Read Angguruk Yali BILANGAN 15 Bible Online

BILANGAN 15 - Angguruk Yali bible

BILANGAN 15

¹NINIKNI Allahn Musa fam ele uruk lit,

²”Haren Israel inap hiyag isamihinon tu: Hit Anden og hisahuk ambeg kuhupteg wereg lit

³Allah wel turuk sambil palu atuk lamuhup halug oho, Allah nungge-nungge og uruhuk ulug sali umbuhubon hikirap turuk lamuhup halug oho, hinindiyen At fahet hubu lahaptuk lamuhup halug oho NINIKNI Allahn amben fano pukag ulug wam sapi kambing domba waroho hubu lahaptuk lamuhup.

⁴Ari roho turuk lamuhup halug hiren sebe roho roti anggen imbik waharuk lit ik oho hilili feruk lamuhup. Ap san wam domba umalik misig walug waharukon arimanowen roti anggen lilibug tehon kou misig men e zaitun ahaluwe kubag misig men mangno roho tag tebelug imbik waharuk lit hele anggur ahaluwe kubag misig hilili feruk lamuhup.

⁶Ap san wam domba yuhambukon misig walug waharukon arimanowen roti anggen lilibug tehon kou piren men e zaitun ahaluwe kubag toron piren men mangno roho tag tebelug imbik waharuk lit

⁷hele anggur ahaluwe kubag toron piren hilili feruk lamuhup. Ari obog toho walug waharuk lamuhubon fahet NINIKNI Allahn amben fano peruk laruhu.

⁸Ap san Allah nungge-nungge og uruhuk ulug sali emberukon hikirap timin peruk lir oho, NINIKNI Allah olohotman wam waroho nul peruk lir oho, wam sapi eke waroho hubu lahaptuk halug oho, abirangge yaltuk halug oho

⁹iren sebe roho roti anggen lilibug tehon kou hinahan men e zaitun ahaluwe kubag piren men mangno roho tag tebelug imbik waharuk lit

¹⁰hele anggur ahaluwe kubag piren hilili feruk lamuhup. Ari obog toho walug waharuk lamuhubon fahet NINIKNI Allahn amben fano peruk laruhu.

¹¹Hiren wam piren, hinahan waroho hubu lahabul peruk lamuhup halug wam itano hininggik winag isaruk lamuhup ane hikit toho suburu roti anggen men hele anggur ahaluwe men sebe roho walug waharuk lamuhup.

¹³Israel inap obog tohowen NINIKNI Allahn amben fano pukag ulug hubu lahaptuk lit Anden ihiyon hikit toho roti anggen men ik men sebe roho walug waharuk lamuhup.

¹⁴Iren turuk lamuhup hag toho ap pohon amusun toho hit sehelimu welamuhuk perukon men tot welamuhukteg ninibam lahuk perukonen oho turuk lamuhup.

¹⁵Ari roho turuk lamuhup ulug Allahn embehek ane ari hit Allah umalikisi welahebonen senegman eneg welamuhup hag toho ap pohonen oho mondabi seneg lamuhup. NINIKNI Allahn hit Israel hinap yuhon men ap pohon hit sehelimu werehon men ambi reg peruk.

¹⁶Ari fahet Allahn tu men ari men turuk lamuhup ulug komo neneptisi ane hit yug hinabet ap pohonet ambi roho seneg lamuhup ulug hiyag isamihin,” ibag.

¹⁷Ibareg NINIKNI Allahn Musa fam nin ele uruk lit,

¹⁸”Haren Israel inap hiyag isamihinon tu: Hit Anden og hisahuk ambeg kuhupteg wereg lit

¹⁹roti anggen tahanoho wiratuk lamuhubon minggiroho winon NINIKNI Allah fahet emberuk lamuhup.

²⁰Roti anggen tam tahantukon waruk lit minggiroho Allah og utuk lamuhup hag toho roti anggen tam tahantukon wirahowon oho minggiroho At fahet emberuk lamuhup.

²¹Mo ilig am wirig am turukmu wiraho angge tamon An nubahet emberuk lamuhup ulug NINIKNI Allahn embehekon ari senegman eneg welamuhup imihin,” ulug hiyag itfag.

