Read Angguruk Yali BILANGAN 23 Bible Online

BILANGAN 23 - Angguruk Yali bible

BILANGAN 23

¹Lahibareg Bileam inowen Balak fam, ”Anden Allah fahet hubu lahapminen hubu lahaptuk ambeg sabiren wit nitmihinteg wam sapi abon sabiren, domba abon sabiren men walug watmihin,” ibag ane ari hikit toho

²Balak inowen turuk latfag. Hubu lahaptuk ambeg sabiren witfahon itano fam Balam men Bileam menen wam sapi domba sabiren walug watfahon itano waroho hubu lahaptuk ambeg wal-wal yaltuk latfag.

³Yaltuk lit Bileam inowen Balak fam, ”Wam yaltuk lahenon iraham unduhuk lamin! NIKNI Allah nambeg watmisi ano ulug yet ha lamin. Watmisireg ele nungge ulug hiyag nitmisiyon anden hiyag hirik watmin,” ibareg Bileam amu punumu lahibag.

⁴Lahibagma Allah Bileam ambeg watfagma Bileam inowen hiyag utuk lit, ”Anden hubu lahaptuk ambeg sabiren wirihireg wam sapi sabiren men domba sabiren men waroho hubu lahaptuk ambeg wal taneg Hat fahet yalihi,” ibag.

⁵Ibagma NINIKNI Allahn ari-ari imihin ulug hiyag itfareg Balak ambeg hebeloho lamihin ibagma

⁶Balak ino Moab inap onowesi obog toho men wam yaltukon iraham unduhukmu Bileam ino enembeg watfag.

⁷Watfareg Bileam inowen ele uruk latfahon tu, ”An nibam yali fil lumu tom Aram fam welatikikmu Moab inap onowe Balak inowen, ’Let nenebik watmihinteg Israel inap arimano huluwap enebuhun,’ ulug wol naptisi angge famen

⁸Allahn huluwap enebuhuk fug peruk angge re anden huluwap enebihi ha reg? NIKNI Allahn pet enebuhuk fug peruk angge re anden pet enebuk fug teg lahi.

⁹Anden punumuwen yet isarukmen ap o pumbuk winaman turuk ane hikit toho tuk fug angge enemu wirik toho weregma yet isaruk lahi.

¹⁰Yakuben ondohowonen ondohowon arimano ik yinggi mondeg hag toho ap misihen oho winag isa fug teg. Israel inaben we fano ane eneg turuk lit weregman war atuk lamuhup hag toho an oho nindi yuwag toho war aruhuk fano peruk lahi,” ibag.

¹¹Ari ibagma Balak inowen Bileam fam, ”Nungge fahet ari ehen, hat siyag! Ap seliyon aruma huluwap enebuhun ulug wol haptikik angge famen ketiya Allah unuk fam hi enebehen,” ibag.

¹²Ibagma Bileamen, ”NIKNI Allahn hiyag nerehekon hikit toho eneg uk teg lahi,” ibag.

¹³Ibagma Balak inowen Bileam fam, ”Lema luk ohon! Lul ambeg inowen Israel inap obog toho yet isa fug teg. We tor angge yet isalug huluwap enepmihin,” ibareg

¹⁴Bileam hondoholug tom Pisga atelma Zofim silimu libag. Libag ambeg inowen oho hubu lahaptuk ambeg sabiren witfareg wam sapi sabiren domba sabiren men waroho hubu lahaptuk ambeg wal-wal yaltuk latfag.

¹⁵Yaltukmu Bileam inowen Balak fam, ”Wam yaltuk lahenon iraham unduhuk lamin! NIKNI Allahn ele hiyag nirik watmisiyen an lema lamin,” ibag.

¹⁶Libagma NINIKNI Allah Bileam ambeg watfareg ari-ari imihin ulug hiyag itfareg Balak ambeg suhuloho lamihin ibagma

¹⁷Balak ino Moab inap onowesi men wam yaltukon iniraham unduhukmu Bileam ino enembeg watfag. Watfagma Balak inowen NINIKNI Allahn nungge ane hiyag herehek ulug kapal hibagma

¹⁸Bileam inowen ele uruk latfahon tu: ”Hun Zipor amloho Balak nare, anden iminon holik ma!

¹⁹Allahn ap kinangmonen enele si ane uruk hag toho uk fug angge un ane irikik ulug ele uwag oko wa fug teg. Allahn ele urukon tem toho teko laruk. Ele sali emberukon hikit toho turuk laruhu.

²⁰Fano ane unubahet imihin ulug hiyag nerehek. Allahn indi henesug laruhu imihin ulug hiyag nerehekon ino anden umbusuk fug teg lahi.

²¹Israel inap aruma alem angginon unubam am fug angge asengseng toho welamuhup fug ulug fulu roho yet haruk lahi. INIKNI Allah it inim weregma iren, ’Ninikni suwon At wereg,’ ulug enehiyeg toho yunggultuk.

²²Allahn o Mesiren hondog eneplug wilip atisi. Wam sapi olokon farema werehonen ine roho turuk hag toho Aren ine roho it inibil atuk.

²³Humali men pamongge men fam Israel inap aruma unusuk fug teg. ’Ap aruma Allahn wanggi waroho fer enesug,’ ulug aben enele uruk lamuhup.

²⁴Mene olokon singa inowen wam pak senetug ying am fug angge enemep milang heheg hum-hum naruk hag toho Israel inap aruma oho onolok anggolo wereg,” ibag.

²⁵Ibagma Balak inowen Bileam fam, ”Haren te Israel inap aruma huluwap enepmin fug pehenteg nungge fahet Allah unuk fam hi enebehen? Hele ehenon ari elen fug,” ibag.

²⁶Ibagma Bileamen te, ”NIKNI Allahn hiyag nutuk ane hikit toho eneg tuk teg lahi ulug hiyag hirihi fug?” ibag.

²⁷Ibagma Balak inowen, ”Winama luk ohon! Lul ambeg inowen an fahet Israel inap aruma huluwap enepmihinen Allahn hiyag hitmisi ano,” ulug hiyag itfareg

²⁸Bileam men ambiyeg laruk lit tom Peor lek palimu werehon ino fam lahibag.

²⁹Lahibareg Bileam inowen Balak fam, ”Tuma oho hubu lahaptuk ambeg sabiren witmihinteg wam sapi abon sabiren, domba abon sabiren men walug watmihin,” ibag ane hikit toho

³⁰Balak inowen turuk lit wam arimano waroho hubu lahaptuk ambeg wal taneg yaltuk latfag.