Read Angguruk Yali BILANGAN 11 Bible Online

BILANGAN 11 - Angguruk Yali bible

BILANGAN 11

¹Welatfareg Israel inaben siyag toho welahe ulug NINIKNI Allah ubam enele urukmu hol hibareg NINIKNI Allah ino olok haruk lit indok ambulpul unubam pilabik watfagma o witfag ambeg atogma nil laruk latfag.

²Nil larukmu yet hibareg ap arimanowen let nenebin ulug enele hi roho Musa fam uruk latfag. Urukmu Musan hol hibareg indok aru ware fesemihin ulug NINIKNI Allah ubam sembahyang ibagma indok ino war atfag.

³NINIKNI Allahn indok ambulpul Israel inap unubam pilabik watfag ambeg ino Tabera[2] suwalfag.

⁴Israel inap lekma larukmu ap pohon oho ambiyeg laruk latfag. Ap pohon arimanowen wam oboken ulug enele anggolo il larukmu hol isibareg Israel inaben oho uba yatuk lit, ”Ap san wam unu og nisamisi?

⁵Nit o Mesir wereg lit ikan yuhun-at naruk lit kuluk oho e anggen oho, wiye, suwan, amben angge eke hag eke hag naruk latukukon wenggel haruk lahe.

⁶Ketiya we suburu manna narukmen eneg ninirim atuk latisi,” uruk latfag.

⁷Manna arimano kuluk anggen yanggowon hag toho wereg latfag.

⁸Hubanggo hibilil poholman wambik waharukon men mangno roho o witfag ambeg ino wambik waharuk latfag. Sakan turukmu wilip atug ap arimanowen andog til la wam turuk latfag. Andog toho kilaptuk lit helep fam lilibug toho ul hag atukon ino esetukmu kue atuk latfag. Kue e zaitun ahaluwe minyak fam wiratukon unduk fano turuk hag toho turuk latfag.

¹⁰Inibam wal-wal sokolma ap piren hinahan unduhuk lit enele siyag toho urukmu Musan hol isibareg NINIKNI Allahn olok hamisi ulug indi anggin atfag.

¹¹Indi anggin atfagma NINIKNI Allah fam hiyag utuk lit, ”Nungge fahet an nele ying naptuk lahen? Nungge fahet Haren an fahet hirimen ap arimano fet enesug laruhun ulug hiyag nutuk lit angginon nubam emberuk lahen?

¹²Anden ap aruma nahummu atisimu indag eneptikik ano? Haren an fahet ap enemingmingangge malik fuwon forohowon hag toho wereg ulug hiyag nutuk lit, ’Ap arimano handuhunmu yabako kinang hunumbasi hiyag isiyahon fam og eneplug lahun,’ ulug hiyag nutuk lahen?

¹³Iren te, ’Wam unu og nisimin,’ ulug an nolohotman uba yatukon tu hol isimin! Keman wak laminteg ap anggolo aruma og isaminen uruk-o!

¹⁴Ap arimano fet enesug laruhun ulug hiyag nitikin angge famen an namu wereg lit nine elehen fet enesug lam fug teg lahi.

¹⁵Haren fobik oho an nele ying naptukmu asengseng toho welahi ha nowen Haren hindi nasug lit we ketiya eneg nuwatmihin,” ibag.

¹⁶Ari ibagma NINIKNI Allahn Musa hiyag utuk lit, ”Israel inap onowesi haren inine roho milal eneptukon ulug holuk teg inap teng hinahan 70 wol enepmihinteg hondog eneplug An men Ambi Atuk Ibam watmihin. Hondog eneplug watmihinmu hat hiraham unduhuk lamusa.

¹⁷Unduhukmu An wambik watlug hat hubam nele iminteg hime fanowon Anden hat og hitikikon tot minggiroho waminteg ap arimano unubam embemin. Embemin halug Israel inap fet enesug laruhun ulug angginon hubam emberikikon ino hat hamuwen asengseng toho ha ruhun tohon iret ambiyeg let toho ha ruruk lamuhup.

¹⁸Ketiya humalikisi Israel inap unubam hiyag isaruk lit, ’Allah sono waruhu ulug hunubam wereg ane hale feruk lamek! Hiren uba yatuk lit, ’Ap san wam unu og nisamisi? O Mesir wereg lit fano roho welatukuk,’ ulug henele uruk lahebon ino NINIKNI Allahn holtisireg suwe unu og hisa waruhumu nahup.

