Read Angguruk Yali BILANGAN 22 Bible Online

BILANGAN 22 - Angguruk Yali bible

BILANGAN 22

¹Israel inap wilip atug laruk lit o Yerikho fuma fil ik Yordan paloho la fug angge o Moab lekma o sabo wiroho welatfag.

²Hun Zipor amloho Balak o Moab inap onowe suwon inowen hol harukmen Israel inap enebe anggolo waharusareg Amori inap siyahap eneptusa urukmu hol hibareg umalikisi Moab inap obog toho men enekolen unuwag elek-elek angge ruruk latfag.

⁴Ari roho turuk lit Moab inaben Midian inap onowesi unubam enele uruk lit, ”Wam sapiyen inggilangge mag-mag naruk hag toho Israel inap arimano oho mondoko waharuk lit mun angge man angge tuma werehon naruk lamuhup,” uruk latfag. Ari ibagma onowe suwon Balak inowen

⁵ap mon eneptuk lit, ”Hun Beor amloho Bileam kinang Amau fam ik Efrat horogma o Peor wereg ambeg lalihipteg hiyag itlihibon te tu: Ap o pumbuk humon enebe anggolo o Mesiren nenembeg waharusareg kinang keleg irisi. Keleg irisimu nunusul ulug nenembeg lema fil wereg.

⁶Waharuk inap arimano inine anggolo werehen nit men wirim teg eleg. Ari fahet let nenebik watmihinteg huluwap enebuhun. Huluwap enebuhunmu niren ap arimano unusuruk lit yanggal enebuhuk lit teg. Ap haren Allah unuk fam hi eneptuk lahenon arimano fano welamuhup, huluwap eneptuk lahen inap mondabi siyag amuhup angge re an nolukon ari fahet hiyag irik lalihip,” ulug mon enepfag.

⁷Mon enepfagma Moab inap onowesi men Midian inap onowesiyet Bileamen Israel inap huluwap enebukag ulug onggo walug ambeg libareg ap suwon Balak inowen ibag ane hikit toho hiyag itfag.

⁸Hiyag itfagma Bileam inowen hiyag isaruk lit, ”Hit tuman noholihip. NINIKNI Allahn hiyag nitmisi ane sono anden hiyag hisahuk,” ibagma Moab inap onowesi arimano Bileam ibam nohibag.

⁹Nohorukmu Allah ino Bileam iraham watfareg kapal haruk lit, ”Hibam wahason aruma nungge fahet wahasa?” ulug kapal hibagma

¹⁰Bileam inowen, ”Moab inap onowe Balak inowen mon enebik wahama hiyag nutuk lit,

¹¹’Ap anggolo roho nenembeg waharusareg kinang keleg irisimu let nenebik watmihinteg huluwap enebuhun. Huluwap enebuhun halug niren it arimano unusuruk lit yanggal enebuhuk lit teg,’ ehesa,” ulug hiyag itfag.

¹²Hiyag itfagma Allahn te, ”Anden Israel inap arimano nindi enesug lahi angge re haren huluwap enebuhun fug. Ari fahet ap wahason aruma men ambiyeg lahun fug,” ibag.

¹³Ibagma likiyamon Bileam inowen Balak otsi unubam ele uruk lit, ”NIKNI Allahn it men ambiyeg lahun fug ulug hiyag nerehekma henemu lalihip,” ibagma

¹⁴onowe Balak ambeg suhuloho watfareg Bileamen ibag ane ino hiyag itfag.

¹⁵Hiyag itfagma Balak inowen tam otsi ununuk toron eneg we tor angge mon enepfareg ketiya otsi ununuk suwon eneg eneko anggolo mon enepfagma

¹⁶Bileam ambeg libareg hiyag utuk lit, ”Nonowe Balak inowen hiyag hutuk lit, ’Folo-folo nambeg waruhunen alem ari-ari werehen pok aruhuk uk fug.

¹⁷Waruhun halug onggo anggolo roho og hutuk lit haren heng nabuhunon hikit toho sebe roho hubam tuhuk. Ketiya let nenebik watmihinteg ap waharuson arimano huluwap enebuhun,’ irisi,” ulug hiyag itfag.

¹⁸Hiyag itfagma Bileam inowen te, ”Ili ruruk angge emas perak men honowe Balak inowen ibam forohowon arimano obog toho og netep halug oho NIKNI Allah ele sobir isalug tor ane oho tuk fug teg lale.

¹⁹Nori, hir oho yoho tuma an men ambiyeg nohul. NIKNI Allahn hiyag nitmin perukon wereg ano ulug yet hamin,” ulug hiyag isibag.

