Read Angguruk Yali YOEL 2 Bible Online

YOEL 2 - Angguruk Yali bible

YOEL 2

¹Siyag amuhup tohon ap obog toho yet teg lamek ulug henele hi roho uruk lamek! Tom Sion Allah wereg ambeg unduhuk lit waruk hinine roho teltuk lamek! Yehuda hinap obog toho henekolen elek-elek angge turuk lamek! NINIKNI Allahn alem kong tuhu sambil horog teg.

²O ino sambil hik teg laruhu, hina singon eneg keleg aruhu. Mo lahik waharuk lit asinandi tom fene pilabik waharuk hag toho ap seliyon inine anggolowon winag isa fug toho waharuk. Ari hahon tam oho tibag fureg fobik oho teko lahu fug.

³It enelukema indoken obog toho nil larukmu onombolimmu oho indok ambulpul ulog turuk. It uwan wam fugmu kinang enelukema werehon ino kinang Eden fanowon hag toho wereg angge famen pisan isalug larukmu enembolma lekma hag atuk. Nungge-nungge kinangma werehon umbusuk fug angge obog toho siyahap turuk.

⁴It unubabut wam kuda hag toho wereg lit kuda ine roho laruk hag toho folo-folo waharuk.

⁵Indoken harep naruk lit aplohok ururup turuk hag toho tom fene hik tombo lahabil waharuk. Ap unusul ulug luhaloho larukon hag toho inine roho waharukmu

⁶ap obog toho enekolen elek-elek angge turuk lit lisag anggolo wilip atuk.

⁷Enembong se roho turuk inap hag toho pupu angge laruk lit elehet pumbuk walinggoho ohowon fam laharuk. Hare ruk fug angge ap obog toho pikit laruk.

⁸It-it miyal-miyal am fug angge onorohole fil laruk. Tog sele-sele unusurukmu oho kong tuk fug angge luhaloho laruk lit enekol eleg toho ap seliyon weregma kuruk.

⁹O pumbuk pin kul ulug elehet suhan toho laruk lit yoholiyangge waruk inap hag toho o ele ke kuruk.

¹⁰It waharukmu kinang o mek tirikim pohol oho yuk turuk. Mo men pikalem men il hik atukmu suhal umbagpag turukon oho eleg atuk.

¹¹ NINIKNI Allah ino it enelukema laruk lit ele hi roho milal eneptuk. At otsi sehen senehon winag isa fug toho wereg lit Allahn ele hiyag isaruk ane hikit toho inine roho turuk. NINIKNI Allahn alem kong timin ulug waruhu sambil horog tehen henekolen yuk lagmag uruk lamek! At ino waruhu halug sa ine roho welam teg?

¹²NINIKNI Allahn ele urukon tu, ”Ketiya oho hinindi hebeloho An nalukema waharuk lamek! Hinindi siyahen suburu na fug angge hunik wereg lit uba yatuk lamek!” ulug Allahn ele uruk.

¹³Siyag ane turukuk ulug sum wan teg lahebon tararag tuk fug angge hinindi eneg tararag turuk lamek! Hinindi hebeloho HINIKNI Allah fam wenggel haruk lamek! Aren inilaheg ulug ap obog toho indi enesug, ap siyahon fahet oho indi folo-folo olok atuk eleg. Ap sa-o sa-o unubam we fano ane eneg turuk, ware fusuhuk peruk ane folo-folo embeseruk.

¹⁴Allahn unusuhuk ulug wenggeltukon ino embeseruk lit suburu men anggur anggen men nin anggolo og hisaruk laruhu ano? Og hisaruk laruhu halug HINIKNI Allah fahet imbik la reg lamuhup.

¹⁵Allah antom Sion fam henele hi roho uruk lamek! Suburu na fug angge hunik welatlihip ulug ap hiyag esemek! Ap obog toho luhal arik watlihip ulug wol enebiyek!

¹⁶Allah fam sembahyang ulen hinindi haloho welamek ulug hiyag isalihip! Ap sabalonet malik toron ag narukonet obog toho wamag. Ahun uhe ket og atusareg olma nohorukon oho wilibig wamag.