¹⁹Hup misig piren fam eneg nahuk puk fug. Hup num famen tulug likin fumahen oho naruk lamuhuk puk fug.

²⁰Pikalem misig hunduko narukmen eneg hinirimen me henepe turuk lamuhup. NINIKNI Allah nit sehelimu werehon ino henembol yig utuk lit, ’Nungge fahet o Mesiren wilip atukuk?’ ulug At olohotman uba yatuk latikibon fahet ari hag toho hunubam teko lahu,’ ulug hiyag isamihin,” ibag.

²¹Ari ibagma Musa inowen NINIKNI Allah hiyag utuk lit, ”Anden fet enesug lahi inap aruma teng-teng angge winag isa fug toho 600.000 wereg angge re Haren te, ’Suwe unu og isahukmu pikalem misig hunduko enehum ouk toho naruk lamuhup,’ ulug nangginoho ehen ha reg lahen?

²²Wam sapi domba anggolo roho waroho esetla halug oho enehum ouk toho na hag teg lalep ano? Ikan ik saho ikma werehon obog toho senetla halug oho osoho nalug enehum ouk alep?” ulug hiyag itfag.

²³Hiyag itfagma NINIKNI Allahn, ”Allah inggik ine wereg eleg peruk lahen? Anden ihiyon hikit toho teko lamisi ano eleg ano ulug yet hamihin,” ibag.

²⁴Ibagma Musa ino wilip atug NINIKNI Allahn hiyag itfag ane ino Israel inap hiyag isa libag. Hiyag isa libareg Israel inap onowesi teng hinahan 70 wol enepfareg Allah men Ambi Atuk Ibam ino walinggoho in arik lalihip ulug hiyag isibag.

²⁵In arik libagma NINIKNI Allah hina sehelimu wambik watfareg Musa ubam ele uruk latfag. Ele ibareg hime fanowon tam Musa og itfahon tot minggiroho wibareg ap suwon-suwon unubam imbibag. Allah ahime fanowon ino unubam atukmu amingmingangge nabiyen uruk hag toho nenehiyehen ulug enele hi roho yunggultuk latfareg imbisibag.

²⁶Israel inap onowesi teng hinahan ununuk suwesingga fam hahatfahon arimano obog toho Allah men Ambi Atuk Ambeg ino larukmu ap piren ununuk te Eldad men Medad men it inim ambiyeg la fug angge inibam pok atfag. Pok atfagma Allah ahime fanowon ino it unubam oho atukmu nenehiyeg ulug enele hi roho yunggultuk latfag.

²⁷Yunggultukmu yet isibareg ap kabiniyon misig Musa hiyag irik libag.

²⁸Musa hiyag utukmu itano Nun amloho Yosua ebe kabinimuwen tulug Musa let turuk latfahon inowen hol hibareg Musa fam, ”Nikni, henele imbisiyek ulug hiyag isimin!” ibag.

²⁹Ibagma Musa inowen te, ”Nungge fahet haren Musa ibil atmin peruk lahen? NINIKNI Allahn umalikisi obog toho unubam Ahime fanowon og eselepma it obog toho Allah amingmingangge nabi welalep halug fano peruk lahi,” ibag.

³⁰Ari ibareg Musa ino ap suwon-suwon teng hinahan arimano men inibam libag.

³¹Libagma NINIKNI Allahn siyelu monde fibagma ik suwon yenggelehon filen waharuk lit suwe puyuh yalma hahon walug watfagma Israel inap inibam walinggoho wamburukmu kinang obog toho keleg atuk latfag. Suwe eke fam eke fam palu mot-mot turuk latfahon arimano il misig lahabegma yali fil hubula fil hup misihim kalem laruk ambeg arimano oho kinangma suwe arimano eneg wereg latfag.

³²Suwe arimano wambibag sul ino ak tibareg Israel inap arimanowen andog tik larukmen eneg hubanggo oho unukoho oho turuk latfag. Ap wal tanehen suwe andog tibahon arimano anggin teg 1.000 kilogram latfagma lilog amag ulug o wirig ambeg walinggoho kinangma le ruruk latfag.

³³Iren suwe arimano uwan sahaltug pil ha fugmu NINIKNI Allahn olok haruk lit ouk alem angginon unubam emberukmu ap anggolo war atuk latfag.

³⁴Enebuwap toho nibareg war atfahon arimano kinangma sal enepfag ambeg ino ”Enebuwap toho Naruson Sal enepfag Ambeg” suwalfag.

³⁵Suwalfag ambeg ino embeselug o Hazerot libareg o wiroho welatfag.