Read Angguruk Yali AMOS 4 Bible Online

AMOS 4 - Angguruk Yali bible

AMOS 4

¹”Samaria hiyap welahebonen An nele holeg lamek! Hiren wam sapi kinang Basan fam werehon hag toho henebe fit taruk lit ap inine elehon ilitno eneptuk lit ap enengge elehon sobir isaruk lahep. Henehunsi fam, ’Ik olokon nulen hinang nisa maniyek!’ uruk lahep.

²HINIKNI Allah suwon nebe usa fuluwon An welahireg hit hunubam sali emberikikon tu honoluk toho welamek: Tot welamuhupmu hininggik hele waroho og henebuhupteg tor angge welamuhubon obog toho ayeg angge fam hak toho lit henebuhup.

³O pumbukmuwen lisoho wilip heneptuk lit hit henebe wal taneg elehet o pumbuk walinggoho ohowon halog tubusuhup ke arimanowen horog toho og henebuhupteg tom Hermon fil hondog heneplug lahup,” ulug NINIKNI Allahn ele uruk.

⁴NINIKNI suwon Allahn ele urukon tu, ”Israel hinap nori, Allah fam sembahyang uhuk ulug hit hinindi henehiyeg toho o Betel waharuk lahep angge famen An nele ying nabik waharuk lahep. O Gilgal lalug oho anggolo roho An nele ying naptuk lahep. Likiya hupmu hubet An nolohotma esetukon fahet henembohom walug waharuk lahep angge famen hunubabut haleg eleg anggeyen walug waharuk lahep. O hinahaneg angge hininggikmu atuk angge minggiroho numon An fahet imbik waharuk lahebon ariyen An nindi siyahap naptuk lahep.

⁵Hiren Ninikni ulug An fahet suburu roti yaltuk lit aben wel nenebukag ulug An nubahet sebe roho emberuk lahebon fahet hemet toho hiyag isil laruk lahep. Ari obog toho fanowon peruk lit henehiyeg toho til-wil laruk lahep.

⁶Anden o pumbuk suwonet toronet suburu obok monde feruk latikikmu heneyeg keleg uk hag teg lit welatikip angge famen hit An nalukema hebeloho waharuk latikip fug.

⁷Hiren suburu we ket yaho felug osit nelep peruk latikip li Anden osit nahu fug ulug pilabik waharuk latikik fug. O pumbuk eke fam osit pilabik waharuk lit o pumbuk eke fam pilabik waharuk latikik fug. Yabuk eke fam osit wamburuk latisi, eke fam wamburuk latisi fugmu lilog atuk latisi.

⁸Ap o pumbuk piren hinahan arimano ik oboken inine eleg toho wereg lit o pumbuk ik wereg ambeg ik hinanggul ulug yami rik laruk latusama ik we tot-tot werehen wirim atuk latisi fug angge famen hit An nalukema hebeloho waharuk latikip fug.

⁹Anden ouk suburu inggila ilim atukon men folo hom ebe narukon men monde feruk latikikmu anggur yatuk lahep ambeg oho hom yatuk lahep ambeg oho inggila halo uruk latusa. Hit henehen anggen naruk lahebon heren anggeyen inggila obog toho naruk latusa angge famen hit An nalukema hebeloho waharuk latikip fug.

¹⁰Anden Mesir inap ouk alem suwon fam unusuruk latik iyag hag toho hit hunubam oho ouk ambi rohon monde fik waharuk latikik. Hit ap seliyon men tog aptukmu Anden hunumaliki kabiniyon unusuruk latikikmu wam kuda palimu hur arik laharuk latikibon arimano ap seliyonen huhulangge hilaruk latusa. O sabo wiroho wereg latikip ambeg ap Anden unusuruk latikikon arimanowen keleg uruk latisimu amben siyahen henembiyang latuk latikip angge famen hit An nalukema hebeloho waharuk latikip fug.

¹¹Anden o pumbuk Sodom men Gomora men siyahap tiyag hag toho o pumbuk hiren tohon winon siyahap turuk latikik. Hit honoluk welahebon e indoken narukmu ambiyang lisoho warukon hag toho welahep angge famen hit An nalukema hebeloho waharuk latikip fug,” ulug NINIKNI Allahn ele uruk.

¹²”Ari fahet Israel hinap nori, Anden alem angginon hit hunubam imbik oho lit welahi. Anden hunusimin ulug turuk lahiyon ari fahet yet teg lamok!” uruk.

¹³Tom men homhomo men wal tibag ahun ino NINIKNI Allah eneg wereg. Aren tuhuk peruk ane we ap fam hiyag isaruk. O seleg tohon Aren hikap turuk.[6] Tom yaron oho At uyuhen sobir isaruk lit wereg. At unuk NINIKNI suwon Allah pohol ha kinang ha senehon inowen ari obog toho teberuk.