Read Angguruk Yali BILANGAN 18 Bible Online

BILANGAN 18 - Angguruk Yali bible

BILANGAN 18

¹NINIKNI Allahn Harun fam ele uruk lit, ”Ap ekeyen o sabo An men Ambi Atuk Ambehen niyabuk turuk lit siyag ane turuk halug alem ino hat humalikisi men hori ununggul unuk Lewi inap men hunubam aruhu. Hat humalikisi men An namingmingangge imam wereg lit yabuk turuk ambehen siyag ane turuk lamuhup halug alem ino henemu hunubam aruhu.

²Honori Lewi inap hit hunumba misihen ondohowonen ondohowon arimanowen hat humalikisi men ambiyeg hiniyabuk turuk lit hit let heneptuk lamuhuben hiyag isahun. Iren let heneptuk lit o sabo An men Ambi Atuk Ambehen mun ane man ane turuk ane hit men ambiyeg turuk lamuhup. We it men hit men war amuhuk tohon ulug Lewi inap arimano o sabo fanowon elma foroho angge men hubu lahaptuk ambeg men horogma la fug angge selma eneg wereg lit iniyabuk turuk lamuhup. Iren eneg hit let heneptuk lamuhupmu ap winonen let henebul ulug hit horogma waharuk lamuhup fug.

⁵Ari roho turuk lit hiren An nibam men hubu lahaptuk ambeg men foroho lamuhup halug Anden nin hebeloho nolok haruk lit Israel inap arimano unusuruk laruhuk fug.

⁶Honori Lewi inap arimano An nanggengge welamuhup ulug Israel inap sehelimuwen mumal eneptikikteg hit men ambiyeg An nibam foroho lamuhuben hiniraham welamuhup ulug fano angge hag toho og hisarikik.

⁷We hat humalikisi menen eneg An namingmingangge imamen turuk ane turuk lamuhup. Hiren An nubahet hubu lahaptuk ambeg ino foroho lit e sali roho wirihon ino mapmu roho ulug sum tuhuloho pilabehon alukeman hiniyabuk fano turuk lamuhuben yet teg lamuhup. An namingmingangge imam wereg lit niyabuk turuk lahebon ari fano angge hag toho og hisarikik. Ap winon saplangge An horogma waharukon arimano war amuhup,” ulug hiyag itfag.

⁸Ari ulug hiyag itfareg NINIKNI Allahn Harun ubam nin ele uruk lit, ”Anden hit og hisaruk laruhukon iminon tu fahet wenggel homok: Israel inaben Allah og irik lul ulug walug waharuk angge arimano minggiroho hat humalikisi men naruk lamuhuben Anden og hisaruk laruhuk ulug kong toho emberikik. Emberikik ane ari fobik oho eleg aruhu fug.

⁹Ari fahet Israel inaben An nubahet walug waharuk angge mondabi fanowon arimano minggiroho winon indokma yaltuk lit winon hit naruk lamuhup. Hiren naruk lamuhubon roti anggen An nubahet imbik waharukon men, siyag ane turukukon Allahn elehap tukag ulug wam waroho hubu lahaptukon men, An nangge palehon fahet og nutuk ambohom men arimano obog toho Allah ngi rehen usa ulug

¹⁰hat hori hunumalikisi abon men o fanoman eneg naruk lamuhup.

¹¹Israel inaben nungge-nungge Allah fahet imbik lul ulug walug waharuk angge winon arimano minggiroho hat humalikisi abonet hiyabonet naruk lamuhuben Anden og hisaruk laruhuk ulug kong toho emberikik. Emberikik ane ari fobik oho eleg aruhu fug. Og hisaruk laruhuk angge arimano hit men honori hinibam werehon siyag angge unubam tag teg elehon obog toho naruk lamuhup.

¹²E zaitun ahaluwe fanowon men, anggur ahaluwe fanowon men, roti anggen fanowon men, suburu tam yahaltukon men e anggen tam tahantukon men Israel inaben An HINIKNI Allah fahet imbik waharuk angge arimano Anden minggiroho hit og hisarukmu hit men honori siyag angge unubam tag teg elehon obog toho naruk lamuhup.

¹⁴Israel inaben NINIKNI Allah mondabi ngi reg laruhuwen umbuhuk ulug sali emberuk angge arimano oho hit amuhup.

¹⁵Israel inap unumalikisi wandabon men wam umalik yuhambukon wandabon men Allah anggengge wereg ulug emberuk lamuhubon arimano Anden hit og hisaruk laruhuk. Malik wandabon An fahet embelebon unubalmangge uang inggila emberuk lamuhubon hilaruk lamuhup. Ari hag toho wam siyag angge ubam tag tehon ubalmangge uang oho og hisaruk lamuhup.

¹⁶Malik wandabon indag atukon sali pikalem misig larukmu An nubahet embelep angge famen it unubalma onggo o sabo fanowon fam paltuk ane hikit toho uang perak anggen fuwaben emberuk lamuhup.

