Read Angguruk Yali BILANGAN 17 Bible Online

BILANGAN 17 - Angguruk Yali bible

BILANGAN 17

¹Ari tibagma NINIKNI Allahn Musa fam ele uruk lit,

²”Haren Israel inap ununggul unuk nisanggowen werehon onowesi arimano hiyag isaruk lit, ’Hit hununggul unuk wal taneg welahebonen wanggun misig-misig og nirik maniyek!’ ulug hiyag isamihin. Hiyag isamihinmu wanggun nisanggowen og hirik wamuson fene haren ununggul unuk wal taneg haharoho embemihin.

³Wanggun ununggul unuk Lewi inaben tohon fene Harun unuk haharoho imbin.

⁴Embemihinteg wanggun nisanggowen itano walug o sabo An men Ambi Atuk Ambeg kimihinteg e sali roho wirihon Wene Numen haharehon elma kilabeg angge alukema embemihin.

⁵Embemihinmu ap sa uwanggun fam owil tuhu halug ap tu Allahn mumal tarisi ulug honoluk aruhu. Honoluk aruhumu Israel inaben An nabug uruk lit hit hunubam enele siyag toho uruk ane eleg aruhu,” ulug hiyag itfag.

⁶Hiyag itfag ane ino Musan Israel inap hiyag isibagma ununggul unuk onowesi nisanggowen itano wal tanehen wanggun misig-misig Musa og irik watfag. Og irik watfahon sehelimu Harun inowen oho wanggun misig walug watfag.

⁷Walug watfagma Musan wanggun nisanggowen itano walug o sabo fanowon fam kibareg e sali roho wirihon alukema imbibag.

⁸Imbibareg likiyamon Musa nin hebeloho o sabo ino fam kibareg yet harukmen wanggun unggul unuk Lewi ahun Harunen tohon ino famen inggik wilibig lit owil turukmu e sawe anggen hahon yihik latfag.

⁹Yihikmu yet hibareg Musa inowen wanggun nisanggowen itano obog toho wibareg o sabo fanowon famen walug wilip atfareg Israel inap obog toho unug isibagma yet hibareg ununggul unuk onowesi wal tanehen unuwanggun oko wibag.

¹⁰Wibagma NINIKNI Allahn Musa fam ele uruk lit, ”Wanggun Harunen tohon ino eneg hebeloho e sali roho wirihon Wene Numen haharehon elma kilabeg angge alukema imbik lamihin. Wanggun ino An nele sobir isaruk inap fahet enehangge welaruhuwen amusun toho foroho laruhun. Ari roho tuhunmu Israel inaben An nubahet enele siyag toho uruk ane eleg aruhu. It obog toho war amuhup tohon,” ibag.

¹¹NINIKNI Allahn hiyag itfag ane hikit toho Musa inowen tibag angge famen

¹²Israel inaben Musa fam enele uruk lit, ”Nit siyag amuhuk, nit obog toho war amuhuk.

¹³Ap sa NINIKNI Allah ibam horogma larukon obog toho war amuhup. Nit mondabi eleg amuhuk ano?” uruk latfag.