Read Angguruk Yali BILANGAN 14 Bible Online

BILANGAN 14 - Angguruk Yali bible

BILANGAN 14

¹Ari ulug hiyag isil larukmu hol hibareg Israel inap arimanowen hup misig hunduko enele hum ngi uruk lit uba yatuk latfag.

²Uba yatuk lit Musa men Harun men unubam enele siyag toho, ”O Mesiren ano lekman ano war ala fano.

³Nungge fahet NINIKNI Allahn kinang ari fam hondog eneplug lahuk ulug waharisi? Hondog neneplug lahu ambeg inowen tog elman war amuhukmu nunuhesi nunumalikisi men sen enebuhup tohon suhuloho Mesir lahuk,” uruk latfag.

⁴Ari ibareg it-it enele uruk lit, ”Nit sen nenesuhon eke lahabulteg o Mesir suhuloho lul,” ulug sahaltuk latfag.

⁵Ari ulug enele sahaltukmu hol isibareg Musa men Harun men Israel inap onolohotman onorohole han kinangma kunuk arik larukmu

⁶Nun amloho Yosua men Yefune amloho Kaleb men it winon inim kinang ino aluwat ha libahon itanowen ninindi siyag aha ulug enesum wan teg latfahon tararag feseruk lit

⁷Israel inap unubam, ”Kinang kim isarukuk ambeg ino fano anggolo reg.

⁸NINIKNI Allahn indi nenesug laruhu halug kinang sapi ag owe men kim ahaluwe men mondeg ambeg ino fam hondog neneplug lahureg hiyag nisahu.

⁹NINIKNI Allah ele ying turuk lam fug! Kinang ino fam wereg inap arimano niren apmayap enebuhuk angge re henekol ha fug! Iren Allah hag toho wereg lit nit ili og neneptuk lamuhup perukon arimano eleg latusa, nit te NINIKNI Allah nit ninim werehen henekol ha fug!” ulug hiyag isibag.

¹⁰Hiyag isibagma itano Israel inap arimanowen helep fam unusul ulug turukmen NINIKNI Allah umbagpag turukon seleg ino Allah men Ambi Atuk Ibam ino palimu inam atukmu yet hibag.

¹¹Yet hibagma NINIKNI Allahn Musa fam ele uruk lit, ”Anden ap aruma onolohotman enehangge eke hag eke hag aben tuk fug teg ane turuk latikik angge famen it enembol yig nutuk lit An nubam wenggel niyaruk eleg ane ino nosambil umbusuhup?

¹²Ari roho eneg turuken Anden ouk alem suwon unubam emberuk lit it obog toho elehap enebuhuk angge famen hat humalikisi Anden anggolowap enebuhukmu Israel inap enebe we tor angge inine eleg toho weregma hat humalikisiyen endebuhubon arimano enebe anggolo inine roho welamuhup,” ulug hiyag itfag.

¹³Hiyag itfagma Musa inowen NINIKNI Allah fam, ”NIKNI, Mesir inaben hol harukmen Allah inggik ineyon inowen umalikisi o Mesiren hondog eneplug waharisireg obog toho elehap eneptisi urukmu hol hahup tohon!

¹⁴Hol hahupteg kinang Kanaan fam wereg inap unubam oho hiyag isa nowen. Nit fahet INIKNI Allah it inim wereg lit onolohotman inam atuk lit unukoho hina anggulog fam, hubanggo indok ambulpul lahabeg umbagpag turukon fam enelukema laruk urukmu kinang Kanaan fam wereg inaben hol harusa lit teg.

¹⁵Haren tam fano ane turuk latikinon fahet ap o pumbuk winonen hol harusareg nin fobik hol harukmen Allah inowen umalikisi obog toho elehap eneptisi urukmu hol hahupteg it enele uruk lit,

¹⁶’Allah ino ine elehen umalikisi kinang og hisahuk irisi ambeg ino hondog eneplug la fug tehen lekman unusirisi,’ uruk lamuhup.

¹⁷Ari uruk lamuhup tohon Haren sali emberikinon hikit toho hinggik ineyon fam let nenepmihin.

¹⁸Haren sali emberuk lit, ’An HINIKNI Allah folo nolok am fug angge ap obog toho nindi enesug lahi. Aben siyag ane turuk lit An nele ying naptuk ane arimano Anden eleha feseruk lahi angge famen ap siyag ane turukon Allahn alem angginon unubam emberuk eleg peruk lam fug. An enembol yig nutuk inap arimanowen siyag ane turukon fahet unumalikisi men unumbusagsi men unumbasi men Anden alem angginon unubam emberuk lahi,’ ulug sali emberikin.

¹⁹Haren numalikisi nindi anggolo enesug lahi irikinon hikit toho ap aruma o Mesiren wilip atusa sambilen siyag ane eneg til laruk latuson Haren elehap turuk latikin hag toho ketiya oho elehap timihinen heng haptuk lahi,” ibag.

²⁰Ibagma NINIKNI Allahn Musa hiyag utuk lit, ”Haren heng nabehen ane hikit toho elehap turuk lahi.

