Read Angguruk Yali AMOS 2 Bible Online

AMOS 2 - Angguruk Yali bible

AMOS 2

¹ NINIKNI Allahn uruk ane aru holeg lamek, ”O Moab inaben siyag ane eneg til laruk lit werehen Anden unusuhuk uruk lahiyon aru umbusuhuk fug. Edom inap onowe suwon uwag warusareg indokma wirako mur ka ubahat fene lahaptukonap turuson ari fahet

²Moab kinang fam Anden indok pilabik waruhukmu o Keriot elehet walinggoho ohowon ino obog toho nahu. Ap seliyonen unusuhuk ulug enele ngik-ngog toho waruk teltil waharukmu tog sele-sele atuk ambehen Moab inap arimano war amuhup.

³Moab kinang seneg ahun men onowesi suwon men Anden obog toho unusuhuk.”

⁴NINIKNI Allahn uruk ane aru holeg lamek, ”O Yehuda inaben siyag ane eneg til laruk lit werehen Anden unusuhuk uruk lahiyon aru umbusuhuk fug. An INIKNI Allahn ari-ari turuk lamuhup ulug komo eneptik iyag ane fahet ninirim peruk lit nele sobir isaruk latusa. Unumbasiyen tu Allah hag toho wereg perukon alem elehon arimanowen hondog eneplug siyagma laruk latuson ari fahet

⁵Yehuda kinang fam Anden indok pilabik waruhukmu o Yerusalem elehet walinggoho ohowon ino obog toho nahu.”

⁶NINIKNI Allahn uruk ane aru holeg lamek, ”O Israel inaben siyag ane eneg til laruk lit werehen Anden unusuhuk uruk lahiyon aru umbusuhuk fug. Israel hinap nori, hiren ap inindi fanowon paleg angge og nisaruk elehen enebe ayeg waroho wul ulug walug lalug ap og isaruk lahepma enemingmingangge atuk. Ap enenggengge elehonen oho sepatu uyug hililip angge piren palehon ayeg wat nisaruk eleg ulug enebe ayeg waroho ap og isaruk lahep.

⁷Ap inilahehon hunuyuhen sabelepma sobir isaruk lit inine elehon miyaloho ilanma embeseruk lahep. Ikniyet amlohowet hiyap angge henemingmingangge misig werehon ino men ambiyeg nohoruk lahep. Ari roho turuk lahep ane ariyen An nunuk suwon fanowon siyahap naptuk lahep.

⁸Hiren paleg angge uwan ayeg waroho og nisaruk eleg ulug sum nohoruk angge ap henengge palehonen tohon hilaruk lahebon hebeloho og eselep angge famen An Allah wel naptuk ambeg sum arimano fam nohoruk lahep. Unggum fahet onggo ik olokon anggur ahaluwe hilaruk lahebon arimano hiren An nibam walug lalug naruk lahep.

⁹Ari roho turuk lahep angge famen Amori inap e sahi men e wali men yaron ineyon hahon hit honolohotman inggilayet umanggenet muko elehap tiyag nahun An welahi.

¹⁰Anden hit Mesir kinang famen wiliboho lei keyen hondog heneplug larukmen eneg mo teng misig nubam hilag nuwalen 40 atfagma Amori inap enengginang hit ngi amuhup ulug hunumbahik waharik iyag.

¹¹Anden hit hunumalikisi winon An nawene hiyag isaruk lamuhup ulug nabi in eneptuk latikik, hit henesehelimuwen ap kabiniyon winon An namingmingangge nazir wereg lit unubabut fano welamuhup ulug mumal eneptuk latikik.[4] Ari obog toho Anden hit Israel hinap hunubam turuk latikik fug ano? ulug An HINIKNI Allahn nele uruk lahi angge famen

¹²An namingmingangge nazir arimano ik olokon anggur ahaluwe og isaruk lahepma Allah fam sali emberukon sobir isaruk. An nawene hiyag isaruk inap nabi arimano unubam oho, ’Allah wene hiyag nisahup fug,’ ulug hiyag isaruk lahep.

¹³Ari fahet ketiya sum fam suburu anggolo roho yunggare felug malik toron unggulmu sukni ferukmu angginen kokok til laruk hag toho Anden alem angginon hunubam umbuhukmu kokok til laruk lamuhup.

¹⁴Ap folo-folo larukon oho nonoluk welamul ulug wilip amuhup fug. Ap inine werehon inine eleg amuhup. Ap enembong se roho turuk inap oho ininggareg windat ta fug teg lamuhup. Sehen seneg inap oho inine roho unduhuk lam fug tehen hebeloho waharuk lamuhup. Aben tog aptuk lit wam kuda palimu larukon oho folo lulteg nonoluk welamul puhup fug.

¹⁶Anden alem angginon hunubam umbuhuk sambil ino ap enembong se roho wereg lit inindi wirik toho werehon arimano enekolen sing sum sehen hik isalug enebiye lahup,” ulug NINIKNI Allahn ele uruk.