Read Angguruk Yali YUNUS 4 Bible Online

YUNUS 4 - Angguruk Yali bible

YUNUS 4

¹Allahn Niniwe inap unusibag fug ane fahet Yunus inowen nirim peruk lit ahummu het-pet haruk latfag.

²Het-pet haruk latfareg sembahyang uruk lit, ”NIKNI Allah, an nibamen uwan wilip am fugmu Haren, ’Niniwe inap unusuhuk,’ ulug hiyag nitikin angge famen anden te, ’Haren peruk lahen ane ari fobik umbusuhun,’ irikik fug? Ari fahet an hirahoma lahuk ulug folo-folo o Spanyol fil larikik. Hat hubabut an noluk: Haren inilaheg ulug ap obog toho hindi enesug lahen, ap siyahon fahet oho Hat hindi folo-folo holok atuk lahen fug, ap sa-o sa-o unubam we fano ane eneg turuk lahen, unusuhuk peruk lahen ane folo-folo embeseruk lahen.

³Ari fahet NIKNI Allah, ketiya Haren an nuwarin. An noluk wereg ane ari nirimen fano war atmin,” ulug hiyag itfag.

⁴Hiyag itfagma NINIKNI Allahn hebeloho hiyag utuk lit, ”Haren te alem werehen nindi siyag toho hiyag itmin ulug ehen ano?” ulug hiyag itfag.

⁵Ari ulug hiyag itfagma Yunus ino o pumbuk Niniwe inowen wilip atug libareg o Niniwe yali fil o sabo toron wiri fibareg o pumbuk aru fam nungge ane teko lamisiyon yet haminen welatmin ulug olma kibareg sakoma heriyeg latfag.

⁶Heriyegman NINIKNI Allahn Yunus ino olok haruk ane eleg amag ulug hobut yako lahabe fibagma Yunus unggul pisan toho lahibag. Lahibagma Yunus hobut ino apma sakoma heriyeg ane fahet indimu ahiyeg anggolo roho welatfag.

⁷Welatfagma likiyamon o sakan turukmu Allahn sohole hahon monde fibagma hobut inggila obog toho nibagma siyag atfag.

⁸Siyag atfagma mo lahik waharikim Allahn yali filen homhomo inahan tehon monde fibagma itano mo oloken Yunus ino unggul ayeg narukmu il fulug turuk hag toho turuk latfag. Ari turuk lit Yunus indimuwen an noluk wereg ane nirim ulug wenggel haruk lit, ”Fano war atmin,” uruk latfag.

⁹Ari ibagma Allahn Yunus fam ele uruk lit, ”Hobut ari fahet alem anggin teg ulug nindi siyag toho welahi peruk lahen?” ulug hiyag itfag. Hiyag itfagma Yunusen, ”We tem, alem angginen nindimu nolok toho welahireg fano war atmin peruk lahi,” ibag.

¹⁰Ari ibagma NINIKNI Allahn at ubam ele uruk lit, ”Hobut ari we hup misig fam su atisireg likiyamon siyag aha. Haren hobut ari yaho ferikin fug, amug watuk latikin fug angge famen hobut siyag ahayon ari fahet hindi anggin toho welahen.

¹¹O pumbuk suwon Niniwe ap teng-teng angge teng obog sehelet obog 120.000 tu siyahon, tu fanowon ulug wenggel haruk elehon men, enembohom winag ha fug toho werehon men unubahet Anden nundaman anggin toho wenggeltuk lit nungge fahet nindi enesug laruhuk fug?” ulug hiyag itfag.