²¹An mondabi noluk wereg lit kinang atogman atogma seneg lahiyonen nele tem toho iminon tu:

²²An umbagpag turuk lahiyonen o Mesiren men lekman men alem eke hag eke hag aben tuk fug tehon turukmu ap aruman yet niyaruk latusa angge famen An nele holuk fug angge wal niyarukmen eneg wereg.

²³Ari roho eneg An nele ying naptuken ap aruma misig oho kinang unumbasi hiyag isiyag ambeg ino lahup fug.

²⁴We An namingmingangge Kaleb inowen ori winonen wenggel haruk hag toho puk fug angge An men nininggik ahandip toho welahereg Anden kinang aluwat ha larisi ambeg ino hondoko imbisik lahuk. Ketiya Amalek inap men Kanaan inap men tonggoma wereg ambeg arimano fobik Kaleb umalikisi menen ngi amuhup. Ari fahet sono hit hebeloho lek keyen ik Teluk Akaba fil lahup,” ulug hiyag itfag.

²⁶NINIKNI Allahn Musa men Harun men nin ele hiyag isaruk lit,

²⁷”Ap siyahon aruman enele siyag toho eneg nubam urukon ino nosambil umbusuhup? Enele anggolo urukmen warukmen eneg Anden holtikik.

²⁸Ari fahet hiren hebeloho hiyag isalihibon te tu, ’NINIKNI Allahn ele urukon holeg lamek! Hiren An nolohotman henele anggolo uruk latikip ane hikit toho Anden hit hunubam tuhuk ulug An mondabi noluk welahiyonen tem toho hiyag hisaruk lahi.

²⁹Henele honolok toho hiyag nutuk latikibon fahet hit obog toho lekman waroho lin-lan uhup. Ap kabiniyonet sabalonet tog abukon obog toho war atukmu

³⁰we Kaleb men Yosua men kinang Anden hunubam sali emberikik ambeg kuhup.

³¹Nunumalikisi ap seliyonen sen enebuhup uruk latikip angge famen Anden kinang nit kuhuk fug uruk lahep ambeg ino hunumalikisi hondog eneplug lahukmu it ngi amuhup angge famen

³²hit henebe lekman waroho lin-lan uhup.

³³Hiren An numbaharikibon famen hit hunumalikisiyen oho enembohom foroho lit lekma mase ril larukmen eneg mo teng misihen nubam hilag nuwalen 40 atukmu hit obog toho war atuk lamuhup.

³⁴Hiren kinang Kanaan fam larikipteg aluwat harukmen hup teng misihen nubam hilag nuwalen 40 atisi hikit toho hit lekman asengseng toho weregman eneg mo teng misihen nubam hilag nuwalen 40 aruhu. Hiren kinang Kanaan fam larikipteg hup aluwat haruk latikip sul wal-wal fahet Anden wirim tuhuk ulug hit mo eke fam eke fam lekman mase ril larukmen eneg teng misihen nubam hilag nuwalen aruhu. Aruhumu nit Allah men hili roho welahe ane ariyen siyag toho welahe ulug honoluk aruhu.

³⁵Hit honolok hinaben luhaloho An nele ying naptuk lahebon, An HINIKNI Allahn alem ihiyon ari hunubam umbuhukmu hit obog toho lekman war atuk lamuhup ulug nele uruk lahiyon aru uwag oko wahuk fug,’ ulug hiyag isamihin,” ibag.

³⁶Musan kinang ino aluwat ha lalihip ulug mon enepfag inap arimano suhuloho watfareg kinang hibahon fahet enele si-si ane hiyag isil larukmu Israel inap arimanowen NINIKNI Allah ubam enele siyag toho uruk latfag. Alem ari fahet NINIKNI Allahn ap arimano unubam ouk angginon imbibagma war atuk latfag.

³⁸Onori ambiyeg libahon obog toho war atukmu we Yosua men Kaleb men war atfag fug.

³⁹ NINIKNI Allahn ibag ane Musa inowen Israel inap unubam hiyag isibagma enele hum toho uba yatuk latfag.

⁴⁰Noholug likiyanet in atug punu wereg ke lahul ulug enele uruk lit, ”Niren siyag ane turuk latukuk angge famen ketiya re NINIKNI Allahn hiyag nisarisi ambeg lahulen turuk lahe,” uruk latfag.

⁴¹Ari urukmu Musan hiyag isaruk lit, ”Nungge fahet ketiya NINIKNI Allahn irisiyon ino sobir isaruk lahep? Hit hinindimuwen wenggel haruk lahep ane ari teko lahu fug.

⁴²Hit te lahuk fug! NINIKNI Allah hit men wereg elegma ap seliyonen waroho apmayap henebuhup.

⁴³Amalek inap men Kanaan inap men enembeg lahup halug tog elman war amuhup. Hiren NINIKNI Allah henembol yig utuk lahepma Ar oho hit men welaruhu fug,” ulug hiyag isibag.

⁴⁴Hiyag isibag ane ino holuk fug angge Israel inap arimano punu wereg ke lahibag. It laharukmu Musa men peti Allahn tohon ino men o sabo wirig ambehen wilip am fug angge welatfag.

⁴⁵Laharukmen Amalek inap men Kanaan inap men punu ke werehon arimanowen yanggal enebil wamburuk lit o Horma imbisik libag.