Read Angguruk Yali AMOS 5 Bible Online

AMOS 5 - Angguruk Yali bible

AMOS 5

¹Israel hinap nori, an Amos inowen war atuk lahep ane fahet piya sini uruk lahiyon aru holeg lamek,

²”Israel inap hiyap tuhumon hag toho weregma tohen waroho ying atuk lit in am fug teg lit wereg. Ap misihen oho ininggik lisoho in eneptuk elegma enengginang fam lin-lan uruk.”

³NINIKNI suwon Allahn ele urukon tu, ”Ap o Israel pumbuk misig werehon arimanowen tog abul ulug ap teng-teng angge 1.000 andog eneptug togma laruk lamuhup. Tog aptuk lit anggolo roho war atukmu suhuloho waharukon we teng uhan 100 eneg waharuk lamuhup. Ap o pumbuk eke werehon ap teng uhan 100 andog eneptug togma laruk lamuhup. Tog aplug suhuloho waharukon we ap numen eneg waharuk lamuhup.”

⁴NINIKNI Allahn Israel inap unubam ele urukon tu, ”An nalukema hebeloho waharuk lamuhup halug honoluk welamuhup!

⁵Allah fam sembahyang uhuk ulug o pumbuk Bersyeba lahup fug! O Gilgal inap ininggik hele waroho hik-hak isahup angge re o Gilgal An wel nabik lahup fug. Allah wereg ambeg o Betel ino mondabi siyag aruhu angge re o Betel yami nabil waharuk lamuhup fug!”

⁶An Amos inowen nele uruk lahiyon tu: NINIKNI Allah alukema hebeloho waharuk lamuhup halug eneg honoluk welamuhup. Hebeloho waharuk lamuhup fug halug Israel inap enesehelimu Allah inowen indok monde fik waruhumu o pumbuk Betel indoken narukmu ap misihen oho wabuk fug teg laruhu.

⁷Hiren pikir ane hareyap turuk lit fano ane turukon fahet ninirim peruk lahebon siyag amuhup!

⁸Suhal wap men tuwong men lale fibahon ino NINIKNI Allah wereg. Hik ino Aren selehap turuk. Sakan hik amag ulug hubap turuk. Ik saho ahik yenggeleg ambehen hinanggoho kinangma hilili feruk. At unuk NINIKNI Allah inowen ari obog toho teberuk.

⁹At inowen ap suwon welahi perukon siyahap eneptuk lit elehet inibam walinggoho ohowon oho halog isaruk.

¹⁰Unggum kong turuk ambeg ap siyag ane turukon unubam komo eneptuk lit enele we tem hiyag isaruk inap fahet hiren ninirim peruk lahep.

¹¹Ap enengge elehonen henengginang fam ininggareg fahet yatuk angge minggiroho winon hiren hilaruk lit ap arimano hunuyuhen sobir isaruk lahep. Ari fahet o fanowon helep fam wiri ferikip angge famen o arimano fam welamuhup fug. Hom asan[7] suwon yaho feruk latikip angge famen hininggarehen naruk lamuhup fug.

¹²Hiren honolok ane wenggeltuk lit siyag ane eneg til-wil laruk lahebon ari an noluk: Fano ane turukon inindi angginap eneptuk lit onggo og hisarukon eneg inibil atuk lit ap enengge elehon unggum kong turuk ambehen miyal eneptuk lahep.

¹³Hiren ari roho turuk lahepma ap inindi anggat tehon arimanowen, ”Iren nit siyahap nenebuk nowen nenele ul fug,” peruk lit wereg.

¹⁴Nit fano nonoluk welamuhuk ulug siyag ane tuk fug angge fanowon fahet eneg wenggel haruk lamuhup. Ari eneg wenggel haruk lamuhup halug, ”NINIKNI Allah pohol ha kinang ha senehon ino nit ninim welahe,” uruk lahep ane hikit toho hinim welamuhup.

¹⁵Siyahon fahet ninirim peruk lit fanowon hinindi pulmu emberuk lamuhubon ariyen alem obog toho fano roho hale feruk lamuhup. Ari roho turuk lamuhup halug NINIKNI inowen hit Israel hinap we tot welahebon henehap siye heneptuk laruhu ano.

¹⁶Hit honolok ane turuk lahebon ari fahet NINIKNI Allah pohol ha kinang ha senehon inowen ele urukon tu holeg lamek, ”O pumbuk ele ke aben eye, yuwe ulug piya sini urukmu hol isahup. Ap anggolo war atukmu ap fong watuk inap we tot tehen yabuk wituk inap enengge elehon arimano oho hunu sini urukon fahet wol eneptuk lamuhup.

¹⁷Yabuk wituk ambehen sini enehiyeg toho yunggultuk angge famen An it enesehelimu waharuk lit unusuhuk sambil ino piya sini yunggultuk lamuhup.”

¹⁸NINIKNI Allah inam aruhu sambil folo-folo horog alep perukon arimano siyag amag! O ino sambil hiren fano amuhuk peruk lahep? Eleg-o nori, o ino sambil seleg teg laruhu fug, hik teg laruhu.

¹⁹Ap eke olomene olokon fahet akolen larukmen wam eli olokon men salkal uruk lit folo-folo olma lalug sat anggolowen ubahat fam inggik timi atukmen pisanggo olokonen naruk hag toho Allah inam aruhu sambil ino hit hunubam aruhu.

²⁰O ino sambil seleg am fug angge hik teg laruhu fug ano? We tem, asinandi mondabi elegma hik eneg laruhu.

²¹ NINIKNI Allahn ele urukon tu, ”Mo ilig am wirig am turukmu Allah fam sembahyang uhuk ulug henehiyeg toho palu ruruk lit yunggultuk lahebon fahet Anden nirim peruk lit amben siyag ulug nambiyang latuk lahi.

²²Hiren An nubahet wam yaltuk lit suburu emberuk lahebon fahet siyag peruk lahi. An nolohotma wam seiyon esetuk lahebon fahet oho kim hesele fug peruk lahi.

²³Nisanggo tale nge ruhu rohon henele hi roho Allah wel turuk asini yunggultuk lahebon ari umbusuhup. Hiren pinggong watuk lahebon ari oho holte fug peruk lahi.

²⁴Ik suwon firig am fug angge laruk eneg hag toho hiren oho unggum ekeyon-ekeyon fano roho hale feruk lit fano ane eneg turuk lamuhup.

²⁵Israel hinap nori, hit hunumbasi lekma mo teng misig nubam hilag nuwalen 40 mase ril laruk latfag li An nubahet suburu emberuk lit wam yaltuk latfag ano? Eleg-o, nori.

²⁶We hiren eneg e fam laltuk angge unuk Sakut suwalehon fahet ninikni suwon ulug wel turuk lit suhal e fam wirim tehon unuk Kewan fam sembahyang uruk lahep. Ari fahet Anden hit hininggik hele waroho og heneplug lahukmu hit laruk lit usasum hiren foroho lahebon arimano ha rulug o pumbuk Damsyik pisan toho yatma lahup,” ulug NINIKNI Allah pohol ha kinang ha senehonen ele uruk.