Read Angguruk Yali AMOS 7 Bible Online

AMOS 7 - Angguruk Yali bible

AMOS 7

¹O misihim sambil NINIKNI suwon Allahn an nil fenggen naptisimu harikikon tu: Anden yet harukmen o hibi humon uwan lahuk fugmu roti anggen tamon ninikni ap suwon raja fahet paltusama ombolim roti anggen keron ket wilip atisi li Allah inowen heren sunggabi anggolo wal eneptisi.

²Wal eneptisimu heren sunggabi arimanowen inggilangge obog toho na hag tegma yet harikikteg anden nele uruk lit, ”NINIKNI suwon Allah, humalikisi Israel inap arimanowen siyag ane turukon hambolmayap timihin! It inine elegma nangginoho welam teg?” ulug hiyag itikik.

³Hiyag itikikmu NINIKNI Allahn numalikisi unubam tuhuk perisi ane embeseruk lit, ”Alem yet hehenon ari hikit toho teko lahu fug,” ulug hiyag nitisi.

⁴NINIKNI suwon Allahn nin eke nil fenggen naptisimu harikikon tu: Anden yet harukmen NINIKNI inowen numalikisi indok fam unusimin ulug turukmu yet harikik. Indok inowen ik kinang apma yenggelehon obog toho narisimu kinang lilog am hag tegma yet harikikteg

⁵anden nele uruk lit, ”NINIKNI suwon Allah, Haren indok aru elehap tin! Humalikisi inine elegma nangginoho welam teg?” ulug hiyag itikik.

⁶Hiyag itikikmu NINIKNI Allahn numalikisi unubam tuhuk perisi ane embeseruk lit, ”Alem haren yet hehenon ari oho teko lahu fug,” ulug hiyag nitisi.

⁷NINIKNI inowen nin eke nil fenggen naptisimu harikikon tu: Anden yet harukmen Ninikni suwon ino elehet ohowon palimu unduhuk lit elehet tu pikit toho wirig ano, hare roho wirig ano ulug hele o wituk inaben wirim turukon inggikmu seneg latisi.

⁸Seneg lit NINIKNI Allahn an nubam kapal niyaruk lit, ”Amos, haren nungge yet haruk lahen?” ulug kapal niyarisimu anden, ”Hele o wituk inaben wirim turukon ino yet haruk lahi,” irikikmu Ninikni suwon inowen, ”Numalikisi elehet hare roho wirihon hag toho wereg ulug seleg atmisiyen hele ari seneg lahi. Iren siyag ane turukon fahet unusuhuk peruk lahi ane ketiyon tu re umbusuhuk fug.

⁹Punumu Ishaken ondohowonen ondohowon arimanowen An fahet wam waroho hubu lahaptuk ambeg siyaha feseruk lit Israel inaben An wel naptuk ibam arimano oho halog tubusuhupmu Anden ap suwon Yerobeam umalikisi men unusuhuk,” irisi.

¹⁰O misihim sambil Allah fahet hubu lahaptuk inap imam o Betel welatfahon onowe unuk Amazia inowen ap eke hiyag utuk lit, ”Nit Israel ninap fet nenesuhon Yerobeam ambeg lamihinteg hiyag itmihinon tu, ’Hun Amos inowen Israel inap enesehelimu unduhuk lit ap suwon ele holuk fug ulug ap inindi kahal eneptuk. Aren uruk ane ariyen kinang aru siyag aruhu lit teg.

¹¹Amos tu hag toho irisi, ’Yerobeam ino tog elman ware fusuhupmu Israel inap ininggik hele pug toho enengginang embeselug hik isahup ambeg lahup,’ irisi,’ ulug Yerobeam hiyag irik lamihin,” ulug monde fibag.

¹²Monde fibareg Amazia inowen hun Amos hiyag utuk lit, ”Fulu roho yet haruk lahen hahun, huwabuhup tohon o aruwen wilip atmihinteg hibam kinang Yehuda fam lamihin! O Yehuda inaben onggo suburu og hutuk lamuhuben it unubam Allah wene hiyag isaruk laruhun.

¹³O Betel tu ap suwon nit sen nenesuhon inowen Allah wel turuk ibam angge re o aruwen hat hele ap hiyag isaruk laruhun fug!” ulug hiyag itfag.

¹⁴Hiyag itfagma Amos inowen hebeloho Amazia hiyag utuk lit, ”Allah amingmingangge nabi winonen wene hiyag isarukmu onggo og isaruk hag toho an nabi wereg ulug onggo og nutuk nahun welahi fug. An e sawe anggolo ngi reg lit wam foroho lit weregman

¹⁵NINIKNI Allahn lisoho og naptisireg an nubam ele uruk lit, ’Lamihinteg numalikisi Israel inap unubam An nawene hiyag isaruk laruhun,’ ulug hiyag nitisi.

¹⁶Ari fahet NINIKNI Allah ele iminon tu holeg lamin. Haren an nubam, ’Israel inap Allah wene fam komo yig isa fug!’ ulug hiyag nerehenma

¹⁷NINIKNIYEN ele hiyag hutuk lit, ’Humalikisi ap angge men hiyap angge men tog elman war amuhupmu huhe o pumbuk ke yaying til noruk laruhu. Hangginang ap winon fibir amuhupmu hat hamu ap Allah wene holtuk eleg inap enengginangma war aruhun. Israel inap ininggik hele waroho enengginang embeselug hik isahup ambeg lahup,’ ehek,” ulug Amos inowen Amazia hiyag itfag.