Read Angguruk Yali AMOS 6 Bible Online

AMOS 6 - Angguruk Yali bible

AMOS 6

¹Hit tom Sion fam henehiyeg toho welahebon men o pumbuk Samaria hinindi yuwag toho welahebon men siyag amuhup! Hit Israel inap onowesi welahebon, o pumbuk winon apma regma Israel inap palimu rehon fet enesug lahebon, ap obog toho let nenebukag ulug hit henembeg heng henebik waharuk hinap welahebon siyag amuhup!

²Hiren hunumalikisi unubam henele uruk lit, ”Lalihipteg o pumbuk Kalne yet ha lalihip! Lahupteg o pumbuk suwon Hamat ha wambuhup! Wambuhupteg o pumbuk Gat Filistin kinang fam werehon pen ha lahup. Nit nenengginang yat toho weregma ninine roho welaheyon men it men wirim teg eleg ulug honoluk aruhu,” ulug hunumalikisi hiyag isaruk lahep.

³Alem siyahon nunubam aruhu sambil horog teg eleg peruk lit siyag ane eneg til laruk lahep. Ari roho turuk lahebon ariyen olok ane hunubam aruhuwon ino horog atuk.

⁴Hiren wam domba umalik men wam sapi umalik sei werehon men en heheg walug naruk lit henehum ouk toho nalug heniye fano roho tuwaleg ambeg henembol hale fik la in am turuk lahep.

⁵Daud inowen sini milaltuk latfag hag toho niren oho sini milaloho pinggong watuk lit fano roho yunggultuk lahe peruk lahep angge famen aben hol hisarukmu henele siyag toho yunggultuk lahep.

⁶Hiren ik anggur ahaluwe kubag humon fam hinanggoho naruk lit wam sei fano anggolowon henebene lahaptuk lahep angge famen hunumba Yusufen ondohowonen ondohowon welahebon siyag amuhubon fahet hinindi ouk toho wenggel haruk lahep fug.

⁷Ari fahet hit tam hininggik hele pug toho hik hisahupmu ap winon hit honombolim amuhup. Seni esetug henehum ouk toho naruk lit heniye fanowon fam ying am in am turuk lahebon eleg aruhu.

⁸NINIKNI Allah pohol ha kinang ha senehon inowen we tik-tem toho ele uruk lit, ”Israel inaben ininggareg wel tarukon fahet siyag peruk lahi. Inibam fano roho wiroho elehet oko kilabehon fahet nirim peruk lahireg o pumbuk Samaria ino ap seliyon ininggikmu umbusuhuk,” ulug Allahn sali emberuk.

⁹O misig fam ap numen eneg onoluk welamuhubon itano oho fobik war amuhup.

¹⁰Ap obog toho war amuhupmu o eke inditmu ap misig oluk hirako welaruhu. Welaruhumu ap eke nori warehon yalmin ulug waharuk lit at hirako werehon fam, ”Onoluk werehon winon oho wereg?” ulug hinog og hahumu at inowen eleg uhumu ap waharukon inowen, ”Hele imbisin! NINIKNI Allah unuk ul fug. Aren hol nisamisireg ap wereg ulug nunusuhu rohon!” ulug hiyag uruhu.

¹¹NINIKNI Allahn hiyag isahumu o suwon toron werehon halog toho siyaha fusuhup.

¹²Wam helep pali ke folo-folo la reg? Ik saho ahik ahummu aben yabuk wibuk teg? Nori eleg- o, tuk fug teg angge famen hiren tuk fug teg ane turuk lahebon tu: Hiren alem ekeyon-ekeyon fano roho haltuk lalep angge famen ap siyahap eneptuk lahep. Hit-hit let-ler atuk lalep angge famen wat-war atuk lahep.

¹³”O Lodebar[8] siyahap turukuk,” ulug hiren winik-wonog angge turuk lit, ”Nit ninine famen o Karnaim[9] pin kurukuk,” ulug hemet turuk lahep angge famen

¹⁴NINIKNI Allah pohol ha kinang ha senehon inowen ele urukon tu holiyek, ”Ap enele winon urukon arimanowen hit Israel hinap hunusuhuben mon enebuhuk. Mon enebuhukmu henengginang atogman atogma kalem o Hamat fil larukon famen ik kinang Araba fam werehon seneg lit onolok ane hunubam turuk lamuhup,” ulug Allah ele uruk.