Read Angguruk Yali BILANGAN 16 Bible Online

BILANGAN 16 - Angguruk Yali bible

BILANGAN 16

¹Hun Lewi inowen endetfahon Kehat umbusag, Yizhar amloho Korah men, hun Ruben inowen ondohowonen ondohowon Eliab umalikisi Datan, Abiram, hun Pelet amloho On menen

²nonowe Musa pilabul ulug enele sahaltuk latfag. Sahaltukmu Israel inaben nonowesi roho welamuhup ulug in enepfahon ununuk suwon teng sohowen 250 it inibil atfag.

³Inibil atfareg it obog toho luhaloho Musa men Harun men enembeg libareg hiyag isaruk lit, ”Hiren te nit eneg palimu welahe peruk lahebon ari siyag! Nit Israel ninap obog toho Allah umalikisi wereg lit amingmingangge roho welamuhuken mumal neneptisimu NINIKNI Allah nit sehelimu wereg. Ari regma nungge fahet hiren te nit Allah umalikisi enemberimu welahe ulug palimuwap taruk lahep?” ibag.

⁴Ari urukmu hol hibareg Musa orohole han kinangma sahung atfag.

⁵Sahung atfareg nin hebeloho in atug hun Korah men ori at men luhaloho watfahon men unubam ele uruk lit, ”Sono likiya NINIKNI Allahn ap tu An nanggengge werehen namingmingangge roho wereg lit An horogma waharuk laruhu ulug unug nisahu. Aren mumal tahu ahun eneg At horogma la reg laruhu.

⁶Ari fahet o sono hat Korah hori menen kou indok anggen kilaboho walug laruk angge wahupteg

⁷indok anggen kilaptug amben fano angge palimu embelug o sabo fanowon olohotma walug wamuhup. Wamuhupmu NINIKNI Allahn ap tu eneg An namingmingangge roho welaruhu ulug mumal tahu ane nonoluk aruhu. Hit Lewi hinap hininggarehen palimuwap tehebon ari siyag!” ulug hiyag isibag.

⁸Ari ibareg Musan hun Korah ori men unubam nin ele uruk lit, ”Hit Lewi hinaben Anden iminon tu holeg lamek!

⁹Israel ninap Ninikni Allahn hit hiyag hisaruk lit Israel hinap sehelimuwon hit eneg An horogma waharuk lit nibam foroho lamuhup ulug mumal heneptisimu hit Allah umalikisi enelukema unduhuk lit let eneptuk lahebon ari fahet siyag peruk lahep ano?

¹⁰Hat Korah hori Lewi inap arimano men Allah horogma la reg lahep angge re nungge fahet Allah olohotma unduhuk lamuhuken imam welamuhuk peruk lahep?

¹¹Hat hori menen Harun fahet ninirim ulug henele siyag toho uruk lahebon ariyen NINIKNI Allah ele ying turuk lahep,” ulug hiyag isibag.

¹²Hiyag isibareg Musa inowen hun Datan men Abiram men wol enebik lalihip ulug ap mon enepfagma enembeg libag. Libagma it piren itanowen ap Musan mon enepfahon feneyen Musa hiyag utuk lit, ”Nit hat hambeg wamul fug.

¹³Haren nit o Mesir kinang ag owe men kin ahaluwe men eleg am fug angge mondabi anggolo wereg ambehen hondog neneplug wilip atikinteg nit lekman war amag ulug nunumbaharuk lahen ane ari fahet Haren hayen peruk lit ketiya it obog toho onowe suwon welaruhuk peruk lahen ano?

¹⁴Haren nit hondog neneplug kinang fanoma ag owe men kin ahaluwe men eleg am fug angge mondabi anggolo wereg ambeg laruk lit suburu yabuk men anggur yabuk men og nisarikin fugmu ketiya nit hat hambeg wamulmu ninilanggen hililoho hik isamin peruk lahen ano? Ari fahet wamul fug,” ulug hiyag itfag.

¹⁵Hiyag itfagma Musan olok anggolo hibareg NINIKNI Allah ubam ele uruk lit, ”Iren nungge-nungge Hat hubahet imbik waharuk lamuhubon fahet nirim peruk laruhun. Anden misihim oho wam keledai eke og nemek ulug heng eneptikik fug. Misihim oho siyag ane unubam tirikik fug,” ibag.

