Read Angguruk Yali AMOS 3 Bible Online

AMOS 3 - Angguruk Yali bible

AMOS 3

¹Hununggul unuk Israel hinap welahebon, NINIKNI Allahn Mesir kinang famen wiliboho hondog heneplug watfag hinaben NINIKNIYEN ele urukon tu holeg lamek,

²”Ap ununggul unuk kinangma werehon obog toho enesehelimuwen we hit eneg Anden mumal heneptik iyag. Ari fahet hiren siyag ane eneg anggolo turuk lahepma Anden alem angginon hunubam umbuhuk.”

³Ap pirenen ambiyeg lahuk ulug enele sali uk fug angge ambiyeg la reg ano?

⁴Mene olokon farema werehonen pak hiyahuk fug anggeyen hilak tuk teg ano? Mene ibam hirahoma wereg lit naruk angge hila fug anggeyen ahiyehen ele uk teg ano?

⁵Sehen suwap elegma suwe wabuk teg ano? Sapna kahalegma ampunpun angge teberukon ino fam paken soptuk eleg halug e ungguleho ino wambuk teg ano?

⁶Ap seliyonen nunusuk oho waharuk ulug enehangge waruk teltukmu aben enekol ha fug teg ano? Eleg-o, nori. O pumbuk eke alem angginon unubam atuk halug NINIKNI Allahn alem angginon ari umbuhuk fug perukmen unubam am teg ano?

⁷NINIKNI suwon Allahn amingmingangge nabi arimano unubam ari tuhuk ulug hiyag isa fug angge mun ane man ane siyahon fanowon turuk eleg.

⁸Mene olokonen hilak turuk halug ap san akol ha fug teg? NINIKNI suwon Allahn ele uruk halug ap sa ambilik lar atug Allahn hiyag isahun urukon ino umbusuk teg?

⁹Allahn an Amos nubam ele uruk lit, ”Ap suwon inibam Mesir kinangma men o pumbuk Asdod men werehon hiyag isil lahunon tu, ’Tom Samaria pumbuk walinggoho werehon fam palu arik lahupteg o pumbuk Samaria fam enele sahal palaluk uruk lit it-it wat-war atukmu pen isaruk lamuhup,’ ulug hiyag isil lahun.

¹⁰Fano ane turukon enembolmaya feserusareg ap unusuruk lit enengge hilarukon arimano inibam suwon fanowon fam andog toho kilaptukmu palu laharuk.

¹¹Ari fahet An HINIKNI suwon Allahn nele uruk lahiyon tu holeg lamek: Ap seliyonen it inibam pumbuk huk toho waling enesug lit elehet o pumbuk walinggoho ohowon ino pin halog toho enenggengge o fanowon fam forohowon arimano huhulangge hilahup.

¹²Mene olokon singa ekeyen wam narukmu wam foroho ahun inowen uyug uwag piren ano isanggo tot ano eneg mene ambilikmuwen taluk toho hilaruk hag toho Israel inap o Samaria werehon heniye fanowon tuwaloho nohorukon arimano we tor angge eneg onoluk welamuhup.

¹³An HINIKNI suwon Allah pohol ha kinang ha senehonen nele uruk lahiyon tu holtihipteg Yakuben ondohowonen ondohowon arimanowen oho holukag ulug hiyag isa lahup:

¹⁴Israel inaben siyag ane eneg turukon fahet Anden alem angginon unubam umbuhuk sambil hubu lahaptuk ambeg o Betel werehon arimano halog tubusuhuk. Halog tubusuhukmu aben nuwabuk nowen ulug hubu lahaptuk ambeg senerik laruk ane ino mondabi eleg aruhu.[5]

¹⁵O saboma ap nohorukonet o mur ka werehonet Anden siyahap tubusuhukmu obog toho olun aruhu,” ulug NINIKNI Allahn ele uruk.