Read Angguruk Yali AMOS 9 Bible Online

AMOS 9 - Angguruk Yali bible

AMOS 9

¹O misihim sambil anden yet harukmen Ninikni suwon hubu lahaptuk ambeg Allah ibam werehon iraham unduhuk lit ap eke fam ele hiyag itisiyon tu, ”O uwag kinangma yinggihon yuk tukag ulug o uwag unduhukon tum ke ine roho warin! O uwag aruma halog toho ilkal isamihinmu Allah ibam wereg inap ununggul fiyog toho unusimisi. Onoluk welamuson arimano Anden tog elman unusuhuk. Ap misig oho wilip aruhu fug.

²Ap warehon wereg ambeg longgo ul ulug kinangma wambelep halug oho Anden sen enebik lele. Poholma lahalebon oho Anden pilap enebik wale.

³Tom Karmel fam hirag arik lelebon oho Anden hiyag eneplereg sen eneple. Allahn yet nisahu ulug ik saho ahik ahum apma wambelebon oho pisanggo fam unusuhun ulug hiyag etle.

⁴Ap seliyonen it ininggik hele pug toho og eneplep halug oho Anden ap hiyag eselema og eneplep ambeg itano tog fam unusik lelep. Anden enehap siye enebuk fug angge mondabi siyahap enebuhuk.”

⁵NINIKNI suwon Allah pohol ha kinang ha senehon inowen kinang aru inggiken senetukmu ik Nil lahuk wambuk turuk hag toho kinang aru yuk turukmu ap anggolo war atukon fahet obog tohowen fong watuk.

⁶NINIKNI Allahn poholen kinang hondo reg lamag ulug pohol laha fibareg ibam poholma wiri fibag. Ik saho ahik yenggeleg ambehen hinanggoho kinangma hilili feruk. At unuk NINIKNI Allah inowen ari obog toho teberuk.

⁷NINIKNI Allahn ele urukon tu, ”Numalikisi Israel hinap, o Sudan inap embeselug we Israel ninap fahet Allahn wenggel haruk puk fug! Anden hit Mesir kinang famen hondog heneplug wilip atik iyag hag toho Filistin inap oho o Kreta inowen hondog eneplug wilip atuk lit Siria inap oho o Kir inowen og eneplug wilip atik iyag.

⁸An HINIKNI suwon Allahn hit Israel hinap honowe suwon ori menen siyag ane turukon fuki roho yet isaruk lahireg mondabi elehap enebuhuk angge famen Yakuben ondohowonen ondohowon welahebon mondabi siyahap henebuhuk fug,” ulug NINIKNI Allahn ele il laruk lit,

⁹”Anden ap seliyon hiyag isahukmu wamuhupteg Israel hinap welahebon o kema-kema hik-hak hisahup. Aben sak watukmu ubi misig oho wamburuk elegma obog toho hik isaruk hag toho hit obog toho hik-hak hisahup.

¹⁰Numalikisi Israel hinap winonen enele uruk lit, ’Allahn nunumbahaku fugmu alem angginon nunubam aruhu fug,’ ulug siyag ane til laruk inap arimano tog elman war amuhup,” ulug Allahn ele uruk.

¹¹ NINIKNI Allahn ele uruk lit, ”Anden numalikisi fanowap enebuhuk sambil Israel inap indam ap suwon Dauren fet enesugmu welatfag hag toho inine roho welamuhup ulug let eneptuk laruhuk. Ketiya it arimano o halog-halog laruk ibam hag toho atusa angge famen Anden ubahat haloho tam welatfag hag toho wiri fuhuk.

¹²Israel inaben o Edom kinang tot werehon men o pumbuk winon Anden indam ngi reg latikikon oho seneg lamuhup. An HINIKNI Allahn ihiyon ari obog toho turuk laruhuk.

¹³Ari obog toho teko lahu li kinang fano anggolowen suburu yahaltuk sambil ino yahaltuk ambeg nin wiroho yatuk lamuhup. Anggur anggen folo-folo wirik atuken ei yatuk sambil eneg anggen tahantuk lamuhup. Anggur anggen anggolo atuk lit ahaluwe ik fu laruk hag toho punumuwen wamburuk laruhu.

¹⁴Numalikisi Israel inap ketiya siyag toho werehon fobik fanowap enebuhuk. O pumbuk olun atuson arimano nin wiroho kuhupteg welamuhup. Anggur yabuk wit taruk lit ininggarehen anggen tahanoho naruk lamuhup. E winon yabuhubon oho anggen tahan talug naruk lamuhup.

¹⁵Anden kinang hit ngi reg lamuhup ulug hiyag isarik iyahon fam yag eneptuk laruhukmu ap misihen oho hen enebuhu fug,” ulug NINIKNI Allahn ele uruk.