Read Angguruk Yali BILANGAN 12 Bible Online

BILANGAN 12 - Angguruk Yali bible

BILANGAN 12

¹Musa inowen o Kus hiyap eke hilibahon fahet Miryam men Harun menen Musa abug uruk lit,

²”NINIKNI Allah inowen we Musa feneyen ele Israel hinap hiyag hisaruk ano? Nit feneyen ele hiyag hisaruk eleg?” uruk latfag. Uruk latfahon ino NINIKNI Allahn hol hibag.

³Musa indi imbik wamburuk lit welatfag hag toho ap winon kinang atogman atogma eke wereg eleg.

⁴Weregma NINIKNI Allahn Musa men Harun men Miryam men ele hiyag isaruk lit, ”Hit henebe hinahan An Allah men Ambi Atuk Ambeg lalihip,” ibagma libag.

⁵Libagma NINIKNI Allah hina anggulog sehelimu wambik watfareg Allah men Ambi Atuk Ibam sokolma unduhuk lit Harun men Miryam men wol enepfag. Watfagma

⁶NINIKNI Allahn hiyag isaruk lit, ”Anden iminon tu holeg lamek: Anden wene hiyag isaruk lamuhup ulug nabi henembeg monde feruk lahiyon unubam fulu roho yet haruk ane men nei warukon men feneyen nele hiyag isaruk lahi.

⁷Ari hag toho An namingmingangge Musa ubam nele hiyag utuk lahi fug. Anden numalikisi Israel inap obog toho at inggikmu emberikik.

⁸An men at men nonorohole ambi atuk lit nele indit toho uk fug angge we pikit toho hiyag utuk lahi. An nebe oho at inowen yet niyaruk latisi angge famen nungge fahet hit hininggali eleg toho An namingmingangge Musa abug uruk lahep?” ulug

⁹ele olok toho pet enepfareg libag.

¹⁰Hina ino fam Allah men Ambi Atuk Ibam embeselug laharukmu itano hiyap Miryam ino ebene salukangge anggolo regma ahap yanggo atfag. Owe Harun inowen hebeloho yet harukmen at ino ebene salukangge reg latfagma yet hibareg

¹¹Musa fam ele uruk lit, ”Nowe, nit ninindi anggat teg eleg lit siyag ane turuk latukukon ariyen siyag amuhuk tohon let nenepmihin.

¹²Malik isinga ahummuwen wareg angge indag atukmu ahap ino tot filik teg hag toho Miryam ubam ahama umbusuk fug,” ulug hiyag itfag.

¹³Hiyag itfagma Musa inowen, ”NINIKNI Allah, Haren hihitmihin,” ulug hiyag itfag.

¹⁴Hiyag itfagma NINIKNI Allahn hebeloho hiyag utuk lit, ”Miryam ino ikniyen olohotma wasubag sup eselep halug inggali harukmen eneg hup sabirenam alep fug ano? Ari fahet hit hinibamen hondoholug amumu imbisik lalihipmu hup sabiren welaruhureg nin suhuloho waruhu,” ulug hiyag itfag.

¹⁵Hiyag itfagma Miryam ino hup sabirenam anggenma welaruhun ulug wili fisibareg Israel inap arimano la fug angge weregman Miryam ino suhuloho enembeg kik watfag.

¹⁶Kik watfagma ap arimano o Hazerot embeselug o Paran lekma o sabo wirik libag.