¹⁶Ari ibareg Musan hun Korah hiyag utuk lit, ”Sono hat hori obog toho NINIKNI Allah olohotma wamuhupmu Harun oho waruhu.

¹⁷Waharuk lit hat men Harun men hori teng sohowen arimano wal tanehen indok anggen kilaboho walug laruk angge amben fano angge palimu umbuhubon walug o sabo fanowon alukema in arik wamuhup,” ulug hiyag isibag.

¹⁸Hiyag isibag ane ino hikit toho likiyamon Korah ori men Musa men Harun menen indok anggen kilaboho walug laruk angge wibareg indok anggen kilaptug amben fano angge palimu imbibareg walug o sabo fanowon sok kurukon iraham in arik watfag.

¹⁹In arik watfareg Korah inowen Israel inap obog toho an niraham maniyek ulug wol enepfagma watfareg iraham unduhukmu fuma fil Musa men Harun men unduhuk lit weregman NINIKNI Allah umbagpag turukon seleg ino it obog toho iniline inam atfag.

²⁰Inam atfareg NINIKNI Allahn Musa men Harun men hiyag isaruk lit,

²¹”Anden ap aruma misihim eneg elehap enepminen hit we tot yatma in arik aliyek,” ibag.

²²Ari ibagma Musa men Harun men onorohole han kinangma sahung atfareg sembahyang uruk lit, ”Allah, Hat mun angge man angge onoluk amag ulug werehap eneptuk lahenon, ap misihen eneg siyag ane tirisimu nungge fahet ap aruma obog toho unusimin peruk lahen?” ibag.

²³Ibagma NINIKNI Allahn Musa hiyag utuk lit,

²⁴”Ap aruma unubam, ’Hun Korah, Datan, Abiram men inibam horogma la fug!’ ulug hiyag isalihip,” ibag.

²⁵Ibagma Israel inap onowesi arimano Musa men ambiyeg laruk lit hun Datan men Abiram men wal tanehen o sabo wiroho welatfag ambeg libag.

²⁶Libareg Musa inowen Israel inap obog toho hiyag isaruk lit, ”Ap siyag ane turuson inibam tu iraham la fug angge nungge-nungge iren tohon sen ha fug! It piren itano Allah ele ying turuson fahet war amusa halug hit it men war amuhup tohon!” ulug hiyag isibag.

²⁷Hiyag isibagma Israel inap arimano Korah, Datan, Abiram menen wal toho o sabo wiroho welatfag ambeg embeselug we tot yatma in arik libagma Datan men Abiram men unuhesi unumalikisi unumbusagsi men inibamen wilip atug inibam sokolma unduhuk latfag.

²⁸Unduhukmu Musa inowen Israel inap arimano hiyag isaruk lit, ”Hiren ap aruma unubam teko lamisi ane yet halihipteg hinindi anggar atuk lit Musa inggarehen milal heheg nungge-nungge turuk ano, NINIKNI Allahn monde feruk lit hiyag itisi ane hikit toho iyabuk turuk ano ulug honoluk atmisi.

²⁹It aruma ap kinangmon obog toho war atuk hag toho fobik eneg war amuhup halug NINIKNI Allahn an mon naptisi fugmen nungge-nungge turuk lahi ane fag aruhu angge famen

³⁰NINIKNI Allahn alem aben yet harusa fuhon wal turukmu kinang ino ele a rebelug it pirenet enenggeyet pil isamisimu onoluk angge ap warehon wereg ambeg wambulusama yet halihip halug iren NINIKNI Allah abug uruson fahet alem ari unubam aha ulug honoluk atmisi,” ulug hiyag isibag.

³¹Ari ulug hiyag isarukmu itano kinang it piren unduhuk ambeg kuroho

³²ele a ribibareg it unuhesi malik men enenggengge obog toho men pil isaruk lit Korah ori men oho pil isibag.

³³Pil isarukmu onoluk angge ap warehon wereg ambeg wambibag. Wamburukmu itano kinang ele ino nin hebeloho lar atfag. Ari roho turuk lit it arimano Israel inap enesehelimuwen eleg atfag.

³⁴Kinang elma wamburuk lit enele ya nga urukmu hol hibareg Israel inap winon arimanowen nir oho kinangen pil nisahu rohon ulug enekolen linggik-longgo ibag.

