Read Angguruk Yali AMOS 8 Bible Online

AMOS 8 - Angguruk Yali bible

AMOS 8

¹NINIKNI suwon Allahn nin eke an nil fenggen naptisimu harikikon tu: Anden yet harukmen hele husin anggen momi rulug wambuk hag tegma yet harikik.[10]

²Yet harikikmu NINIKNI Allahn an nubam, ”Haren nungge yet haruk lahen?” ulug kapal niyarisimu anden, ”Hele husin anggen momi rulug wambuk tegma yet haruk lahi,” ulug hiyag itikik. Hiyag itikikmu NINIKNI Allahn an nubam ele uruk lit, ”An numalikisi Israel inap mako wamburukon horog teg. Iren siyag ane turukon fahet unusuhuk peruk lahi ane ketiyon tu re umbusuhuk fug.

³Hiyaben ap suwon wereg ambeg enehiyeg toho sini yunggultuk angge famen Anden unusuhuk sambil ino piya sini uruk lamuhup. Ap wareg angge anggolo rehen sal enebuk fug angge o kema-kema umbusuhupmu ap enele teng uhup,” irisi.[11]

⁴Hiren ap enengge elehon hunuyuhen sobir isaruk lit ap inine elehon siyahap eneptuk lahebon, anden iminon tu holiyek!

⁵Hiren pikalem keron inam atuk sambil men o sabit sambil men Allah wel turuk lahep angge famen folo-folo hup alepma roti anggen ap winon fam ayeg wabuhukon horog alep peruk lahep. Hinindimuwen wenggel haruk lit, ”Roti anggen sum toron fam fani rurukmu anggin eleg angge famen sum aru anggin ulug nenele si uruk lit tor angge fahet onggo palimu imbik laharuk lamuhuk. Suburu inggila tor angge pug toho embelug su roho embehe ulug un ane uruk lamuhuk.

⁶Suburu siyahon fahet oho onggo palimu heng uruk lamuhuk. Ap enengge elehonen paleg angge werehon yami enebuhukteg uang ano sepatu uyug hililip angge ano iren palehon arimano fahet niren it let enebuhukmu it arimano nit nenemingmingangge welamuhup,” ulug hinindimuwen wenggel haruk lahep.

⁷Ari fahet NINIKNI Allah Israel inaben unuk palimuwap turuk ahun inowen tik-tem toho ele urukon tu holeg lamek, ”It arimanowen siyag ane turukon Anden mondabi napeleg aruhu fug.

⁸Iren turukon fahet kinang yuk tuhumu ap obog tohowen yihi puhup. Ik Nil lahuk wambuk turuk lit ik haglabut watuk hag toho kinang obog toho yuk turuk laruhu,”

⁹ulug NINIKNI suwon Allahn ele il laruk lit, ”Alem angginon unubam umbuhuk sambil ino unukoho mo pik pulmu weregma Anden lisoho pilabik waruhukmu hik aruhu.

¹⁰Hit nenehiyehen yunggultuk lamuhuk perukmen Anden hunusuhukmu hit uba yatuk lit piya sini uruk lamuhup. Allahn nunusehek ulug fesi nong uruk lit honoruk paloho hununggul ahap eneg tebeseruk lamuhup. Ikni men isinga menen unumalik misig enehon war atukon fahet uba yatuk hag toho hiren oho uba yatuk lamuhup. Mun angge man angge siyag aruhumu ap obog tohowen uba yatukmen eneg o ino sambil hup aruhu,”

¹¹ulug NINIKNI suwon Allahn ele il laruk lit, ”We tot welamuhupmu Anden alem mondabi angginon kinang aru fam umbuhukmu suburu obok hag toho welamuhup. Suburu men ik men obok welamuhup fug angge famen noenam welamuhukmu NINIKNI Allahn ele hiyag nisahu ulug it inindi suburu obok hag toho ouk toho welamuhup.

¹²NINIKNI Allah ele holtul ulug yali filen hubula fil sat toho yami rik laruk lit ik eleruk filen ambut fil la wam turuk lamuhup angge famen Allahn ele hiyag isaruk elehen holuhup fug.

¹³O ino sambil hiyap tuhumon men ap kabiniyon men ik oboken inil fulug toho mako wambuhup.

¹⁴’Usasum o Samaria forohowon fam wenggel haruk lahiyonen we tik-tem toho ihi,’ uruk inap arimano mako wambuhup. ’Dan inaben Allah hag toho wereg perukon men Beersyeba inaben nisinga poholmon ulug wel turukon menen holeg lit weregma tik-tem toho ihi,’ uruk inap oho war amuhupteg in am fug teg lamuhup,” ulug Allahn ele uruk.