Read Angguruk Yali YOEL 3 Bible Online

YOEL 3 - Angguruk Yali bible

YOEL 3

¹NINIKNI Allahn ele urukon tu, ”Yehuda inap men Yerusalem inap men hebeloho fanowap enebuhuk sambil ino

²o pumbuk obog toho ap enele wal taneg urukon andog enebuhukteg o Yosafat tonggoma[2] hondog eneplug wambik waruhuk. Wambik waruhukteg alem it unubam werehon ino kim isaruk lit nele olok toho hiyag isahuk. Iren numalikisi Israel inap Anden mumal tarikikon arimano o kema-kema hik isaruk lit An nangginang Israel ino fibir atusa.

³An numalikisi sen eneptuson wal-wal san ngi aruhu ulug enehangge hik turusareg wal taneg ngi atusa. Ngi atusareg yaying turuk hiyap men nohorukon onggo og isaruk angge elehen malik ap angge misig-misig ap amingmingangge welaruhu ulug ayeg waroho waruk latusa. Ik olokon narukon onggo elehen malik hiyap angge misig-misig ayeg waroho waruk latusa.

⁴O Tirus hinap, Sidon hinap, Filistin hinap obog toho welahebon, hiren An nubam nanggintul peruk lahep? Anden siyag ane hunubam tirikikmu ayeg wabul peruk lahep? An nubam siyag ane tul peruk lahebon Anden folo-folo hebeloho hininggareg hunubam umbuhuk.

⁵An nanggengge fanowon ili ruruk angge perak men umbagpag turuk angge emas men fam wirihon arimano huhulangge hilaruk lit hit hinibam fanowon fam imbik laruk latikip.

⁶Yehuda inap men Yerusalem inap men yatma walug laruk latikipteg Yunani inap enemingmingangge welamuhup ulug ayeg waroho og isaruk latikip.

⁷Ketiya numalikisi ayeg waroho og isaruk latikip ambehen hondog eneplug wilip aruhukteg hiren it unubam tirikip hag toho hininggareg hunubam tuhuk.

⁸Hunumalikisi ap umaliket hilani umaliket Yehuda inaben ngi amuhup ulug ayeg waroho og isahukmu Yehuda inaben oho o Syeba yatma wereg inap enemingmingangge welamuhup ulug hunumalikisi ayeg waroho og isahup,” ulug NINIKNI Allahn ele il laruk lit,

⁹”Iminon tu o pumbuk obog toho ap enele wal taneg urukon unubam hiyag esemek, ’Tog aptuk lamuhuben sehen wep toho welamek! Henembong se roho turuk hinap in amek! Sehen seneg inap obog toho luhal amusareg lalusa.

¹⁰Hunuwanggun yabuk witukon ap unusurukon fahet firap turuk lamuhup. Fili wam senggeltuk lahebon ap watukon fahet mingginap turuk lamuhup. Inine elehonen oho, ’Nambong se roho tog abuhuk,’ ukag.

¹¹Nori, folo maniyek! O pumbuk obog toho Israel kinang walinggoho welahebon o Yosafat tonggoma palu arik watlihip!’ ulug hiyag isalihip,” uruk. NINIKNI Allah, ap arimano palu arik wamusama unusulusan hotsi mon enepmihin!

¹²NINIKNI Allahn nin ele uruk lit, ”Ap o pumbuk obog toho kinang atogman atogma werehon inibam embeselug o Yosafat tonggoma wambik wamag. Wambik waharukmu Anden ap arimano unubam alem werehon kong timin ulug heriyeg latmin.

¹³Iren onolok ane anggolo turuk latuson ari fahet unusilihip! Anggen momi rehen karog fam kong tiyek! Sak watukmu amug anggolowen inggila famen kosal-kosal wamburuk hag toho sobir esemek!” ulug Allahn ele uruk.

¹⁴O Yosafat tonggoma Allahn alem kong turuk ambeg ino ap teng-teng angge winag isa fug toho luhaleg lit enele hum toho urukmu holtuk lahi. Allahn alem kong timin ulug tonggoma ino waharuk sambil horog teg.

¹⁵Mo men pikalem men il hik atukmu suhal umbagpag turukon oho eleg atuk.

¹⁶Tom Sion o Yerusalem werehon ino famen NINIKNI Allahn ele ululu sup turuk hag toho urukmu pohol ha kinang ha yuk turuk angge famen NINIKNI Allahn umalikisi Israel inap inibil atuk lit windat eneptuk.

¹⁷Allahn ele uruk lit, ”Anden windat henebuhukmu An fahet NINIKNI Allah wereg ulug honoluk aruhu. Tom Sion Anden ngi reg lahiyon fam An weregma o pumbuk Yerusalem oho An nangge welaruhu. Ap pohonen An fahet enepeleg inap kuruk lamuhup fug.

¹⁸Windat henebuhuk li anggur anggen anggolo atuk lit ahaluwe ik laruk hag toho tom famen wamburuk laruhu. Wam sapi ag humu anggolo rehen punumuwen wamburuk laruhu. Ik kinang Yehuda fam werehon arimano firig am fug angge mondabi laruk laruhu. Ik eke Allah ibamen wilip atuk lit o Akasia tonggoma firig atukon ino oho laruk laruhu.

¹⁹O Mesir inap enengginang men Edom inap enengginang men lekma hag amuhupmu ap enele teng uhup. It arimanowen Yehuda kinang fam pin kuruk lit siyag ane turuk elehon unusuruk latuson ari fahet

²⁰indam ayeg watikik fureg ketiya unusuhuk. Kinang Yehuda men pumbuk Yerusalem men fam ap weregman eneg mondabi welamuhupmu An HINIKNI Allah tom Sion fam weregman eneg welaruhuk.”