon men yaying turuk lahep. Yaying turuk laheyon fahet onggo roti anggen og nisalusa ulug henehiyehen roti anggen waruk ke yaying til laruk lahep angge famen

²roti anggen men e zaitun ahaluwe men hele anggur ahaluwe men og hisahup fug.

³Israel inap arimano NINIKNI Allah angginang embeselug winon o Mesir suhuloho lahup, winon o Asyur kinangma lahupteg Allahn na fug ulug imbibahon naruk lamuhup.

⁴O winama wereg lit NINIKNI Allah fahet hele anggur ahaluwe hilili felug wam waroho hubu lahaptuk lamuhup fug. Suburu yahaltuk lamuhubon minggiroho winon NINIKNI Allah ibam imbik la fug tehen ininggareg eneg naruk lamuhup. Ininggareg eneg naruk lit suburu ap filiken hondo rurukon narukmu siyag atuk hag toho ir oho siyag angge unubam tag tegman eneg welamuhup.

⁵NINIKNI Allah wel tul ulug umalikisi enehiyehen sini yunggultuk sambil horog aruhu halug o winama wereg lit nanggintuk lamuhup?

⁶Ap seliyonen inibam halog toho siyaha fusuhup ambeg embeselug o Mesir kinangma lahupmu inibamet perak ili rurukon lin isalug lahubonet mulip alog anggeyen hililip teg laruhu. O Mesir lahupmu Mesir inaben misigmu palu enebuhupteg waroho o Memfis inowen sal enebuhup.

⁷Allahn ap siyag ane turukon alem angginon unubam umbuhu li horog atisi ulug hit Israel hinaben oho yet teg lamuhup. Hiren an Hosea nubahet henele uruk lit, ”Allah wene hiyag nisarukon nabi aru indi nonghong uruk lit nenek turuk,” ulug nabug uruk lahep. Hiren siyag ane hum toho turuk lahep ane ariyen an nubahet ninirim peruk lahep.

⁸Allahn an hiyag nutuk lit namingmingangge nabi wereg lit numalikisi Israel inap yet enesug laruhun ulug mon naptisi. Mon naptisiyon Nikni Allah iraham welahi angge famen an kema-o kema-o larukmu iren sen nabul ulug yebangge yep turuk. Nikni Allah apma welahi angge famen iren an siyahap nabul ulug turuk.

⁹O Gibea inowen Israel inaben amben mondabi siyahon tibag hag toho ketiya oho turuk. Siyag ane iren turukon fahet Allahn alem angginon unubam umbuhu peruk ane apeleg aruhu fug.

¹⁰ NINIKNI Allahn ele uruk lit, ”Ap eke lekma laruk lit hele anggur anggen hiyaharuk hag toho Anden hit Israel hinap hunumbasi hiyag eneptik iyag. Hiyag eneptik iyag li e sawe anggen tam yihikon hag toho wereg piyag angge famen o Baal-Peor libareg hunumbasi arimanowen tu Allah hag toho wereg ulug wirim turukon Baal wel turuk latfag. Baal amben siyahon fahet inindi reg latfag ane ariyen ir oho amben siyahon unubam atfag.

¹¹Suwe lam-lam longgo ik laruk hag toho Israel inap ununuk suwon oho longgo uhup. Israel hiyap malik enehummu atuk elegma indag taruk lamuhup fug.

¹²Malik enenum pal eneplep halug oho Anden obog toho elehap eneple. Anden nambol yig isahukmu we tem toho siyag amuhup.

¹³Anden yet isarukmen Israel inaben unumalikisi ap seliyonen unusukag ulug enembeg hondog eneplug laruk. Hondog eneplug lahupmu pak muko laruk hag toho muko unusik wamuhup,” uruk.

¹⁴NIKNI Allah, Haren ap aruma unubam nanggintuk laruhun? Haren tuhunon fahet anden nungge ane heng hapmin? It aruma mondabi siyag amuhup tohon ulug we hiyap ibiliyap eneptuk lit inag owe elehap tuhun!

¹⁵NINIKNI Allahn ele uruk lit, ”Indam o Gilgal inowen Israel inaben siyag ane hum toho turukmu Anden it fahet nirim peruk ane ak tiyag. Iren siyag ane eneg til-wil noruken An nangginangman yanggal enebuhuk. It onowesi obog tohowen An nele ying naptuken nindi enesug lahi ane umbusuhuk.

¹⁶Israel inap arimano e umanggen lilog atukmu anggen yihik elehon hag toho welamuhup. Malik indag telep halug oho malik inindi enesug lalebon arimano Anden unusele,” uruk.

¹⁷Israel inap arimanowen an Nikni Allah ele holtuk elehen Aren miyaloho hik isahu. Hik isahumu o ekema hirag arik la ekema hirag arik wam turuk lamuhup.