¹⁷NINIKNI Allah amingmingangge imam arimano Allah ibam sokolma hubu lahaptuk ambeg iraham in arik lalusareg uba yatuk lit, ”NINIKNI Allah, Hat humalikisi hindi nisimin. Ap o pumbuk walinggoho werehonen inda yag neneptuk lit Allah iren tohon kema wereg ulug nininggaliyap nenebuhup tohon nunumbahakun fug,” ulug heng uruk lamag.

¹⁸NINIKNI Allah nangginang nindi ulug undaman indok ambulpul hag toho turuk lit angginang kim halug umalikisi indi isaruk.

¹⁹Umalikisiyen enele urukmen NINIKNI Allahn hebeloho hiyag isarukon tu, ”Anden roti anggen men, e anggen men, anggur anggen men anggolo og hisaruk laruhukmu henehum ouk toho naruk lamuhup. Ap o pumbuk henengginang walinggoho werehonen hininggaliyap henebuhup tohon Anden hunumbahakuk fug.

²⁰Ap seliyon ik eleruk filen waharukon arimano winon Anden lekma yanggal enebuhukmu siyag amuhup. Tam atukon yali fil ik saho ahik ahummu hik isahuk, fotog-fotogma waharukon arimano hubula fil saho ahik ahummu pilap enebuhuk. War atuk lit enemben siyag turuk laruhu. Alem suwon siyahon turusa ulug siyahap enebuhuk,” uruk.

²¹Kinang siyag atuk ulug henekol toho welamuhup fug! NINIKNI Allahn alem suwon fanowon nunubam tirisi ulug henehiyehen yunggultuk lamuhup.

²²Inggilangge eleg atisiyon ketiya fano roho wilip atuken wam pak mene inindi anggin toho welamuhup fug. E anggen anggolo urukmu hele anggur men e ara men anggenen keleg atuk.

²³O Sion hinap, NINIKNI Allah fano ulug henehiyeg toho yunggultuk lamuhup! Aren hit fahet nindiyen ulug indam osit pilabik waharuk latfag hag toho roti anggen uwan yabuk fugmu osit og hisaruk lit yahoma oho pilabik waharuk.

²⁴Roti anggen ahap waruk ambeg anggen anggolo rehen keleg aruhu. Sak watukmu amug anggolowen inggila fene kosal-kosal wamburuk laruhu.[1]

²⁵Allah ele urukon tu, ”Anden heren sunggabi men puluwe men henembeg monde fik waharikikmu mondoko waharuk lit hit hiniyabukmu yaho angge narukmen eneg mo-mo angge atisi. Naruk latuson hikit toho Anden ubalmayap tuhuk.

²⁶Hit henehum ouk toho naruk lit, ’Aben tuk fug tehon NINIKNI Allahn nunubam tirisi,’ ulug wel naptuk lamuhup. Ap winonen hit An numalikisi hininggaliyap henebuk fugmen eneg welamuhup.

²⁷NINIKNI Allah nit Israel ninap nenesehelimu wereg ulug honoluk aruhu. ’Ninikni Allah we misig, At hahon winon eke wereg eleg. Nit At umalikisi welaheyon aben nininggaliyap nenebuk fugmen eneg welamuhuk,’ ulug fag toho uruk lamuhup.”

²⁸ NINIKNI Allahn ele urukon tu, ”Ari obog toho teko lahureg weregma nahime fanowon ap obog toho enebene pilabik waruhukmu hunumalikisi ap umaliket hilani umaliket An namingmingangge nabi amuhup. Ap sabalon hit sehelimu werehonen nei fulu roho waruk lamuhup, ap kabiniyonen fobik aruhu ane yet haruk lit onoluk aruhu.

²⁹O ino sambil henemingmingangge abet hiyabet unubam oho nahime pilabik waruhuk.

³⁰Poholma leman oho kinangma tuma oho enehangge anggolo tuhuk: O harep pisako indok hubu muhul mondotuk laruhumu ap enemep oho hililik waharukmu yet hahup.

³¹Mo il hik aruhumu pikalem il mep hag aruhu. Anden alem kong timin ulug waharukmu ap obog toho enekolen yuk lagmag uhup sambil ino horog aruhumu ari obog toho teko lahu.

³²Ap san An nubam wenggel harukon eneg war am fug angge onoluk welamuhup.” NINIKNI Allahn ele uruk lit, ”O Yerusalem tom Sion fam werehon fano amuhup,” uruk latisiyon hikit toho Aren wol eneptukon arimano windat enebuhu.