Read Angguruk Yali BILANGAN 21 Bible Online

BILANGAN 21 - Angguruk Yali bible

BILANGAN 21

¹Kinang Kanaan ik ambut fil o pumbuk Arad welatfag. Arad inap onowe suwon inowen hol harukmen Israel inap o Atarim keyen waharuk urukmu hol halug libareg tog aptuk lit Israel inap winon sen enepfag.

²Winon sen enepfagma Israel inap arimanowen NINIKNI Allah fam sali emberuk lit, ”Ap arimano Haren nininggikmu umbuhunmu niren it enebeyet inibamet obog toho eleha fusuhuk,” ulug sali imbibag.

³Ari urukon NINIKNI Allahn hol hibareg let eneptukmu Israel inap arimanowen Kanaan inap waroho unusuruk lit enebeyet inibamet obog toho eleha fisibag. Eleha fisibag ambeg ino o Horma[5] suwalfag.

⁴Israel inap tom Hor ino embeselug Edom kinang keyen lul fug ulug ik Teluk Araba fil libag. Laruk lit mun ane man ane unubam atuken inirimen

⁵Allah men Musa men unubam enele siyag toho uruk lit, ”Nungge fahet o Mesiren hondog neneplug waharikip? Nit lekman war amag ulug hondog neneplug waharikip? Tuma naruk angge men ik men wereg eleg. Suburu put teg hag tehon eneg naruk lit me nenepe neneptuk,” uruk latfag.

⁶Ari urukmu hol hibareg NINIKNI Allahn pisanggo olokon monde fibagma Israel inap fato eneptukmu ap anggolo war atuk latfag.

⁷War atuk latfagma Israel inap arimano Musa ambeg watfareg enele uruk lit, ”NINIKNI Allah men hat men hunubam nenele suwahal uruk lit siyag ane uruk latukuk. Ari fahet pisanggo aruma elehap timisiyen haren NINIKNI Allah fam sembahyang imihin,” ibagma Musan sembahyang ibag.

⁸Ibagma NINIKNI Allahn Musa fam, ”Ine angge tembaga fam pisanggo hag angge lalmihinteg e yaron kinangma hutuk timihinteg pug tibik lahamihin. Pisanggo aruman ap fato eneptukmu pisanggo hag angge e fam pug tehon ino lahap halug onoluk welamuhup,” ulug hiyag itfag.

⁹Hiyag itfagma Musan ine angge fam pisanggo hag angge lalfareg e yaron fam pug tibik lahibag. Lahibagma pisanggo olokonen ap fato eneptukmu pug tehon ino lahap halug onoluk welatfag.

¹⁰Welatfareg Israel inap arimano wilip atfareg o Obot o sabo wirik libag.

¹¹Libareg Obot embeselug Moab kinang mo alem fil lekma o Abarim olun atfag ambeg ino iraham o sabo wirik libag.

¹²Libareg o Abarim embeselug ik Zered tonggoma o sabo wirik libag.

¹³Ik Zered embeselug ik Arnon fuma fil lekma o Amori inap enengginang hili-hilimu o sabo wirik libag. Ik Arnon ino o Moab kinang men Amori inap enengginang men honggolegma hiliyangge wereg.

¹⁴Libag ane ino fahet suwesingga NINIKNI Allahn tog aptuk latfag ane fahet haharoho imbibahon fam Sufa kinangma o pumbuk Waheb unuk men, ik Arnon ayegma tonggo unuk men,

¹⁵hebe o Ar horogma Moab kinang hili-hilimu wamburukon unuk men paloho imbibag.

¹⁶Ik Arnon embeselug o Beer libag. O Beer inowen NINIKNI Allahn Musa fam ele uruk lit, ”Anden numalikisi Israel inap arimano ik og isaminen haren wol enepmihin,” ibag.

¹⁷O ino sambil Israel inap arimanowen sini yunggultuk lit, ”Fabulig ambehen ik lahik wamag! Lahik watmisiyen sini ik maniyek!

