Read Angguruk Yali BILANGAN 10 Bible Online

BILANGAN 10 - Angguruk Yali bible

BILANGAN 10

¹NINIKNI Allahn Musa fam ele uruk lit,

²”Pinggong ele watukmu hol halug humalikisi Israel inap palu arik waharuk lamuhup ane men o sabo wirig ambeg embeselug wilip atuk lamuhup ane fahet pinggong piren wiri femihin. Wiri feruk lit kik turuk angge fam ili ruruk angge perak teloho pinggong itano wiri femihin.

³Pinggong piren itano watukmu hol halug Israel inap obog toho hat o sabo fanowon sok iraham weregma palu arik waharuk lamuhup.

⁴Pinggong misig watukmu hol halug Israel inap ununggul unuk onowesi eneg hambeg waharuk lamuhup.

⁵Pinggong ele hum toho urukmu hol halug Israel inap inibam yali fil werehon arimano tam wilip atuk lamuhup.

⁶Ininggik pireneg angge pinggong ele hum toho urukmu hol halug Israel inap inibam ik ambut fil werehon arimano wilip atuk lamuhup. Pinggong ele hum toho watuk halug wilip atuk lamuhup,

⁷ele tot toho uruk halug palu arik waharuk lamuhup.

⁸Pinggong itano Harun umalikisi hubu lahaptukon imam arimanowen watuk lamuhup. Pinggong watuk ane fahet ihiyon ari hiren endebuhubonen endebuhubon arimanowen oho senegman eneg welamuhup.

⁹Fobik hit henengginangma weregma ap seliyonen hunusul ulug waharukmu yet isalug pinggong ele hum toho watuk lamuhup. Pinggong ele urukmu An HINIKNI Allahn hol hahukteg hit ap seliyon ininggikmuwen windat heneptuk laruhuk.

¹⁰Allah wel tul ulug henehiyehen yunggultuk sambil men pikalem keron inam atuk sambil men An nubahet hubu lahabul ulug oho An nolohotma wam nul ulug oho pinggong watuk lamuhup. Pinggong ele urukmu hol hahukteg Anden hit fahet wenggel haruk laruhuk. An HINIKNI Allahn nele aru uruk lahi,” ibag.

¹¹Israel inap o Mesir kinangman wilip atfag li mo ilig atug wirig atfagma pikalem pirenehon fam hup likin fimahen atfagma hina o sabo fanowon Allah Wene Numen haharoho werehon foroho ibam ino embeselug palimu lahibag.

¹²Lahibagma Israel inap arimano Sinai lekman o sabo wirig ambeg embeselug larukmen eneg hina it enelukema larukon ino o Paran lekma pok atfag.

¹³Indam oho Israel inap arimano ari hag toho inibam o sabo wiroho wereg ambeg embeselug wilip atfag fug angge famen ketiya eneg NINIKNI Allahn Musa fam hiyag itfag ane hikit toho iraroho wilip atfag.

¹⁴Atamtam Israel inap ununggul unuk hinahanen enehangge Yehuda inaben tohon hutuk teberuk ambeg walinggoho o sabo wiroho welatfahon arimano wilip atfag. It ununuk tuma ul: [Ununggul unuk] — [Onowe unuk] Yehuda — Aminadab amloho Nahason Isakhar — Zuar amloho Netaneel Zebulon — Helon amloho Eliab

¹⁷It arimano wilip atfagma hun Lewi inowen ondohowonen ondohowon Gerson inap men Merari inap menen o sabo fanowon halog tibibahon ino ha roho wilip atug libag.

¹⁸It onombolim ununggul unuk hinahanen enehangge Ruben inaben tohon hutuk teberuk ambeg walinggoho o sabo wiroho welatfahon arimano wilip atfag. It ununuk tuma ul: [Ununggul unuk] — [Onowe unuk] Ruben — Syedeur amloho Elizur Simeon — Zurisyadai amloho Selumiel Gad — Rehuel amloho Elyasaf

²¹It onombolim Lewi inowen ondohowonen ondohowon Kehat inap arimanowen o sabo fanowon fam foroho angge ha roho wilip atug libag. Libareg nohul peruk ambeg uwan kuk fugmu Lewi inap tam libahon arimanowen o sabo fanowon nin hebeloho wiri fibagma eneg Kehat inaben o sabo fanowon fam foroho angge arimano imbik watfag.

²²Kehat inap onombolim ununggul unuk hinahanen enehangge Efraim inaben tohon hutuk teberuk ambeg walinggoho o sabo wiroho welatfahon arimano wilip atfag. It ununuk tuma ul: [Ununggul unuk] — [Onowe unuk] Efraim — Amihud amloho Elisama Manasye — Pedazur amloho Gamaliel Benyamin — Gideoni amloho Abidan

²⁵Fotog-fotogma ununggul unuk hinahanen enehangge Dan inaben tohon hutuk teberuk ambeg walinggoho o sabo wiroho welatfahon arimano wilip atfag. It ununuk tuma ul: [Ununggul unuk] — [Onowe unuk] Dan — Amisyadai amloho Ahiezer Asyer — Okhran amloho Pagiel Naftali — Enan amloho Ahira

²⁸O ino sambil Israel inap ununggul unuk wal taneg werehon arimanowen o sabo wirig ambeg embeselug wilip atfag hag toho fobik oho iraroho wilip atuk latfag.

²⁹Wilip amuk oho lit Musa inowen iyamal Hobab [1]o Midian ahun Rehuel amloho ino fam, ”Niyamal, nit NINIKNI Allahn kinang og hisahuk irisi ambeg lahuken hat nit men lul. Lahuk ambehen NINIKNI Allahn nit Israel ninap nunubam fano ane turuk laruhuk ulug sali emberisi angge re niren oho hat hubam fano ane eneg turuk lamuhuk,” ulug hiyag itfag.

³⁰Hiyag itfagma Hobab inowen Musa fam, ”An hit men lul fug, an nori wereg ambeg lahuk,” ulug hiyag itfag.

³¹Hiyag itfagma Musa inowen, ”Nit nunumbahalug la fug! Hat eneg lekma laruk lit nohoruk ambeg holuk teg lahen angge re nit laruk lamuhuk ke hiyag nisaruk laruhunen nit men lul.

³²Ambiyeg lul halug NINIKNI Allahn fanowon og nisaruk laruhuwon arimano niren minggiroho hat og hutuk lamuhuk,” ulug hiyag itfag.

³³Ari ulug hiyag itfagma Israel inap arimano wilip atfareg Allah antom Sinai ino embeselug larukmen hup hinahanam atfag. E sali roho wirihon peti Allah Wene Numen haharehon kilabeg angge ino paya roho walug laruk lit kema nohul ulug tam atukmu laruk latfag.

³⁴Wilip atuk lit unukoho larukmu NINIKNI Allah ino hina sehelimu wereg lit it palimu laruk latfag.

³⁵Peti Allahn tohon ino paya roho walug lul ulug turukmen Musa inowen ele uruk lit, ”NINIKNI Allah, in atmihinteg Hat fahet inirim peruk inap arimano linggik-longgo ukag ulug hik-hak isa lamihin,” uruk latfag.

³⁶Peti ino nohul peruk ambeg ino imbik larukmu Musa inowen, ”NINIKNI Allah, Israel ninap nenebe teng-teng angge winag nisa fug toho welahe ambeg suhuloho watmihin,” uruk latfag.