¹⁷Wam sapi, domba, kambing unumalik wandabon unubalma uang umbuk fug angge An nubahet imbik waharuk lamuhup. Wam arimano ware feruk lamuhupmu hiren enemep tor angge walug hubu lahaptuk ambeg hilili felug An HINIKNI Allahn amben fano pukag ulug wam sei hubu lahaptuk ambeg palimu embelug indokma yaltuk lamuhup.

¹⁸Aben Allah olohotma wam nul ulug walug waharukon iliyapma men uyug pikiron men hit ngi amuhup hag toho wam umalik wandabon unu oho hit naruk lamuhup.

¹⁹Ari roho Israel inaben NINIKNI Allah fahet imbik lul ulug walug waharuk angge fanowon arimano obog toho Anden minggiroho hit og hisarukmu hit hunumalikisi abonet hiyabonet naruk lamuhuben kong toho emberikik. Emberikik ane ari Anden uwag oko hilahuk fug ulug mondabiyap turuk lahiyon aru hiren endebuhubonen endebuhubon arimanowen senegman eneg welamuhup,” ulug hiyag itfag.

²⁰Hiyag itfareg NINIKNI Allahn Harun ubam nin ele uruk lit, ”Hit o Kanaan kinangma kuhupteg Israel inap ununggul unuk winon kinang wal taneg fibir amuhup angge famen hat hori hunumalikisi men kinang ngi roho welam fug angge An nubam eneg welamuhupmu Anden heneseher angge obog toho og hisaruk laruhuk.

²¹Lewi inaben An nibamen yabuk turukon fahet onggo ulug Israel inap ininggikmu atukon palu numen tebelug palu numon arimano Anden og isaruk laruhuk.

²²Lewi inap arimano eneg An nibam o sabo fanowon ino horogma laruk lit yabuk turuk lamuhup. Yabuk turuk lit siyag ane turuk lamuhup halug alem ino it unubam aruhu. Ari roho iren niyabuk turukmen eneg welamuhup ulug kong toho emberikik. Kong toho emberikik angge re Israel inap ununggul unuk winon An nibam o sabo fanowon ino horogma laruk lamuhup halug alem angginon unubamap taruk lit war amuhup. Israel inap winon kinang ngi reg lamuhup hag toho Lewi inap ngi reg lamuhup fug.

²⁴Israel inap ininggikmu atukon palu numen tebelug palu numon arimano An nubahet imbik waharuk angge arimano Lewi inaben naruk lamuhup ulug Anden og isaruk laruhuk. Ari fahet Lewi inap kinang ngi reg lamuhup fug irikik,” ulug hiyag itfag.

²⁵Ari ulug hiyag itfareg NINIKNI Allahn Musa fam ele uruk lit,

²⁶”An nele iminon tu haren Lewi inap hiyag isamihin: Israel inaben suburu yahaltukon men e anggen tahantukon men palu numen tebelug palu numon arimano Allah fahet imbik waharuk. Hit Lewi hinap kinang ngi reg lamuhup fuhen Anden palu numon arimano hit og hisaruk laruhuk ulug kong toho emberikik. Kong toho emberikik ane hikit toho hiren palu numon arimano hilaruk lit nin hebeloho palu numen tebelug numon arimano An HINIKNI Allah og nutuk lamuhup.

²⁷Og nutuk lamuhup angge arimano Israel inaben tahantukon roti anggen men hele anggur anggen men minggiroho winon An og nirik waharuk hag toho hiren oho An nubahet emberuk lamuhup.

²⁸NINIKNI Allah fahet umbul ulug mun angge man angge Israel inaben og hisa waharuk angge arimano hiren minggiri felug An namingmingangge imam Harun og utuk lamuhup.

²⁹Israel inaben og hisaruk lamuhup angge obog toho hiren minggiri felug fanowon eneg An nubahet emberuk lamuhup.

³⁰Israel inaben tahantukon roti anggen men anggur anggen men minggiroho winon An nubahet emberuk lit winon umbat tarukon arimano ininggarehen naruk hag toho hiren oho An nubahet minggiroho winon emberuk lit winon umbat taruk lamuhubon arimano hininggareg naruk lamuhup.

³¹Naruk lamuhup angge arimano Allah ibam yabuk turuk laheyon fahet onggo ulug hit hunuhesi hunumalikisi men o kema-kema fano puhup ambehen naruk lamuhup.

³²Naruk lamuhup ane ariyen Israel inaben An nubahet imbik waharuk angge arimano hiren siyahap turuk lit alem siyahon hunubamap taruk lamuhup fug. Iren walug waharuk angge Anden og hisaruk lahiyon arimano hit tam na fug angge minggiroho fanowon An nubahet emberuk lamuhup halug hit war amuhup fug,” ibag.