²²NINIKNI Allahn Musa feneyen nin ele uruk lit, ”Hit men hiren endebuhubonen endebuhubon menen NINIKNI Allahn an Musa feneyen tuk teg ane fahet komo heneptisiyon hinindi anggat teg elehen sobir isalug siyag ane turuk lamuhup. Turuk lamuhubon fahet honori Allah umalikisi winon oho enepeleg toho welamuhup halug hit Allah umalikisi obog tohowen NINIKNI Allahn amben fano pukag ulug wam sapi umalik yuhambukon misig waroho hubu lahaptuk lamuhup. Hubu lahaptuk lit Allahn embehekon hikit toho nin sebe roho hele anggur ahaluwe hilili felug roti anggen emberuk lamuhup. Ari roho tuhupteg siyag ane turukukon Allahn elehap tukag ulug wam kambing yuhambukon eke imbik waharuk lamuhup.

²⁵Imbik wamuhup angge arimano imam inowen walug indokma yaltuk lit hubu lahaptuk laruhumu NINIKNI Allahn enepelehen turusareg An nolohotma hubu lahaptukon amben fano ulug siyag angge hit Allah umalikisi obog toho hunubam tag tehon hondo ruruk lit elehap turuk laruhu.

²⁶Hiren siyag ane turuk lamuhubon ariyen ap pohon hit men welamuhubon oho siyag angge unubam tag teg laruhu angge re NINIKNI Allahn siyag angge it unubam tag teg laruhuwon oho ambolmayap turuk laruhu.

²⁷Ap misihen eneg NINIKNI Allahn tuk fug ibag ane indi anggat teg elehen sobir isalug siyag ane turuk laruhu halug siyag ane tirikikon NINIKNI Allahn elehap tukag ulug wam kambing mo misig famon eke walug waharuk laruhu.

²⁸Walug waruhumu imam inowen wam ino waroho hubu lahaptukmu ap ino indi anggat teg elehen siyag ane turukon NINIKNI Allahn ambolmayap turuk laruhu.

²⁹Ap enepelehen siyag ane turuk ane fahet NINIKNI Allahn embehek ane ari hit Israel hinap yuhon men ap pohon hit hinim welamuhubon menen ambi roho seneg lamuhup.

³⁰Ap yuhonen ano ap pohonen ano Allah wene sobir isalug siyag ane timin ulug turukon inowen NINIKNI Allah indi siyahap tirisi ulug ori sehelimuwen elehap tuhup.

³¹At inowen Wene fahet nirim ulug NINIKNI Allahn tuk teg ane fahet komo neneptisiyon apmayap turuk lit inggarehen alem siyahon ubamap tarukon fahet ware fusuhup,” ibag.

³²Israel inap arimano lekma weregma ap ekeyen o sabir angge e yaltukon ondolik larukmu aben hibareg

³³ap ino hondoholug Musa men Harun men Allah umalikisi Israel inap obog toho weregma libag.

³⁴Libagma ap ino ubam tuk teg ane nenepelehen fobik eneg nenele ul ulug inggik hele watfag.

³⁵Watfagma NINIKNI Allahn Musa fam ele uruk lit, ”Ap ari war amag! Hit An numalikisi Israel hinap obog tohowen ap ino o sabo wiroho welahep ambeg selman helep fam ware feselihip,” ulug hiyag itfag.

³⁶Hiyag itfag ane ino hikit toho Israel inap arimanowen ap ino hondoholug o sabo wiroho welatfag ambehen wilip atfareg helep fam ware fisibag.

³⁷NINIKNI Allahn Musa fam ele uruk lit,

³⁸”Haren Israel inap unubam hiyag isamihinon tu: Hit men hiren endebuhubonen endebuhubon arimano menen sum henebemon indit uhan fam wal toho aliliyangge hekel mut palehon fam ililoho po reberukon wan turuk lamuhup.

³⁹Wan turuk lit aliliyangge arimano kim haruk lit NINIKNI Allahn tu men ari men turuk lamuhup ulug komo neneptisi ane fahet wenggel haruk lamuhup. Wenggel haruk lit Allah henembol yig utug hit hinindimuwen peruk lahep ane men hinilen yet haruk lahep ane men hikit toho tuk fug angge Allahn tuk teg ane fahet irisiyon hikit toho turuk lamuhup.

⁴⁰Ari roho turuk lamuhup halug hit Allah amingmingangge roho wereg lit hinindimuwen At ubam eneg wenggel haruk lamuhup.

⁴¹’An Hinikni fam wenggel niyaruk lamuhuben o Mesir kinang famen hondog heneplug wilip atikikonen nele aru uruk lahi. We tem toho hit HINIKNI Allah An welahi,’ ehek imihin,” ulug hiyag itfag.