Read Angguruk Yali BILANGAN 13 Bible Online

BILANGAN 13 - Angguruk Yali bible

BILANGAN 13

¹Welatfareg NINIKNI Allahn Musa hiyag utuk lit,

²”Israel inap ununggul unuk wal-wal werehon onowesi misig-misig wol enepmihinteg kinang Kanaan Allahn og nisahu ambeg aluwat ha lalihip ulug mon enepmihin,” ibag.

³Allahn ibag ane hikit toho Musa inowen o Paran lekma inowen Israel inap onowesi mon enepfahon ununuk tuma ul: [Ununggul unuk] — [Onowe unuk] Ruben — hun Zakur amloho Syamua Simeon — hun Hori amloho Safat Yehuda — hun Yefune amloho Kaleb Isakhar — hun Yusuf amloho Yigal Efraim — hun Nun amloho Hosea Benyamin — hun Rafu amloho Palti Zebulon — hun Sodi amloho Gadiel Manasye — hun Susi amloho Gadi Dan — hun Gemali amloho Amiel Asyer — hun Mikhael amloho Setur Naftali — hun Wofsi amloho Nahbi Gad — hun Makhi amloho Guel

¹⁶Onowesi arimano kinang Kanaan ino aluwat ha lalihip ulug mon enepfag. Mon eneptuk lit Musa inowen Nun amloho Hosea ino unuk keron Yosua suwalfag.

¹⁷Ap suwon-suwon arimano Musa inowen mon eneptuk lit, ”Kinang Kanaan ik ambut filen kuhupteg aluwat hil laruk lit punu wereg ke lahakupteg

¹⁸ap wereg ane su roho wereg ano tot toho wereg ano it inine wereg ano inine eleg ano ulug aluwat isahup.

¹⁹O pumbuk arimano walinggoho elehet oho ano eleg ano ulug kim isa lahup. Kinang aru fano weregma e anggolo wilip atuk ano ulug pen hahup. Hinindi wirik toho welamuhup. E anggen kinang ino famen wilip atukon unuhin walug wamuhup,” ulug mon enepfag. Mon enepfagma itano hele anggur anggen uruk latfag li libag.

²¹Libareg kinang Kanaan ino fam ik ambut filen kibareg aluwat hil laruk lit Zin lek keyen tulug ik eleruk fil o pumbuk Rehob o Hamat laruk ke horogma libag.

²²Tam-tam ik ambut filen kuruk lit itano o pumbuk Hebron libag. Hebron ino hun Enak umalikisi Ahiman, Sesai, Talmai menen ondohowon welatfag ambeg ino amukasi witfagma mo sabiren atfagma eneg o pumbuk Zoan Mesir kinangma werehon ino witfag.

²³O Hebron embeselug laruk lit Eskol tonggoma libag ambeg inowen hele anggur anggen humon eke tahanoho ap pirenen paya rulug laruk latfag. E anggen winon oho mangno roho walug laruk latfag.

²⁴Tonggo ino Israel inaben hele anggur anggen tahanfag ambeg ino unuk Eskol Tonggoma[3] suwalfag.

²⁵Kinang Kanaan ino walinggoho kim ha larukmen hup teng misihen nubam hilag nuwalen atfagma 40 suhuloho watfareg

²⁶Musa men Harun men unumalikisi Israel inap obog toho o Kades Paran lekma werehon arimano unubam hibag ane ino hiyag isaruk lit e anggen walug watfahon arimano unug haruk latfag.

²⁷Musa fam enele uruk lit, ”Kinang ino fam sapi ag owe men kim ahaluwe men eleg am fug angge anggolo weregma kim harukuk. E anggen unuhin walug waharukukon aruma kim himin!

²⁸We ap kinang ino fam werehon arimano inine anggolo regma inibam pumbuk humon walinggoho elehet oko kilabeg lit wereg. Ap enebe yat anggolowon tam welatfahonen ondohowon oho isarukuk.

²⁹Kinang ino ik ambut fil Amalek inap weregma punu wereg ke Het inap, Yebus inap, Amori inap wereg. Ik suwon yenggelehon ayegma men ik Yordan ayegma oho Kanaan inap welatusa,” ulug hiyag itfag.

³⁰Hiyag utukmu Israel inap arimanowen hol hibareg Musa fam nenele siyag toho ul ulug turukmen Kaleb inowen inindi seyap enepmin ulug hiyag isaruk lit, ”Hayen nori, nit nonolok anggolo welahe angge re ap arimano unusuruk lit enengginang nit ngi arik lahuk,” ulug hiyag isibag.

³¹Hiyag isibagma ori ambiyeg aluwat ha libahon arimanowen enele uruk lit, ”Eleg, it arimano onolok anggolo werehen it men tog abuk fug teg lahe,” ibag.

³²Ari ibareg kinang aluwat ha libahon ino fahet enele si-si ane Israel inap obog toho hiyag isil laruk lit, ”Kinang inowen ap werehon arimano oho siyahap eneptuk. Ap niren kim isarukukon arimano enebe yat anggolo regma isarukuk.

³³Hun Enak inowen ondohowonen ondohowon enebe palimu welatusama it onolohotman nit nenebe herenangge toron hag toho welahe perukuk hag toho iren oho ari perusa lit teg,” ulug hiyag isil libag.