³⁵Linggik-longgo urukmu NINIKNI Allah famen indok ambulpul wilip atfareg Israel inap onowesi amben fano angge Allah olohotma walug watfahon enebe teng sohowen arimano han wiyaloho war atfag.

³⁶War atfagma NINIKNI Allahn Musa fam ele uruk lit,

³⁷”Haren Harun amloho imam Eleazar ino hiyag utuk lit, ’Kou indok anggen kilaboho walug laruk angge aruma indok ap arimano nenggek ambehen wak lamihin,’ ulug hiyag itmihinteg hat hamuwen indok anggen aruma lilibug toho yat ke hik-hak isamihin.

³⁸Kou wak lamisiyon arimano it siyag ane turuson arimanowen An HINIKNI Allah nolohotma walug wahasama An ngi ahi. Ngi ahireg kou arimano helep simbuk fam sahaltukmen eneg inggilangge hag atmisimu An nubahet hubu lahaptuk ambeg hililip toho lombog tilihip. Kou hililip toho lombog tilihibon arimano Israel inaben yet haruk lamuhup halug it siyag ane turuson arimano ininggarehen siyahap taruk lit war atusa ane fahet enehangge wereg ulug onoluk aruhu,” ulug hiyag itfag.

³⁹NINIKNI Allahn Musa feneyen hiyag itfag ane ino hikit toho imam Eleazar inowen kou tembaga umbagpag turukon fam wirihon arimano wak libareg helep simbuk fam sahaltukmen eneg inggilangge hag atfagma hubu lahaptuk ambeg hililip toho lombog tibag.

⁴⁰Kou hililip toho lombog tibahon arimano yet haruk lit Israel inaben Korah ori men unubam teko libag ane fahet wenggel haruk latfag. Wenggel haruk lit we Harun inowen ondohowonen endebuhubon arimanowen eneg amben fano angge yaltul ulug NINIKNI Allah horogma la reg, ap winon At horogma larukon arimano hun Korah ori men war atfag hag toho war amuhup ulug onoluk atfag.

⁴¹Likiyamon Israel inap obog toho luhal atfareg Musa men Harun men unubam enele siyag toho, ”Hiren NINIKNI Allah umalikisi unusirikip,” uruk latfag.

⁴²Ari ibareg o sabo fanowon fil yet harukmen o ino hinan hililip turukmu NINIKNI Allah umbagpag turukon seleg ino inam atfag.

⁴³Inam atfagma yet hibareg Musa men Harun men o sabo fanowon sokolma libag.

⁴⁴Libagma NINIKNI Allahn Musa fam ele uruk lit,

⁴⁵”Anden ap aruma misihim eneg elehap enepminen hit we tot yatma in arik aliyek,” ulug hiyag itfagma Musa men Harun men onorohole han kinangma sahung atfareg sembahyang ibag.

⁴⁶Sembahyang ibareg Musa inowen Harun hiyag utuk lit, ”Hubu lahaptuk ambehen indok anggen we tot wamihinteg kou elma kilaptug amben fano angge palimu embelug folo-folo walug it luhaloho werehon enembeg lamihin. Lamihinteg ap aruman siyag ane teheson NINIKNI Allahn ambolmayap tukag ulug At olohotman amben fano angge ino yale femihin. NINIKNI Allahn olok haruk lit ap aruma unusimin ulug turuken folo-folo lag!” ulug hiyag itfag.

⁴⁷Musan hiyag itfag ane ino hikit toho Harun inowen kou indok anggen kilaboho walug laruk angge eke walug folo-folo Israel inap luhaloho welatfahon sehelimu libareg yet harukmen ap anggolo kinangma fuk toho war atukmu yet isibareg Harun inowen NINIKNI Allahn siyag ane ap aruman teheson ari ambolmayap tukag ulug At olohotman amben fano angge yaltuk latfag.

⁴⁸Ari roho turuk lit Harun ino ap warehon honggoleg ap onolukon honggoleg pulmu itano unduhukmu NINIKNI Allahn ap unusibag ane ino imbisibag.

⁴⁹Alem ari uwan teko la fugmu hun Korah ori anggolo men war atfagma o ino sambil war atfahon nin sebe roho enebe teng obog sehelet obog 14.700 war atfag.

⁵⁰Ap war atuk ane ino eleg atfagma Harun suhuloho Musa o sabo fanowon sok kurukon iraham weregma libag.