¹⁸Nonowesiyen ik ino fahet kinang fabulehesa. Ap suwon-suwon arimanowen unuwanggun fam fo rehesa,” ibag. Ari ibareg Israel inap arimano lekman wilip atlug o Matana libag.

¹⁹Matana embeselug o Nahaliel keyen o Bamot libag.

²⁰Bamot embeselug o Moab tonggo keyen lekma tom Pisga alma libag.

²¹Libareg Israel inap arimanowen it enesehelimuwon Amori inap onowe suwon Sihon ambeg lalihip ulug mon enepfagma libareg hiyag utuk lit,

²²”Hat hangginang keyen lahuken hiyag nisamihin ulug heng habik wahe. Laruk lit suburu yatuk ambeg men anggur yatuk ambeg men sobil la fug angge we kalem suwon pikit lahuk. Ik fahet kinang habulig ambeg arimanowen oho hinanggoho naruk lamuhuk fug. We kalem suwon eneg laruk lit hangginang atog keyen wilip amuhuk,” ulug hiyag itfag.

²³Hiyag itfagma Sihon inowen nangginang keyen lahup fug ulug hiyag isibareg otsi sehen senehon obog toho palu eneplug Israel inap lekma weregma libareg o Yahas horogman it men tog aptuk latfag.

²⁴Tog aptuk lit Israel inaben Sihon umalikisi men waroho apmayap enepfareg enengginang Arnon ikman tulug Yabok ikma ilmig enepfag. Ik Yabok ino Amon inap enengginang hiliyangge ulug elehet yaron oho ambeg ap kuk fug teg latfag.

²⁵Israel inap arimanowen Amori inap inibam pumbuk suwon Hesbon men o pumbuk toron walinggoho welatfahon men ilmig tibareg welatfag.

²⁶Atam o Hesbon ino Amori inap onowe suwon Sihon ibam welatfag. Sihon inowen Moab inap onowe suwon tam welatfahon men tog aptuk lit angginang obog toho ilmig til larukmen eneg Arnon ikma senerik libag.

²⁷Senerik libag ino fahet aben sini yunggultuk lit, ”Hun Sihon ibam o Hesbon ino halog turusama niren hebeloho wiri feruk lit elehet walinggoho oho fuhuken maniyek!

²⁸Indam o Hesbon inaben Moab inap tom ik Arnon ayegma werehon seneg latfahon arimano apmayap eneptuk lit inibam o Ar ino harep pisako siyahap tibag.

²⁹Unumba Kamos ine elehen let enebuk fug teg latfagma Moab inap arimano siyag atfag. Moab inap ap angge enekolen linggik-longgo urukmu hiyap eneg Sihon inowen ininggik hele waroho at ibam og eneplug watfag.

³⁰Ketiya niren Sihon umalikisi men waroho apmayap eneptukukteg inibam o Hesbon famen tulug Dibon fam o pumbuk obog toho harep pisako siyahap turuk lit Medeba horogma o Nofah oho olunap turukuk,” ulug sini yunggultuk.

³¹Israel inap arimano Amori inap enengginang fam welatfag li

³²Musa inowen, ”O pumbuk Yaezer aluwarik lalihip,” ulug otsi mon enepfagma libag. Libagma Musa umalikisi menen o ino men o pumbuk toron walinggoho welatfahon men ilmig taruk lit Amori inap o arimano fam welatfahon obog toho yanggal enepfag.

³³Yanggal enepfareg kinang Basan fil lul ulug ik eleruk fil larukmen Basan inap onowe suwon Og umalikisi obog toho menen Israel inap unusul ulug o Edrei horogma libag.

³⁴Libagma NINIKNI Allahn Musa fam ele uruk lit, ”At fahet hakol ha fug! Anden at umalikisi obog toho men enengginang men hat hinggikmu emberuk lahireg haren Amori inap onowe suwon Sihon o Hesbon welatisiyon ino watikin hag toho ar oho watmihin,” ulug hiyag itfag.

³⁵Hiyag itfagma Israel inap arimanowen hun Og umalikisi otsi obog toho unusibagma misig oho oluk welatfag fugmu enengginang oho ilmig tibag.