Read Angguruk Yali BILANGAN 20 Bible Online

BILANGAN 20 - Angguruk Yali bible

BILANGAN 20

¹Mo keron atfagma pikalem tamon fam Israel inap Zin lekma libareg o Kades o sabo wiroho welatfag. Weregma hiyap Miryam ino war atfagma kinangma salfag.

²Weregman ik eleg latfagma Israel inap arimanowen Musa men Harun men walinggoho kilap enepfareg

³it unubam suwahal uruk lit, ”Nonori NINIKNI Allahn unusirisiyon arimano men ambiyeg war atla fano!

⁴Nungge fahet o Mesiren hondog neneplug anggenma tuma nunumbahik waharikip? Nit nenebeyet nenembohomet war amag ulug hondog neneplug waharikip?

⁵O aruma nungge-nungge wilip atuk elegma asengseng toho welahe. Roti anggen men e ara anggen men anggur anggen oho e delima anggen oho eleg, ik oho mondabi eleg,” uruk latfag.

⁶Ari ibagma Musa men Harun men ap arimano embeselug Allah men Ambi Atuk Ibam sokolma libareg onorohole han sahung atukmu NINIKNI Allah umbagpag turukon seleg ino unubam pilabik watfag.

⁷Pilabik watfareg NINIKNI Allahn Musa hiyag utuk lit,

⁸”Wanggun peti Wene Numen haharehon kilabeg angge iraham werehon ino wamihinteg hot Harun menen Israel inap obog toho palu enebik lalihip. Lalihipteg it onolohotman helep lendi werehon fam ik wilip amag imihin. Ari imihinmu ik wilip atmisi halug ap aruma enembohom menen nalusa,” ulug hiyag itfag.

⁹Hiyag itfag ane hikit toho Musa inowen wanggun ino wak kibag.

¹⁰Wanggun ino wibareg ot Harun menen Israel inap obog toho helep welatfahon ino iraham palu enebik libag. Itanowen Musan ele uruk lit, ”Allah ele ying turuk lahep hinaben holeg lamek! Helep aru famen hit fahet ik wilip amag ulug nenele ul ano?” ibareg

¹¹Musa inowen wanggun ino wibareg helep ino inggik pirenam ware fibagma ik anggolo wilip atfag. Wilip atukmu ap obog toho enembohom menen naruk latfag.

¹²Ik ino nibagma NINIKNI Allahn Musa men Harun men hiyag isaruk lit, ”Hiren An nubam tem toho wenggel ha fug angge Allah ebe usa fulu rehon ino ine wereg ulug ap aruma onolohotman An wel nabehep fugmu ap aruma kinang og hisahuk irikik ambeg ino hiren hondog eneplug lahup fug,” ulug hiyag isibag.

¹³Israel inaben NINIKNI Allah ubam enele siyag toho ibagma At ebe usa fulu rehonen ine roho turukmu yet hibag ambeg ino Ik Meriba[4] suwalfag.

¹⁴O Kades wereg lit Musa inowen Edom inap onowe suwon wereg ambeg lalihip ulug ap mon enepfagma ambeg libareg ubam hiyag utuk lit, ”Ninikni, hat nit Israel ninap nunumbali welahenon hambeg wahe. Nit asengseng toho welahe ane hat holuk teg lahen lit teg.

¹⁵Nit nunumbasi o Mesir libareg amusun toho welatfag. Wereg lit it men nit men Mesir inaben siyag ane eneg nunubam turukmu

¹⁶niren NINIKNI Allah fam let nenebin uruk latukuk. Nenele urukmu NINIKNI Allahn hol harisireg ot malaikat eke monde fik waharisimu o Mesiren hondog neneplug wilip atisi. Wilip atisimu waharukukteg hangginang hilimu o Kades welahe.

¹⁷Hangginang keyen lahuken hiyag nisamihin ulug heng habik wahe. Laruk lit kalem suwon embeselug hiniyabuk men anggur yatuk ambeg men fam sobil laruk lamuhuk fug. Ik fahet kinang habulig ambeg arimano fam ik yenggelehon naruk lamuhuk fug. We kalem suwon eneg laruk lit hangginang atogman wilip amuhuk,” ulug hiyag itfag.

¹⁸Hiyag itfagma Edom inap arimanowen, ”Nit nenengginang keyen lahup fug. Nenele holuk fug angge suhan isalug lahup halug hunusuhuk,” ulug hiyag isibag.

¹⁹Ari ulug hiyag isibagma Israel inaben te, ”Nit we kalem suwon eneg laruk lit nit nenembohom menen ik naruk lamuhukon fahet onggo og hisahuk. Nit we henengginang keyen lahukteg wilip amuhuk peruk lahe,” ibag.

²⁰Ibagma Edom inap arimanowen te, ”Lahup fug,” ibareg enebe anggolowen sehen seneko Israel inap yanggal enebul ulug laruk latfag.

²¹Edom inaben nenengginang keyen lahup fug ulug hiyag isibagma Israel inap arimano kalem wina ke lul ulug hebeloho laruk latfag.

²²Israel inap arimano o Kades embeselug libareg Edom inap enengginang hilimu tom Hor alma libag. Libagma NINIKNI Allahn Musa men Harun men hiyag isaruk lit,

²⁴”Kinang Anden Israel inap hiyag isarikik ambeg ino Harun kuhu fug. Hit Ik Meriba wilip atuk ambeg wereg lit An nele sobir isaruk latikip angge re Harun ino tuman war aruhureg umbasi men mangno aruhu.

²⁵Hat Musa inowen Harun amloho Eleazar men tom Hor fam hondog eneplug lahakun.

²⁶Lahakunteg sum Harunen wan tehon ino hog toho amloho Eleazar wan tubuhun. Wan tubuhunmu Harun ino tom ino famen war aruhureg umbasi men mangno aruhu,” ibag.

²⁷NINIKNI Allahn ibag ane ari hikit toho Musa men Harun men amloho Eleazar men Israel inap iniline tom Hor atelma lahibag.

²⁸Lahibagma Musa inowen sum Harunen wan teg latfahon ino hog toho Eleazar wan tibibag. Wan tibibagma itano Harun ino tom ino famen war atfagma Musa men Eleazar men suhuloho wambik watfag.

²⁹Harun war atfagma hol hibareg Israel inaben fong watukmen hup teng misihen nubam hilag hinahan 30 atfag.