Read Angguruk Yali YOEL 1 Bible Online

YOEL 1 - Angguruk Yali bible

YOEL 1

¹NINIKNI Allahn hun Petuel amloho Yoel fam hiyag utuk latfag ane suwesingga tu fam haharoho imbibag.

²Hit ap sabalon men Yehuda kinang fam welahebon obog tohowen holeg lamek! Hit honoluk weregma iminon aru hag toho teko larukmu yet harikip? Hunumbasi welatfag li ari hahon teko libag ane hol harikip?

³Iminon tu hol halihipteg hunumalikisi hiyag isaruk lamuhup. Hunumalikisiyen it unumalikisi welamuhubon hiyag isaruk lamuhupmu iren oho fobik endebuhubon unubam hiyag isaruk lamuhup.

⁴Heren sunggabi mondoko waharuk lit yahongge obog toho narusama onombolim heren puluwe anggolo roho waharusareg tot werehon mondabi eleha feserusa.

⁵Hit ik olokon naruk lit nenek turuk lahep hinap, in atug uba yatuk lamek! Heren arimanowen hele anggur anggen obog toho narusama ik olokon anggur ahaluwe mondabi eleg latisi.

⁶Heren winag isa fug toho nit nenengginangma kik waharusa. Inine anggolo roho wereg lit eneyeg olomene ayeg hag toho umaho lit welatusa.

⁷Hele anggur anggen siyaha feserusama e anggen narukon irat eneg wereg. E ahap fungguloho hik isarusama ebe yanggowon inam atisi.

⁸Hiyap tuhumonen ap an fahet elenggen kik waharukon ino war aha ulug uba yatuk hag toho uba yatuk lamek!

⁹Yabuk obog toho siyaha feserusama kinang lilog atisi. Yahongge mondabi eleha feserusama suburu yahaltukon men, e anggen tahantukon men, ik anggur ahaluwe men Allah fahet umbul ulug At ibam imbik waharuk elegma NINIKNI Allah amingmingangge hubu lahaptukon arimano inindi siyag atuk.

¹¹Yabuk ngi hinap welahebon, roti anggen eleg atisimu nungge naruk lamuhuk ulug yihi peruk lamek! Anggur yatuk hinap welahebon, hele anggur halo atisimu hunu sini yiko uba yatuk lamek! E anggen narukon obog toho ilim atusama e winon oho inggila hololokan toho wamburusa. Aben enehiyeg toho yunggultukon oho eleg atisi.

¹³Allah fahet hubu lahaptuk hinap, hinindi siyahen uba yatuk lit fesi lahaptuk lamek! Suburu men ik anggur ahaluwe men NINIKNI Allah fahet imbik waharuk elehen Allah ibam undama kuruk lit hubanggo oho fesi lahaboho nohoruk lamuhup.

¹⁴Suburu na fug angge hunik welamuhup ulug ap hiyag isahup! Ap obog toho luhal arik wamuhup ulug wol enebuhup! Yehuda hinap obog toho honowesi men Allah ibam kuhupteg henele hi roho let nenebin ulug NINIKNI Allah fam heng uruk lamuhup.

¹⁵Yihi, NINIKNI Allahn alem kong tuhu sambil horog teg. Allah ine anggolowon inowen kinang siyahap tuhuk ulug warik oho reg.

¹⁶Nit ninilmu mun angge man angge naruk angge eleg atisi. Allah ibam enele enehiyeg toho urukon teng urusa.

¹⁷Eiyangge kinangma yatuson oho ilim atisi. Roti anggen emberuk ibam anggen elehen emberusa fugmu tal heheg wamburuk.

¹⁸Tahe eleg atisimu wam sapi oboken nga-nga la-wam turuk. Wam domba oho war am hag ane turuk.

¹⁹Inggilangge wamen narukon indoken naruk latisi. E obog toho mo oloken halo urusa. Obog toho siyag atusama anden nele hi roho let nenebin ulug Hat NINIKNI Allah hubam heng haptuk lahi. Ik obog toho firig tegma pak mene farema werehonen oho let nenebin ulug kuwa.