Read Angguruk Yali BILANGAN 1 Bible Online

BILANGAN 1 - Angguruk Yali bible

BILANGAN 1

¹Israel inap arimano o Mesir kinang famen wilip atfagma mo ilig atug wirig atfagma pikalem pirenehon ket inam atfag sambil ino NINIKNI Allahn o Sinai lekma o sabo fanowon undaman Musa fam ele uruk lit,

²”Hit Harun menen Israel inap kabiniyon ununggul unuk wal taneg werehon enebe obog toho winag isalihip. We tog abuk inap indag atuk sambilen mo ilig am wirig am turukmen likin fimahen atisiyon pali filon eneg winag isalihipteg onowesi wal taneg werehonet unumalikisiyet suwesingga fam haharoho embelihip.

⁴Hiren winag isarukmu ununggul unuk wal taneg werehon onowe misig-misig hit hiniraham wereg lit let henebukag ulug Anden mumal eneptikik,” ulug hiyag itfag. Allahn mumal enepfahon ununuk tuma ul: [Ununggul unuk] — [Onowe unuk] Ruben — Syedeur amloho Elizur Simeon — Zurisyadai amloho Selumiel Yehuda — Aminadab amloho Nahason Isakhar — Zuar amloho Netaneel Zebulon — Helon amloho Eliab Yusuf amloho — Amihud amloho Efraim — Elisama Yusuf amloho — Pedazur amloho Manasye — Gamaliel Benyamin — Gideoni amloho Abidan Dan — Amisyadai amloho Ahiezer Asyer — Okhran amloho Pagiel Gad — Rehuel amloho Elyasaf Naftali — Enan amloho Ahira

¹⁶Ununuk eheyon arimano Israel inap ununggul unuk wal taneg werehon onowesi roho wereg lit Musa men Harun men let enebukag ulug Allahn mumal enepfag.

¹⁷Allahn mumal enepfahon arimano Musa men Harun menen wol enepfareg

¹⁸pikalem pirenehon ket inam atfag sambil ino NINIKNI Allahn Musa hiyag itfag ane hikit toho Israel inap obog toho o Sinai lekman palu enepfag. Palu enepfareg onowesi arimano menen Israel inap kabiniyon indag atuk sambilen mo ilig am wirig am turukmen likin fimahen atfahon pali filon ununggul unuk wal taneg werehon enebe obog toho winag isaruk lit onowesi man-man werehonet unumalikisiyet ununuk obog toho suwesingga fam haharoho imbibag.

²⁰Yakub amloho monggiyon Ruben inowen ondohowonen ondohowon famen ak turuk lit ap kabiniyon tog abukon ununggul unuk onowesi wal taneg werehon enebe obog toho winag isibareg ununuk suwesingga fam haharoho imbibahon tu: [Ununggul unuk] — [Enebe winag isibahon] Ruben — 46.500 Simeon — 59.300 Gad — 45.650 Yehuda — 74.600 Isakhar — 54.400 Zebulon — 57.400 Efraim — 40.500 Manasye — 32.200 Benyamin — 35.400 Dan — 62.700 Asyer — 41.500 Naftali — 53.400

⁴⁶It enebe winag isibahon obog toho teng-teng angge 603.550 welatfag.

⁴⁷It ununggul unuk winon winag isibag hag toho hun Lewi inowen ondohowonen ondohowon arimano winag isalug suwesingga fam haharoho imbibag fug.

⁴⁸It unubahet NINIKNI Allahn Musa fam ele uruk lit,

⁴⁹”Israel inap tog abukon winag isamihin hag toho Lewi inap enebe winag isalug suwesingga fam haharoho embemihin fug angge famen

⁵⁰Lewi inap arimano hiyag isaruk lit, ’O sabo fanowon Wene Numen haharehon foroho ambeg ino men o ino fam foroho angge men haltuk lamuhup,’ ulug hiyag isamihin. Hiyag isamihin ane hikit toho hit lekma laruk lit Lewi inap arimanowen o sabo fanowonet olma foroho anggeyet paya roho walug laruk lamuhup. Ari roho turuk lamuhup angge re An nibam o sabo ino walinggoho it inibam wiroho welamuhup.

⁵¹Hit welamuhup ambeg embeselug luk ohoma Lewi inaben o sabo fanowon ino halog toho walug laruk lamuhupteg o sabo wiroho welamuhup ulug hiyag hisahuk ambehen An nibam ari nin hebeloho wiri feruk lamuhup. Lewi inaben eneg o sabo fanowon haltuk lamuhupmu ap sa-o sa-o o ino horogma larukon unusuhup.

⁵²Israel inap ununggul unuk winon onowesi tog aptuk ane milal eneptukon wal-wal werehon unumalikisi menen enehangge it wal tanehen hutuk teberuk ambeg walinggoho o sabo wiroho welamuhup.

⁵³Israel inap o sabo fanowon horogma waharukmen An HINIKNI Allahn nolok ane unubam tuhuk tohon Lewi inap eneg o sabo fanowon iraham ke o wiroho wereg lit Wene Numen haharehon foroho ambeg ino foroho lamuhup,” ulug hiyag itfag.

⁵⁴Ari ulug NINIKNI Allahn Musa fam hiyag itfag ane hikit toho Israel inaben turuk latfag.