Read Angguruk Yali YUNUS 1 Bible Online

YUNUS 1 - Angguruk Yali bible

YUNUS 1

¹Indam NINIKNI Allahn hun Amitai amloho Yunus fam ele uruk lit,

²”Hat in atmihinteg o pumbuk suwon Niniwe lamihin. Niniwe inap onolok anggolo reg lit weregma Anden yet isarikik angge re Allahn hunusuhu ulug hiyag isa lahun,” ulug hiyag itfag.

³Hiyag itfagma Yunus ino hol hibag angge famen NINIKNI Allahn niyahu rohon yatma hirahoma lamin ulug yali fil o Niniwe la fug angge hubula fil o Yopa libareg yet harukmen kou suwon misig ik saho ahik ahum pali ke hubula fil o Spanyol[1] lul ulug turukmu yet hibag. Kou ino fam lamin ulug onggo wibareg kou waruk inap men kou fam lahibareg Allahn yet niyahu fug ulug o Spanyol fil hirag-hirag libag.

⁴Laruk lit Yunus ino kou apma imbilabi wambibareg noho apeleg toho nohoruk latfag. Nohorukmen NINIKNI Allahn ik ahum pali ke siyelu monde fibagma ik haglabut hum toho waharuk lit kou ino lilibug turuk hag toho turuk latfag. Turukmu kou waruk inap arimano enekol haruk lit enebe wal tanehen ninikni ulug wel eneptukon unubam enele hi roho, ”Let nenebin, let nenebin!” uruk latfag. Kou ino siyag am nowen ulug wibag angge arimano ik ahummu hik isaruk latfag.

⁶Hik isaruk latfagma kou waruk inap onowe ino imbilabi wambibareg yet harukmen Yunus ino nohorukmu yet hibareg at ubam ele uruk lit, ”Tu hag toho turukmu nungge fahet hat nohoruk lahen? In atmihinteg Hikni fam let nenebin ulug heng turuk lamin! Nit war amuhuk tohon hat Hikni inowen indi nisamisi ano,” ulug hiyag itfag.

⁷Hiyag itfareg Yunus men kou waruk inap onowe ino men imbilabiyen lahibagma kou waruk latfag inap arimanowen enele sahaltuk lit, ”Nit welaheyon aruma san siyag ane tirisimu alem ari nunubam aha ulug nonoluk atmisiyen enehangge nunubam hik-hik amul,” ulug enele sahaltuk latfareg enehangge hik-hik atukmen Yunus ubam atfag.

⁸Ubam atfagma kou waruk latfag inap arimanowen Yunus fam enele uruk lit, ”We tem haren siyag ane tirikinmu alem ari nunubam aha? Hat hibam kema? Hat hori men hununggul unuk keyon? Nungge timin ulug waharikin?” ulug kapal hibag.

⁹Kapal hibagma Yunus inowen, ”An Ibrani nahun. An NIKNI Allah poholmon ik men kinang men wal tibag ahun wel turuk lit welahi,” ulug hiyag isibag.

¹⁰Hiyag isibareg, ”Allahn yet niyahu fug ulug hirag-hirag waharikik,” ibag. Ari urukmu hol hibareg kou waruk latfag inap arimano enekol anggolo hibareg at ubam enele uruk lit, ”Tuk fug ane tirikin!” ulug hiyag itfag.

¹¹Hiyag utukmu itano siyelu ine anggolo atuk latfagma ap arimanowen Yunus fam kapal haruk lit, ”Siyelu ari eleg amag ulug nungge ane hat hubam tul?” ulug kapal hibag.

¹²Kapal hibagma Yunusen, ”An ik ahummu hik niyalihipmu siyelu eleg atmisi. Anden siyag ane tirikikmu siyelu ariyen nunusimin ulug turukon ketiya noluk aha,” ulug hiyag isibag.

¹³Yunusen hik neyemek ulug hiyag isibahon hikit toho tuk fug angge kou waruk inap arimanowen ik ilanma lul ulug e fam ik il inine roho watil laruk latfag angge famen ik haglabut nin su atuk latfagma ik ilanma la fug teg latfag.

¹⁴Ari turuk latfagma ap arimanowen NINIKNI Allah fam enele hi roho uruk lit, ”NINIKNI Allah, ap aru hik usul ane ari fahet Haren nit nunusuhun fug! At aruwen siyag ane tirisi fugmen ware feserusa puhun fug. Haren peruk lahen ane hikit toho ari obog toho teko laruk,” ulug sembahyang uruk latfag.

¹⁵Uruk latfareg Yunus ino lisoho wibareg ik ahummu hik isibag. Hik isibagma itano ik haglabut ino eleg atfag.

¹⁶Eleg atfagma kou waruk inap arimano NINIKNI Allah fahet enekol anggolo haruk lit At fahet wam waroho esetfareg Hat wel haptuk lamuhuk ulug sali emberuk latfag.

¹⁷Yunus ino hik isibag li itano NINIKNI Allahn ikan humon misig hiyag itfagma Yunus ambeg watfareg oluk angge pil isibag. Pil isibagma Yunus ino ikan ahummu weregman eneg hup hunduhuk unukoho hunduhuk hinahanam atfag.