Read Angguruk Yali YUNUS 3 Bible Online

YUNUS 3 - Angguruk Yali bible

YUNUS 3

¹Ik ilanma kog tibisik libagma nin eke NINIKNI Allahn hun Yunus fam ele uruk lit,

²”Hat in atlug o pumbuk suwon Niniwe lamihinteg Anden hiyag hitikik ane hikit toho hiyag isaruk laruhun,” ulug hiyag itfag.

³NINIKNI Allahn hiyag itfag ane hikit toho Yunus ino asum tug tibibareg o Niniwe libag. O Niniwe pumbuk su reg latfagma ap sa-o sa-o pumbuk ino atogman atogma larukmen eneg o hup pirenam atuk latfag.

⁴Yunus ino o Niniwe kik libareg o pumbuk pulmu lamin ulug larukmen hup misig atfagma ele hi roho hiyag isaruk lit, ”Hup teng misig nubam hilag nuwalen 40 welamuhupmu o Niniwe aru olun aruhu,” ulug hiyag isibag.

⁵Hiyag isarukmu hol hibareg Niniwe inap arimanowen Allahn hiyag utukmu we tem hiyag nisaruk peruk latfag. Ari peruk latfareg, ”Hiyang angge welamuhuk,” ulug hiyag isil laruk latfagma ap suwon toron obog tohowen siyag ane turukuk ulug enebene fesi lahaptuk lit suburu na fug angge welatfag.

⁶Ari turukmu Niniwe inap onowe suwon inowen hol hibareg lehoma heriyeg latfag ambehen wambibareg sum wan teg latfahon hog toho embeselug fesi ebene lahabeg angge ulmu hur arik libag.

⁷Hur arik libareg Niniwe inap obog toho hiyag isaruk lit, ”An men ap suwon-suwon menen alem emberuk laheyon aru holeg lamok: Hit obog toho, henembohom sapi, domba, endetuk angge winon arimanowen oho ik men suburu men nahup fug!

⁸Abet henembohomet hit obog toho henebene fesi lahaboho welamuhup. Ari roho wereg lit henele ine roho Allah fam sembahyang uruk lamuhup. Hit henebe wal tanehen ke hare roho laruk lit honolok ane turuk lahebon arimano umbusuhup.

⁹Umbusuhup halug Allahn nunusuhuk perisi ane embeseruk lit nunumbahaku ano. At indimu ahe laharuk ane eleg aruhu halug war amuhuk fug,” ulug hiyag isaruk latfag.

¹⁰Hiyag isibag ane hikit toho Niniwe inaben siyag ane turuk latfahon embeserukmu Allahn yet isibareg hunusuhuk ulug hiyag isibag ane ino imbisibareg unusibag fug.