²⁰Hiyag isibagma hubanggo nohorukmu Allah ino Bileam iraham watfareg hiyag utuk lit, ”Ap aruma hat men ambiyeg lul ulug wahasama ambiyeg lahup. Lahupteg Anden hiyag huruhuk ane hikit toho eneg turuk laruhun,” ibagma

²¹likiyamon Bileam ino ambohom keledai emberimu lahalug Moab inap onowesi men ambiyeg libag.

²²Bileam ino Moab inap onowesi men ambiyeg libahon fahet Allah olok hibag. Bileam wam keledai emberimu heriyegma umalikisi piren at men larukmen NINIKNI Allah ot malaikat ekeyen an pisan toho lamisi fug ulug kalem pulmu unduhuk latfag.

²³Malaikat inowen karog olokon inggikmu seneko unduhukmu yet hibareg wam keledai ino kebunggalem embeselug yabuk keyen laruk latfag. Yabuk keyen laruken Bileam inowen kebunggalem pikit lawag ulug watuk latfagma

²⁴nin kalem suwon fam watfareg larukmen anggur yabuk pul ke larukon fuma-fuma elehet oho ambeg pulmu malaikat ino unduhuk latfag.

²⁵Huhelma unduhukmu wam keledai inowen yet hibareg elehet horogma laruk lit Bileam uyug himbisoho watfagma Bileam inowen ambohom keledai ino nin watuk latfag.

²⁶Watfagma malaikat ino fuma-fuma ap la fug teg ambeg huhelma in arik libagma at pisan toho ap la fug teg ulug

²⁷wam keledai inowen yet hibareg ying atfag. Ying atfagma Bileam ino olok hibareg ambohom wanggun tomuk fam watuk latfag.

²⁸Watuk latfagma NINIKNI Allahn ele ukag pibagma keledai inowen Bileam ubam ele uruk lit, ”Anden siyag ane hubam nungge tihimu hinggik hinahanam nuwarehen?” ibag.

²⁹Ibagma Bileamen te, ”Nele ying nabehenma huwarihi. Karog ninggikmu senetereg huwate,” ibag.

³⁰Ibagma keledai inowen, ”An hambohomen indamen tulug ketiya oho ha haplug laruk lahi fug? Indamen oho hele ying haptuk latikik ano?” ibagma Bileamen, ”Nele ying naptuk latikin fug,” ibag.

³¹Ari ibagma NINIKNI Allahn Bileam il husibagma malaikat karog olokon inggikmu seneko unduhukmu yet hibareg Bileam ino elenggen fam sahung tibag.

³²Sahung tegma malaikat inowen hiyag utuk lit, ”Nungge fahet hambohom ino hinahanam warehen? Hat Balak ambeg lamisi fug peruk lit kalem ilmig turuk lahi.

³³Anden kalem ilmig turukmu hambohom inowen yet neyehekteg hinahanam amu ke hehepno naptuk laha. Hehepno naplep fugmu hambohom embeseruk lit hat hebe huwate,” ibag.

³⁴Ibagma Bileamen te, ”Hat kalem pulmu unduhukmu yet hiyihi fureg siyag ane tihi. Haren Balak ambeg lamisi fug peruk lahenma ketiya suhuloho nibam lamin,” ibag.

³⁵Ibagma malaikat inowen, ”We ap aruma men lamihin. Lamihinteg we anden hiyag huruhuk ane uruk laruhun,” ibagma Bileam ino Balak otsi men laruk latfag.

³⁶Hun Bileam ino waharuk urukmu hol hibareg Balak inowen olohotma lamin ulug Moab kinang hilimu ik Arnon ayegma o pumbuk Moab libag.

³⁷Libareg Bileam ubam ele uruk lit, ”Nungge fahet tam wol haptikik sul ino waharikin fug? Onggo anggolo og num fug teg ulug lamin fug perikin?” ibag.

³⁸Ibagma Bileamen te, ”Nare, ketiya wahi. We nungge-nungge ihi ha fug teg. Allahn hiyag nutukmu eneg ihi ha reg,” ibag.

³⁹Ibagma Bileam ino Balam men o pumbuk Huzot libareg

⁴⁰Balak inowen wam sapi domba piren hinahan waroho Allah fahet esetuk lit winon Bileam men Moab inap onowesi at men watfahonet og isibagma naruk latfag.

⁴¹Likiyamon Bileam inowen Israel inap wereg ke oholuk fil yet hawag ulug Balak inowen punu Bamot-Baal fam hondoholug lahibag.