Read Angguruk Yali BILANGAN 19 Bible Online

BILANGAN 19 - Angguruk Yali bible

BILANGAN 19

¹NINIKNI Allahn Musa men Harun men unubam ele uruk lit,

²”Hiren hundig-hundig turuk lamuhubon fahet komo henepminon tu: Wam sapi tuhumon ahap huluwon siyag teg elehon uwan kinang hebeltuk angge lisoho walug laruk elehon misig walug wamuhuben hunumalikisi Israel inap hiyag isahup.

³Wam walug wamuhubon ino hiren An namingmingangge imam Eleazar og umuhup. Og umuhupmu Eleazar inowen wam ino walug o sabo wiroho welahep ambehen wilip aruhureg an niline watlihip ulug otsi hiyag isahu ane roho wam ino wabuhup.

⁴Wabuhupmu imam inowen wam amep we tot inggik tumen oko walug An nibam o sabo fanowon aluke fil inggik sabirenam ketne isahu.

⁵Ketne isahumu ap ekeyen wam sapi ahabet unuwet mebet alet angge imam ino iline indokma yaluhu.

⁶Yaltukmu imam inowen e sahi palehon men polu men musan inggila men wahureg indokma hik isahu.

⁷Hik isalug ebe abirangge men sum wan tehon men ik umaruhureg hit o sabo wiroho welahep ambeg hebeloho waruhu angge famen siyag angge ubam tag tehon eleg am fug angge weregman eneg mo ubuk uhu.

⁸Ap wam sapi yaluhuwon inowen oho ebe abirangge men sum wan tehon men ik umaruhu angge famen siyag angge ubam tag tehon eleg am fug angge weregman eneg mo ubuk uhu.

⁹Wam indok yaluhumu ul aruhuwon ino ap siyag angge ubam tag teg elehon ekeyen andog toho walug o sabo wiroho welahep ambeg selma siyag teg eleg ambeg imbik lahu. Ul ino imbik lahu ambeg forohoman eneg ap eke siyag angge ubam tag aruhumu ul ino wak lahupteg ik men mangno roho ap ino ubam ketne isaruk lit siyag angge ubam tag tehon ino elehap turuk lamuhup. Ari roho wam sapi indokma yaltukon ariyen siyag angge ap ubam tag tehon elehap turuk ane men, hubu lahaptuk lit siyag ane aben turukon elehap turuk ane men ambi reg.

¹⁰Ap ul ino andog toho walug lahuwon inowen sum wan tehon ik umaruhu angge famen siyag angge ubam tag tehon eleg am fug angge weregman eneg mo ubuk uhu. Ari roho turuk lamuhup ulug komo henebihi ane ari hit Israel hinap men ap pohon hit sehelimu werehon menen mondabi senegman eneg welamuhup.

¹¹Ap san ap wareg angge eke sen haruk halug siyag angge ubam tag tegman eneg o sabirenam aruhu.

¹²Siyag angge ubam tag tehon ino eleg amag ulug o hinahaneg angge men o sabir angge men ik siyag angge elehap turuk ahik ubam ketne isahup. Ketne isahup fug halug siyag angge ubam tag tehon ino eleg aruhu fug.

¹³Eleg aruhu fugmu siyag angge ap ino ubam tag tehon inowen An nibam o sabo fanowon ino siyahap tuhu. Siyahap tuhu ane fahet ap ino Israel hinap sehelimuwen elehap tuhup. Ap ino fene ik ino ubam ketne isahup fug halug siyag angge ubam tag tegman eneg welaruhu.

¹⁴Nin eke ap war atukon fahet komo henepminon tu: Ap eke o saboman war atuk halug ap o ino werehon men o ino kurukon men siyag angge unubam aruhureg tag tegman eneg o sabirenam aruhu.

¹⁵Kubag abilit lareg elehon oho siyag aruhu.

¹⁶Ap san ap anggenman war atukon men aben unusurukon men ap warehon unuwag men ap wareg angge kinangma sal eneptuk ambeg men sen haruk halug siyag angge ubam aruhureg tag tegman eneg o sabirenam aruhu.

¹⁷Siyag angge ap eke ubam tag tehon elehap turuk lamuhuben wam sapi indok yaltukmu ul atukon tor angge men ik elerukmuwen hinanggurukon men mangno roho kubag elma kilaptuk lamuhup.

¹⁸Kilabuhupmu ap siyag angge ubam tag teg elehon ekeyen musan inggila wahureg ik ino fam yuhuloho o sabo ino men o ino foroho angge obog toho men ap o ino werehon men fene ketne isaruk laruhu. Ari hag toho ap san ap anggenman war atukon men aben unusurukon men ap warehon unuwag men ap wareg angge kinangma sal eneptuk ambeg men sen harukon enebene ik ino ketne isaruk laruhu.

¹⁹Ari roho ap siyag angge ubam tag teg elehon ekeyen o hinahaneg angge men o sabir angge men ap siyag angge ubam tag tehon fene ik ino ketne isaruk laruhu. Ketne isahumu ap siyag angge ubam tag tehon inowen ebe abirangge men sum wan tehon men ik umatuk laruhu halug mo ubuk uhumu siyag angge ubam tag tehon ino eleg aruhu.

²⁰Ap sa fene ik ino ketne isahup fug halug siyag angge ap ino ubam tag tehonen An nibam o sabo fanowon ino siyahap tuhu. Siyahap tuhu ane ino fahet ap ino An numalikisi Israel hinap sehelimuwen elehap tuhup. Ap ino fene ik ino ubam ketne isahup fug halug siyag angge ubam tag tegman eneg welaruhu.

²¹Ari roho turuk lamuhup ulug komo henebihi ane ari hit Israel hinaben mondabi senegman eneg welamuhup. Ap ik ino ketne isarukon inowen oho sum wan tehon ik umatuk laruhu. Ap sa fene ik ino sililim toho laruk halug siyag angge ubam aruhureg tag tegman eneg mo ubuk uhu.

²²Ap siyag angge ubam tag tehon inowen sen haruk angge obog toho siyag aruhu. Ap san siyag angge unubam tag teg inap sen eneptukon unubam oho siyag angge tag teg laruhu,” ulug hiyag isibag.