Read Angguruk Yali YUNUS 2 Bible Online

YUNUS 2 - Angguruk Yali bible

YUNUS 2

¹Hun Yunus ino ikan ahummu wereg lit IKNI Allah fam sembahyang uruk latfahon tu,

²”NIKNI Allah, an asengseng toho wereg lit Hat hubam nele ine roho irikikmu Haren nele holtikin. Ap warehon wereg ambehen nele hi roho irikikmu Haren let naptikin.

³Haren an ik ahum yaron undama hik niyarikinmu iken eneg waling nasugmu welatikik. Ik haglabut Haren monde ferikinon inowen an hondo nasug latisi.

⁴An nindimuwen wenggel haruk lit NIKNI Allahn olohotman yanggal naptisimu nin suhuloho At wel turuk ibam fanowon ino nilen yet ha la fug teg perikik.

⁵Iken nuwabuk hag ane turuk latisi. Ik ahum suwonen nebe abirangge hondo nasugmu ik ahum undaman hele wilibig anggeyen an nunggul ke hililip teg latisi.

⁶An helep tuwaliyen fam wambirikikteg sok laregma fobik oho husoho wilip am fug teg ambeg hag toho welatikik. War atmin perikikteg nin suhuloho NIKNI Allah Hat hubam wenggel haruk lit let napmihin ulug sembahyang hubam irikikmu Hat hibam fanoma wereg lit nele holtikin. NIKNI Allah, Haren nele holtikinteg an ap warehon sal eneptuk ambeg hag toho weregma lisoho wilip naptikin.

⁸Usangge let enebuk fug tohon foroho inap arimanowen Hat humbaharuk angge famen

⁹Anden te NIKNI ulug wel haptuk lit Hat fahet wam waroho esetuk laruhuk. Anden Hat hubam sali irikik ane hikit toho turuk laruhuk. NIKNI Allah, Haren eneg ap windat enebuk teg lahen,” ulug Yunus inowen Allah wel turuk latfag.

¹⁰Wel turuk latfagma NINIKNI Allahn ikan ino hiyag itfagma Yunus ino ik ilanma kog tibisik libag.